မြန်မာနိုင်ငံ အလယ်ပိုင်းမှာ ငလျင်သုံးကြိမ်ထပ်လှုပ်

• RFA Burmese
  2025-04-17

မြန်မာနိုင်ငံအလယ်ပိုင်းဒေသတွေဖြစ်တဲ့ မန္တလေးတိုင်း ပုသိမ်ကြီးမြို့နယ်၊ ပဲခူးတိုင်း ရေတာရှည်နဲ့ နေပြည်တော် လယ်ဝေးမြို့နယ်တွေကို ဗဟိုပြုပြီး ဧပြီလ ၁၇ ရက် ဒီနေ့မှာ ငလျင်သုံးကြိမ် ထပ်မံလှုပ်ခတ်ခဲ့တယ်လို့ မိုးလေဝသနဲ့ ဇလဗေဒညွှန်ကြားမှုဦးစီးဌာနကထုတ်ပြန်ပါတယ်။

ဧပြီလ ၁၇ ရက်နေ့ မနက် ၄ နာရီ ၆ မိနစ်လောက်က ရေတာရှည်မြို့ အနောက်မြောက်ဘက် ၈ မိုင်ခန့်အကွာမှာ ၃ ဒသမ ၁ ရစ်(ချ်)တာစကေး၊ မနက် ၅ နာရီ ၃၂ မိနစ်လောက်က လယ်ဝေးမြို့ အနောက်မြောက်ဘက် ၈ မိုင်ခန့်အကွာမှာ အင်အား ၃ ဒသမ ၂ ရစ်(ချ်)တာစကေး၊ မွန်းလွဲ ၁ နာရီ ၂ မိနစ်လောက်က ပုသိမ်ကြီးမြို့ အနောက်တောင်ဘက် နှစ်မိုင်ခန့်အကွာမှာ အင်အား ၄ ဒသမ ၆ ရစ်(ချ်)တာစကေး အသီးသီးရှိတဲ့ ငလျင်တွေလှုပ်ခတ်ခဲ့တာပါ။

ဒီနေ့ မွန်းလွဲပိုင်းမှာ လှုပ်ခတ်ခဲ့တဲ့ငလျင်ကိုတော့ မန္တလေးမြို့ပေါ်ကနေ သိသိသာသာခံစားခဲ့ရပြီး ဒေသခံတွေဟာ ယာယီတဲတွေမှာ နေထိုင်နေကြရဆဲဖြစ်လို့ အထိအခိုက်မရှိခဲ့ဘူးလို့ မြို့ခံအချို့ကပြောပါတယ်။

မြန်မာနိုင်ငံမှာ မတ်လ ၂၈ ရက်နေ့က လှုပ်ခတ်ခဲ့တဲ့ အင်အားပြင်းငလျင်အပါအဝင် ဧပြီလ ၁၇ ရက်နေ့ မွန်းလွဲ ပိုင်းအထိ နောက်ဆက်တွဲလှုပ်ခတ်တဲ့ ငလျင်ပေါင်း ၁၄၀ အထိရှိလာတယ်လို့လည်း မိုးလေဝသနဲ့ ဇလဗေဒညွှန်ကြားမှုဦးစီးဌာန ထုတ်ပြန်ချက်မှာဖော်ပြထားပါတယ်။

အဲဒီအထဲမှာ ရစ်(ချ်)တာစကေး ၄ နဲ့အထက် လှုပ်ခတ်တဲ့ ငလျင်ပေါင်း ၃၂ ကြိမ်အထိ ရှိပါတယ်။

စစ်ကောင်စီရဲ့ထုတ်ပြန်ချက်တွေအရ မတ်လ ၂၈ ရက်နေ့က လှုပ်ခတ်ခဲ့တဲ့ငလျင်ကြောင့် ဧပြီလ ၁၆ ရက် ညနေ ၆ နာရီအထိ သေဆုံး သူ ၃၇၂၇ ဦးအထိ ရှိလာနေပါတယ်။