မုန်တိုင်းဘေး ကူညီဖို့ နိုင်ငံတကာကို ဒေါ်အောင်ဆန်းစုကြည်နဲ့ မြန်မာ့ ဒီမိုကရေစီ ခေါင်းဆောင်တွေ ပန်ကြား

• 
  2010-12-29

ဒေါ်အောင်ဆန်းစုကြည် နဲ့ NLD ခေါင်းဆောင်တွေ၊ ဝါရင့် နိုင်ငံရေး ခေါင်းဆောင်တွေ၊ ပြည်သူ့ လွှတ်တော် ကိုယ်စားပြု ကော်မတီ CRPP အဖွဲ့ဝင်တွေ ၊ နိုင်ငံရေး ပါတီ ခေါင်းဆောင်တွေနဲ့ တသီး ပုဂ္ဂလ လွှတ်တော် ကိုယ်စားလှယ်လောင်းတွေ စုပေါင်း လက်မှတ် ရေးထိုး ထုတ်ပြန်တဲ့ ဒီပန်ကြားလွှာနဲ့ပတ်သက်ပြီး NLD ဗဟို အလုပ် အမှုဆောင် အဖွဲ့ဝင် ဦးအုန်းကြိုင်က အခုလို ရှင်းပြပါတယ်။

"ဂီရိ၊ နာဂစ် မုန်တိုင်းဒဏ်သင့်တဲ့ ပြည်သူတွေကို ကူညီဖို့ ပန်ကြားလွှာ မနေ့က အဖွဲ့ချုပ် အထွေထွေ အတွင်းရေးမှူးနဲ့ ဝါရင့် ခေါင်းဆောင်များ၊ CRPP ခေါင်းဆောင်များ၊ နောက် အဖွဲ့ချုပ်နဲ့ လူမှုရေး ကွန်ယက်တွေမှာ အတူလက်တွဲ လုပ်ဆောင်ဖို့ သဘောတူထားတဲ့ နိုင်ငံရေးခေါင်းဆောင်တွေနဲ့ လက်မှတ်ရေးထိုးပြီးတော့ ထုတ်ပြန်လိုက်တယ်။

မုန်တိုင်းဒဏ်သင့်တဲ့ ပြည်သူတွေဟာ ပြည့်ဝတဲ့ ကူညီမှုတွေ မရတဲ့အတွက်ကြောင့် ဘ၀ ပြန်လည်ထူထောင်ရေးမှာ အခုထက်ထိ ပြည့်ပြည့်၀၀ အကူအညီ ရတာမတွေ့ရသေးပါဘူး။

ဒါကြောင့် နှစ်သစ်ရောက်ခါနီးမှာ မုန်တိုင်းဒဏ်သင့်တဲ့ ပြည်သူတွေရဲ့ အရေးကိုလည်း စဉ်းစားပေးကြပါ။ နှစ်သစ်မှာ စေတနာ အသစ်တွေနဲ့ အကူအညီ ပေးကြပါလို့ စေတနာရှင် တသီး ပုဂ္ဂလတွေ၊ အသင်းအဖွဲ့တွေနဲ့ ကမ္ဘာ့နိုင်ငံ အသီးသီးကို တိုက်တွန်း နှိုးဆော် လိုက်ပါတယ်လို့ ဖော်ပြ ထားပါတယ်။"

ဒီဇင်္ဘာလ ဒုတိယပတ်အတွင်း ရခိုင်ပြည်နယ်က မုန်တိုင်းသင့်ဒုက္ခသည်တွေကို သွားရောက်ကူညီခဲ့တဲ့ CRPP နဲ့ NLD အဖွဲ့ဝင်တွေရဲ့ အတွေ့အကြုံတွေ၊ ဒေသခံပြည်သူတွေရဲ့ တောင်းဆိုချက်တွေနဲ့ ကုလသမဂ္ဂရဲ့ အစီရင်ခံစာတွေပါ အချက်အလက်တွေပေါ်မူတည်ပြီး ဒီကြေညာချက် ထုတ်ပြန်ရတာဖြစ်ကြောင်းလည်း ဦးအုန်းကြိုင်က ရှင်းပြပါတယ်။

"ဒေသခံပြည်သူတွေက အားကိုးတကြီးနဲ့ သူတို့ ရဲ ဘဝအခြေအနေကို တင်ပြပြီး အကူအညီ တောင်းခံတဲ့၊ မေတ္တာရပ်ခံတဲ့ စာတွေ ပေးလိုက်ပါတယ်။ အဲဒီစာပေါင်း နှစ်ထောင်လောက် ရရှိခဲ့ပါတယ်။

စာတွေကို တွက်ချက်ပြီးတော့ အသေအချာ ကြည့်လိုက်တဲ့အခါမှာ အဲဒီဒေသမှာ လယ် ဧကပေါင်း ထောင်သောင်းကို အကာအကွယ်ပေးဖို့ အတွက် လိုအပ်နေတဲ့ ရေငံတား တမံတွေ မိုင် ၉၀ လောက် ပြန်လည် ပြုပြင်တည်ဆောက်ပေးဖို့၊ ရေလုပ်သားပေါင်း ၈၅၀ လောက်က စားဝတ်နေရေး ပြန်လည် လုပ်ကိုင်နိုင်ဖို့ ငါးဖမ်းစက်လှေတို့၊ ခါးဖမ်းပိုက်တို့၊ ပြန်လည် ထူထောင်ပေးဖို့ အကူအညီတောင်းတဲ့ စာတွေ၊ နောက် ပျက်သွားတဲ့ စာသင်ကျောင်းပေါင်း ၁၂၀ နဲ့ ဘုန်းကြီးကျောင်းပေါင်း ၇၀ လောက်ကို ပြန်လည်မွန်းမံ တည်ဆောက်ပေးဖို့၊ အဲဒါတွေကို ဖြည့်ဆည်းနိုင်ဖို့ ဆိုရင်တော့ ပေါက်တောနဲ့ မြေပုံ ၂ မြို့နယ်ထဲ အတွက်တင် ဒေါ်လာ ၆ သန်းလောက် အကူအညီ လိုအပ်နေတယ်။"

မြန်မာပြည်က မုန်တိုင်းသင့် ဒုက္ခသည်တွေကို ကူညီပေးဖို့ မြန်မာ့ ဒီမိုကရေစီ အင်အားစုတွေ စုပေါင်း လက်မှတ် ရေးထိုးထားတဲ့ ဒီပန်ကြားလွှာကို ကမ္ဘာ့နိုင်ငံ အသီးသီးနဲ့ စေတနာရှင် အလှုရှင်အသင်းအဖွဲ့တွေကို ဒီသတင်းပတ် အတွင်း ဖြန့်ဝေ ပန်ကြားသွားမယ်လို့ သိရပါတယ်။

ဒီအကြောင်းနဲ့ ပတ်သက်ပြီး လက်မှတ်ရေးထိုး တောင်းဆိုရာမှာ ပါဝင်ခဲ့တဲ့ ဒီမိုကရက်တစ်ပါတီ (မြန်မာပြည်) က ဥက္ကဌ ဦးသုဝေကို RFA က ဒေါ်ခင်ခင်အိ ဆက်သွယ် မေးမြန်းထားတာကို နားဆင်နိုင်ပါတယ်။

	ဆက်သွယ်မေးမြန်းချက်။
	အသံဖိုင်ယူရန်။