မြန်မာနိုင်ငံမှာ စားအုန်းဆီတင်သွင်းနိုင်ဖို့ ကုမ္ပဏီတွေကြိုးစားနေ

• 
  2018-06-22

မြန်မာနိုင်ငံမှာ လွယ်လွယ်ကူကူ ဝယ်ယူစားသောက်နိုင်တဲ့ fast food လုပ်ငန်းတွေ တိုးတက်များပြား လာတာနဲ့အမျှ စားအုန်းဆီလိုအပ်မှု များလာပြီး အာရှဒေသတွင်း ဆီအုန်းထုတ်လုပ်သူတွေက မြန်မာနိုင်ငံမှာ လိုသလို တင်ပို့ခွင့်ရဖို့ ကြိုးစားလာနေကြတယ်လို့ ဒီနေ့ထုတ် Bloomberg သတင်းတစ်ပုဒ်မှာ ဖော်ပြထားပါတယ်။

မြန်မာနိုင်ငံရဲ့ ဆီအုန်းတင်သွင်းမှုဟာ ပြီးခဲ့တဲ့ ၆ နှစ်အတွင်း မက်ထရစ်တန် ၇ သိန်းခွဲအထိ ရှိခဲ့တယ်လို့ အမေရိကန် စိုက်ပျိုးရေးဌာန စာရင်းတွေက ဆိုပါတယ်။ ၂ဝ၁၁ ခုနှစ်မတိုင်ခင်က တစ်နှစ်ကို တန်ချိန် ၂ သိန်းကနေ ၃ သိန်းအထိ သာ တင်သွင်းခွင့်ရှိခဲ့ရာက အခုလို တိုးတက်လာတာဖြစ်ပါတယ်။

မြန်မာနိုင်ငံမှာ KFC ကြက်သားကြော်လုပ်ငန်း၊ Pizza Hut နဲ့ Burger King လို အမေရိကန် အမြန်စားကုန်ဆိုင်တွေ နေရာယူလာသလို ဒီလုပ်ငန်းတွေမှာ သုံးတဲ့ စားအုန်းဆီအခြေခံ အကြော်ဆီတွေလည်း သုံးစွဲမှုပိုများလာခဲ့ပါတယ်။

ဆီအုန်းကထုတ်တဲ့ စားအုန်းဆီ ၈၅ ရာခိုင်နှုန်းဟာ အင်ဒိုနီးရှားနဲ့ မလေးရှားနိုင်ငံတွေက ထုတ်လုပ်တာ ဖြစ်ပါတယ်။