အကြမ်းဖက်မှုတွေရပ်ပြီး စစ်မှန်တဲ့ဆွေးနွေးပွဲတွေလုပ်ဖို့ နိုင်ငံတကာ ထပ်မံတိုက်တွန်း

• RFA Burmese
  2025-01-06

မြန်မာနိုင်ငံမှာ အကြမ်းဖက်မှုတွေရပ်ဖို့ အမေရိကန်၊ ဗြိတိန်၊ ကနေဒါ၊ နော်ဝေ၊ နယူးဇီလန်၊ ဆွစ်ဇာလန်၊ ဩစတြေးလျ၊ တောင်ကိုရီးယား၊ အရှေ့တီမောနဲ့ ဥရောပသမဂ္ဂတို့က စစ်ကောင်စီကိုရော၊ လက်နက်ကိုင်အဖွဲ့အားလုံးကိုပါ တိုက်တွန်းတဲ့အကြောင်း ပူးတွဲကြေညာချက်တစ်စောင်ကို ဇန်နဝါရီ ၆ ရက်နေ့စွဲနဲ့ ထုတ်ပြန်လိုက်ပါတယ်။

ပိုဆိုးလာတဲ့ လူ့အခွင့်အရေးချိုးဖောက်မှုတွေ၊ လူသားချင်းစာနာမှု အကျပ်အတည်းတွေ နိုင်ငံအနှံ့ဖြစ်နေတာကို အလွန်စိုးရိမ်ပူပန်ကြောင်းနဲ့ မြန်မာစစ်ကောင်စီက ပြည်သူတွေကို ဆက်လက်အကြမ်းဖက်ဖိနှိပ်နေတဲ့ လုပ်ရပ်ဟာ လုံးဝလက်ခံနိုင်စရာမရှိကြောင်းလည်း ပြောပါတယ်။

အရပ်သားတွေအပေါ် နိုင်ငံတကာဥပဒေတွေ၊ လူ့အခွင့်အရေးတွေ ချိုးဖောက်ထားတဲ့ဖြစ်ရပ်တွေကို ယုံကြည်ရတဲ့ အစီရင်ခံစာတွေလက်ခံရရှိထားတယ်လို့လည်း အစိုးရတွေက ပြောပါတယ်။

အဲဒီလုပ်ရပ်တွေထဲမှာ ကလေးတွေ၊ တိုင်းရင်းသားတွေ၊ ဘာသာရေးအရလူနည်းစုတွေအပါအဝင် လူငယ်တွေကို အဓမ္မစစ်သားစုဆောင်းတာတွေ၊ မြန်မာစစ်တပ်က လေကြောင်းကနေတိုက်ခိုက်လို့ အရပ်သားတွေ သေကျေဒဏ်ရာရတာတွေ၊ အဆောက်အအုံပျက်စီးတာတွေ၊ ကျားမခွဲခြားဆက်ဆံတာတွေ၊ အိမ်တွေ မီးရှို့တာတွေ၊ လူမှုကူညီရေးအဖွဲ့တွေနဲ့ နိုင်ငံတကာအဖွဲ့တွေကို ကန့်သတ်ပိတ်ပင်တာတွေပါဝင်တယ်လို့လည်း ဖော်ပြထားပါတယ်။

အဲဒီအပြင် တိုက်ပွဲတွေဖြစ်နေတဲ့ ရခိုင်ပြည်နယ်မှာ ရိုဟင်ဂျာအပါအဝင် လူမှုအသိုင်းအဝိုင်းအားလုံး ဒုက္ခရောက်နေတာတွေကို စိုးရိမ်ပူပန်တယ်လို့လည်း ဆိုပါတယ်။

ဒါကြောင့် အကြမ်းဖက်လုပ်ရပ်တွေအားလုံး ချက်ချင်းရပ်ဖို့၊ ၂၀၂၂ ခုနှစ်က ချမှတ်ထားတဲ့ ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက် ၂၆၆၉ ကို အကောင်အထည်ဖော်ဖို့နဲ့ စိတ်ရှည်သည်းခံဖို့၊ မတရားဖမ်းဆီးထားတဲ့သူတွေအားလုံးကို ပြန်လွှတ်ဖို့ နိုင်ငံတကာအစိုးရတွေက တောင်းဆိုလိုက်ပါတယ်။

အဲဒီအပြင် မြန်မာပြည်ပြဿနာပြေလည်ရေးအတွက် အာဆီယံဥက္ကဋ္ဌနဲ့ သူ့ရဲ့အထူးကိုယ်စားလှယ်၊ ကုလသမဂ္ဂအထွေထွေအတွင်းရေးမှူးရဲ့ အထူးကိုယ်စားလှယ်တွေရဲ့ ကြိုးပမ်းချက်ကို အပြည့်အဝထောက်ခံတယ်လို့လည်း ထပ်မံပြောဆိုလိုက်ပါတယ်။

မြန်မာပြည်ငြိမ်းချမ်းပြီး ဒီမိုကရေစီလမ်းကြောင်းပေါ်ပြန်ရောက်ဖို့အတွက် စစ်မှန်ပြီး အပြုသဘောဆောင်တဲ့ ဆွေးနွေးပွဲတွေကို ဆက်လက်ထောက်ခံသွားမယ်လို့လည်း ပြောဆိုထားပါတယ်။