မွန်ပြည်နယ် ရေဘေးဆုံးရှုံးမှု

မွန်ပြည်နယ်က မြို့နယ် ၇ ခုမှာ ရေကြီးရေလျှံခဲ့တာကြောင့် ပျက်ဆီးဆုံးရှုံးခဲ့ရတဲ့ တန်ဖိုးငွေကျပ် သိန်း ၆၅ဝဝ နီးပါးထိရှိတယ်လို့ မွန်ပြည်နယ် အစိုးရအဖွဲ့က ပြောပါတယ်။

ရေကြီးမူကြောင့် နေအိမ်တွေပြိုကျတာ ၊ခြံစည်းရိုး အုတ်တံတိုင်းပျက်စီးတာတွေရှိခဲ့ပြီး လူအသေအပျောက်တော့ မရှိဘူးလို့ မွန်ပြည်နယ် အစိုးရအဖွဲ့ ညွှန်ကြားရေးမှူး ဦးမြင့်သန်းဝင်းက ပြောပါတယ်။

"'ဒီလိုဖြစ်သွားတဲ့ဖြစ်စဉ်အရဆိုရင် ပျက်စီးဆုံးရှုံးသွားတဲ့တန်ဖိုးအနေနဲ့ မွန်ပြည်နယ်တစ်ခုလုံးအနေနဲ့ ကျပ်သိန်း ၆၄ဝဝ ကျော် ခန့်မှန်းပေါ့ ဆုံးရှုံးခဲ့တယ်၊ ပျက်စီးဆုံးရှုံးမှုအနေနဲ့ နေအိမ်တွေပြိုကျတာ၊ နောက်တစ်ခါ ခြံစည်းရိုး အုတ်တံတိုင်း ဒါတွေပြိုလဲတာတွေပေါ့ အများဆုံးဖြစ်ပါတယ်၊ လူထိခိုက်ပျက်စီးဆုံးရှုံးမှု အသေအပျောက် မရှိပါဘူး၊ မွန်ပြည်နယ်တစ်ခုလုံးအနေနဲ့"

မွန်ပြည်နယ် အစိုးရရဲ့ သတင်းထုတ်ပြန်ချက်မှာ လူအသေအပျောက်မရှိဘူးလို့ဆိုပေမယ့် မော်လမြိုင်မြို့မှာ ကိုယ်ဝန်ဆောင်သည် အမျိုးသမီးတစ်ဦး မြွေကိုက်သေဆုံးခဲ့သလို မုဒုံမြို့မှာလည်း ရာဘာခြံလုပ်သား မိသားစုက ကလေးတစ်ဦးနဲ့ အမျိုးသားတစ်ဦးသေဆုံးခဲ့တယ်လို့ သတင်းတွေထွက်ပေါ်ခဲ့ပါတယ်။

ရေကြီးခဲ့တဲ့နေရာတွေကို မွန်ပြည်နယ်အစိုးရအဖွဲ့က ဝန်ကြီးတွေဦးဆောင်ပြီး ပြန်လည်ထူထောင်ရေးလုပ်ငန်းတွေ လုပ်ဆောင်သွားမယ်လို့ ညွှန်ကြားရေးမှူး ဦးမြင့်သန်းဝင်းက ပြောပါတယ်။

မိုးရာသီက နောက် ၃လခန့် ကျန်ရှိနေသေးတာကြောင့် မွန်ပြည်နယ် သဘာဝဘေးအန္တရာယ် စီမံခန့်ခွဲမှုအဖွဲ့ကို ရပ်ကွက်ကျေးရွာအဆင့်ထိ တိုးချဲ့ဖွဲ့စည်းသွားမယ်လို့ သိရပါတယ်။

ရေကြီးမှုကြောင့် မွန်ပြည်နယ်က မြို့နယ် ၇ ခုမှာ ရေဘေးသင့်ပြည်သူ ခုနှစ်ထောင်ကျော်ရှိခဲ့ပြီး ယာယီ ကယ်ဆယ်ရေး စခန်းတွေမှာ ၄၃ ခုဖွင့်လှစ်ခဲ့ရခဲ့ပြီး လက်ရှိအချိန်မှာတော့ အကုန်နီးပါးပိတ်သိမ်းနိုင်ပြီလို့ သိရပါတယ်။