ကလေးစစ်သား ပပျောက်ရေး မြန်မာ ကုလ သဘောတူလက်မှတ်ရေးထိုး

• 
  2012-06-27

ကလေးသူငယ်တွေကို မြန်မာ့တပ်မတော်မှာ စစ်မှုထမ်းခြင်းမှ ကာကွယ်ဖို့နဲ့ အသက်မပြည့်သေးတဲ့ တပ်သားသစ်တွေကို လွတ်မြောက်ခွင့်ပြုဖို့ လုပ်ငန်း အစီအစဉ်တရပ်ကို လက်မှတ်ရေးထိုးကြတာလို့ ကုလသမဂ္ဂရဲ့ ထုတ်ပြန်ချက်မှာ ဖော်ပြထားပါတယ်။

ဒီအစီအစဉ်ကို ကုလသမဂ္ဂဆိုင်ရာ ကလေးသူငယ်များ စောင့်ရှောက်ရေးအဖွဲ့ UNICEF က ဦးဆောင်တာဖြစ်ပြီး ဒီလုပ်ငန်းတွေအတွက် အစိုးရက အကောင်အထည်ဖော်တဲ့နေရာမှာ UNICEF က အထောက်အပံ့ပေးမှာ ဖြစ်တယ်လို့ ဆိုပါတယ်။

မြန်မာနိုင်ငံမှာ မြန်မာ့တပ်မတော်အပါအဝင် DKBA ခေါ် ဒီမိုကရက်တစ် ကရင်ဗုဒ္ဓဘာသာစစ်တပ်၊ KIA ခေါ် ကချင်လွတ်မြောက်ရေးတပ်၊ KNLA ခေါ် ကရင်အမျိုးသား လွတ်မြောက်ရေးတပ်၊ KNLA-Peace Council ခေါ် ကရင်အမျိုးသား လွတ်မြောက်ရေးတပ်-ငြိမ်းချမ်းရေးကောင်စီ၊ ကရင်နီတပ်၊ SSA ရှမ်းပြည်နယ်တပ်-တောင်ပိုင်းနဲ့ UWSA ဝအမျိုးသားတပ်မတော်တို့ဟာ မြန်မာနိုင်ငံမှာ ကလေးစစ်သား စုဆောင်းအသုံးပြုနေတဲ့အဖွဲ့ ၈ ဖွဲ့ဖြစ်တယ်လို့ ကုလသမဂ္ဂက ဆိုပါတယ်။

အခုအစီအစဉ်သစ်အရ တပ်မတော်ကနေ ပြန်ပြီးလွတ်မြောက်လာမယ့် ကလေးတွေအတွက် ပြန်လည်ပြုစုပျိုးထောင်ရေးဟာ အရေးပါတဲ့ ရေရှည်လုပ်ငန်းဖြစ်တယ်လို့လည်း ကုလသမဂ္ဂကြေညာချက်မှာ ဖော်ပြထားပါတယ်။