KNA ခေါင်းဆောင်နဲ့ မိသားစုဝင်တွေကို ဒဏ်ခတ်ပိတ်ဆို့ဖို့ Justice for Myanmar တောင်းဆို

• RFA Burmese
  2024-05-22

ကရင်နယ်ခြားစောင့်တပ် BGF (‌ခေါ်) ကရင်အမျိုးသားတပ်မတော် (KNA) ဟာ လူ့အခွင့်အရေး ချိုးဖောက်မှုတွေ၊ နိုင်ငံတကာ ရာဇဝတ် ဥပဒေ ချိုးဖောက်မှုနဲ့ နိုင်ငံဖြတ်ကျော် ရာဇဝတ်မှုတွေမှာ ပါဝင်ပတ်သက်မှု ရှိနေတဲ့အတွက် တပ်ဖွဲ့ခေါင်းဆောင်နဲ့ မိသားစုဝင်တွေကို ဒဏ်ခတ်ပိတ်ဆို့မှုတွေ အမြန်ဆုံးချမှတ်ဖို့ Justice For Myanmar က တောင်းဆိုလိုက်ပါတယ်။

စောချစ်သူ (ခေါ်) ဗိုလ်မှူးကြီး စံမြင့်ဦးဆောင်တဲ့ (BGF/KNA) တပ်ဖွဲ့ဟာ မြန်မာစစ်တပ်နဲ့ ကာလရှည်ကြာစွာ မဟာမိတ်ဖွဲ့ထားပြီး၊ မြန်မာစစ်တပ်ရဲ့ အကြမ်းဖက်စစ်ဆင်ရေးတွေမှာ ပါဝင်ကျူးလွန်သူဖြစ်တယ်လို့ Justice for Myanmar ရဲ့ မတ်လ ၂၂ ရက်နေ့ ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

Justice for Myanmar က မှတ်တမ်းတင်ထားတဲ့ BGF/ KNA တပ်ဖွဲ့တွေရဲ့ ကျူးလွန်ချိုးဖောက်မှုတွေထဲမှာ အရပ်သားတွေကို သတ်ဖြတ်တာ၊ မုဒိမ်းကျင့်တာ၊ ညှဉ်းပန်းနှိပ်စက်တာ၊ မတရားဖမ်းဆီးတာ၊ အဓမ္မပေါ်တာဆွဲတာ၊ လူသားဒိုင်းတွေအနေနဲ့ အသုံးပြုတာ၊ အတင်းအဓမ္မ စစ်သားစုဆောင်းတာ၊ အတင်းအကျပ် နေရာရွှေ့ပြောင်းစေတာ၊ ငွေညှစ်ခြင်းနဲ့ မြေသိမ်းခြင်းတွေစတဲ့ လုပ်ရပ်တွေ ပါဝင်ပြီး၊ စစ်ရာဇဝတ်မှုမြောက်တဲ့ လုပ်ရပ်တွေလည်း ပါဝင်တယ်လို့ အစီရင်ခံစာမှာ ဖော်ပြထားပါတယ်။

ဒါကြောင့် (BGF/KNA) ခေါင်းဆောင် စောချစ်သူ (ခေါ်) ဗိုလ်မှူးကြီးစံမြင့်နဲ့ သူရဲ့မိသားစုဝင်တွေအပါအဝင် အဖွဲ့အစည်းအတွင်းက ကုမ္ပဏီတွေနဲ့ လူပုဂ္ဂိုလ်တွေကို အစိုးရတွေအနေနဲ့ ဒဏ်ခတ်ပိတ်ဆို့တာတွေ အမြန်ဆုံးချမှတ်ဖို့ Justice for Myanmar က တောင်းဆိုလိုက်တာဖြစ်ပါတယ်။

Justice for Myanmar တောင်းဆိုချက်နဲ့ ပတ်သက်ပြီး KNA ခေါင်းဆောင် စောချစ်သူ (ခေါ်) ဗိုလ်မှူးကြီးစံမြင့် ကို RFA က ဆက်သွယ်မေးမြန်းဖို့ကြိုးစားနေပြီး အဆက်အသွယ်မရသေးပါဘူး။