မြဝတီမြို့က ဝန်ထမ်းနဲ့မိသားစုတွေ ရုံးနဲ့ဝန်ထမ်းအိမ်ရာကနေ ထွက်ခွာဖို့ Federal Wings သတိပေး

• RFA Burmese
  2023-09-05

ကရင်ပြည်နယ်၊ မြဝတီမြို့က လက်နက်မကိုင်ထားတဲ့ စစ်ကောင်စီလက်အောက်ခံ ဝန်ထမ်းတွေ၊ ဝန်ထမ်း မိသားစုတွေနဲ့ စစ်ကောင်စီတပ်ဖွဲ့ဝင် မိသားစုတွေအနေနဲ့ သက်ဆိုင်ရာရုံးဌာနတွေနဲ့ ဝန်ထမ်းအိမ်ရာ တွေကနေ ထွက်ခွာဖို့ Federal Wings ဒရုန်းအဖွဲ့က သတိပေးလိုက်ပါတယ်။

ဒါ့အပြင် မြဝတီမြို့မှာရှိတဲ့ ပြည်သူတွေအနေနဲ့လည်း စစ်ကောင်စီတပ်စွဲထားတဲ့ ရုံးတွေ၊ တပ်စခန်းတွေနဲ့ ဝေးရာအရပ်ကို ရွှေ့ပြောင်းနေထိုင်ပေးကြဖို့ အထူးမေတ္တာရပ်ခံတယ် လို့လည်း စက်တင်ဘာလ ၄ ရက် မနေ့ညပိုင်းက သတိပေးထားပါတယ်။

ဒရုန်းတိုက်ခိုက်မှုဟာ တိကျမှုရှိပေမယ့် မလိုလားတဲ့ ဘေးထွက်ထိခိုက်မှုတွေကနေ ရှောင်ရှားနိုင်ဖို့ အခုလို သတိပေးတာလို့ ဆိုပါတယ်။

ကရင်ပြည်နယ်၊ မြဝတီမြို့က မြဝတီခရိုင်ရဲတပ်ဖွဲ့မှူးရုံးကို ကရင်အမျိုးသားအစည်းအရုံး (KNU) လက်အောက်ခံ KNLA နဲ့ ပူးပေါင်းတပ်တွေက စက်တင်ဘာလ ၃ ရက် ည ၇ နာရီဝန်းကျင်မှာ ဒရုန်းနဲ့ ဗုံးကြဲတိုက်ခိုက်ခဲ့ပါတယ်။

ဒရုန်းနဲ့ ဗုံးသီးလေးလုံး ကြဲချတိုက်ခိုက်ခဲ့တာဖြစ်ပြီး တိုက်ခိုက်မှုအတွင်း မြဝတီခရိုင် အုပ်ချုပ်ရေးမှူး၊ ခလရ ၂၇၅ ယာယီတပ်ရင်းမှူးတို့ အပါအဝင် ငါးဦးသေဆုံးပြီး ၁၁ ဦး ဒဏ်ရာရခဲ့တယ်လို့ ကူညီ ကယ်ဆယ်ရေးလုပ်ခဲ့သူတွေ က RFA ကို ပြောထားပါတယ်။