လူ့အခွင့်အရေး အထူးကိုယ်စားလှယ်နဲ့ နိုင်ငံရေးအကျဉ်းသားကိစ္စ ဆွေးနွေးဖို့ ပါတီတွေပြင်ဆင်
မြန်မာနိုင်ငံရဲ့ လက်ရှိ အခြေအနေနဲ့ လူ့အခွင့်အရေး ပြဿနာတွေကို ကုလ သမဂ္ဂ လူ့အခွင့်အရေး ကိုယ်စားလှယ်နဲ့ တင်ပြဆွေးနွေးဖို့ နိုင်ငံရေးပါတီတွေ ပြင်ဆင် ဆောင်ရွက်နေကြတယ်လို့ သိရပါတယ်။
-
2011-08-21 -
-
-
Your browser doesn’t support HTML5 audio
အစိုးရသစ်လက်ထက် မြန်မာနိုင်ငံကို ပထမဆုံးအကြိမ်အဖြစ် ရောက်ရှိလာတဲ့ ကုလသမဂ္ဂ လူ့အခွင့်အရေး အထူးကိုယ်စားလှယ် မစ္စတာကင်တားနား အနေနဲ့ နိုင်ငံရေးပါတီတွေကို တွေ့မတွေ့ အတိအကျ မသိရသေးပေမယ့် တွေ့ဆုံလိမ့်မယ်လို့ မျှော်လင့်ထားကြောင်း၊ တွေ့ဆုံတဲ့အခါမှာ နိုင်ငံရေးအကျဉ်းသားကိစ္စကို အလေးထား တင်ပြမှာဖြစ်ကြောင်း ရခိုင်တိုင်းရင်းသားများ တိုးတက်ရေးပါတီ RNDP ဥက္ကဋ္ဌ ဒေါက်တာအေးမောင်က ပြောပါတယ်။
“တိုင်းပြည်ကို ပြုပြင်ပြောင်းလဲစေချင်တဲ့ မိမိရဲ့ အယူအဆလေးနဲ့ ဆွေးနွေးငြင်းခုန်ကြတယ်၊ ဆန္ဒထုတ်ဖော်ကြတယ် ဆိုတဲ့နေရာမှာ အကြောင်းကြောင်းကြောင့် ထိန်းသိမ်းထားခဲ့ကြတယ်ဆိုရင် လွှတ်ပေးဖို့ ကျနော်တို့က မေတ္တာရပ်ခံပါတယ်။ လွှတ်ပေးမှလည်းပဲ နှစ်ဘက်ပြေအေးဖို့၊ ထာဝရ ငြိမ်းချမ်းနိုင်တဲ့ အခြေအနေကို ရောက်သွားနိုင်ဖို့ လမ်းကြောင်းက ရှိနေပြီလေ။ အဲဒီအပေါ်မှာ အဓိပ္ပါယ်နှစ်ခွ ဖြစ်မယ့်ဝေါဟာရကို မသုံးဘဲနဲ့ ပြည်သူက ကြိုက်တဲ့ ဝေါဟာရဖြစ်အောင် ပုံဖော်ပေးဖို့ ကျနော်တို့က လိုလားပါတယ်”
မစ္စတာ ကင်တားနားနဲ့ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်တို့ လာမယ့်သီတင်းပတ် အတွင်း တွေ့ဆုံဖို့ရှိကြောင်း ဗဟို အလုပ်အမှုဆောင် အဖွဲ့ဝင်တွေနဲ့ တွေ့ဆုံမှာဖြစ်ကြောင်း NLD က ထုတ်ပြန် ပြောကြားပါတယ်။
ဒီမိုကရက်တစ်ပါတီ (မြန်မာပြည်) အနေနဲ့ဲ မြန်မာပြည်က လူ့အခွင့်အရေး အခြေအနေတွေကို တင်ပြဆွေးနွေးနိုင်ဖို့ မျှော်လင့်ထားကြောင်းနဲ့ အမျိုးသားဒီမိုကရေစီ အင်အားစု NDF ပါတီက လတ်တလော ဖြစ်ပွားနေတဲ့ အဓမ္မလုပ်အားပေး ခိုင်းစေမှုတွေ၊ မြေယာ အသိမ်းခံရမှုတွေကို ဆွေးနွေးဖို့ စီစဉ်ထားကြောင်း သိရပါတယ်။
ဒီအကြောင်း နိုင်ငံရေးပါတီ ခေါင်းဆောင်တချို့နဲ့ RFA ဝိုင်းတော်သူ မခင်ခင်အိ ဆက်သွယ် မေးမြန်းတင်ပြထားတာကို တဆက်တည်း နားဆင်နိုင်ပါတယ်။
| ဆက်သွယ်မေးမြန်းတင်ပြချက်။ |
|
| အသံဖိုင်ယူရန်။ |