ကချင်ပြည်နယ် NDF ခေါင်းဆောင် ဒေါ်ဘောက် ဂျာ လွတ်မြောက်
အမျိုးသား ဒီမိုကရေစီအင်အားစု ပါတီရဲ့ ကချင်ပြည်နယ် ဥက္ကဌ ဒေါ်ဘောက်ဂျာဟာ ဖါးကန့်မြို့နယ် ရဲစခန်းမှာ ၆ လကျော်ကြာ ထိန်းသိမ်းခံထား ရပြီး မနေ့က ပြန်လည်လွတ်မြောက်လာပါတယ်။
-
2014-01-25 -
-
-
Your browser doesn’t support HTML5 audio
အမျိုးသား ဒီမိုကရေစီအင်အားစု ပါတီရဲ့ ကချင်ပြည်နယ် ဥက္ကဌ ဒေါ်ဘောက်ဂျာဟာ ဖါးကန့်မြို့နယ် ရဲစခန်းမှာ ၆ လကျော်ကြာ ထိန်းသိမ်းခံထားရပြီး မနေ့က ပြန်လည် လွတ်မြောက်လာပါတယ်။
ဒေါ်ဘောက်ဂျာကို ပုဒ်မ ၃၀၄ (က) လူသေမှု၊ ပုဒ်မ ၄၁ ဆေးကောင်စီအက်ဥပဒေ၊ ပုဒ်မ ၃၃ ယစ်မျိုးဥပဒေစတဲ့ အမှု ၃ ခုနဲ့ တရားစွဲဆို ဖမ်းဆီးခဲ့တာပါ။ အဲဒီအမှုတွေဟာ အမှုဆင်ပြီး ထောင်ချတာဖြစ်တယ် လို့ ဒေါ်ဘောက်ဂျာက RFA ကို ပြောပါတယ်။
“မြန်မာနိုင်ငံ ဆေးကောင်စီ ၄၁ ကကျတော့ ခိုင်လုံမှုမရှိတဲ့အတွက် အပြစ်ကနေ လွတ်တယ်ဆိုပြီးတော့ပြောတယ်၊ ဒါပေမယ့် ယစ်မျိုး ၃၃ ကိုကျတော့ ထောင် ၆ လဆိုပြီးတော့ချထားတယ်၊ ထောင် ၆ လကလည်း အချုပ်ထဲမှာ ၆ လကျော်နေတဲ့အတွက် ၃ လက လျော့ရက်ဆိုတော့ ဒီနေ့ တခါတည်းလွတ်တယ်ဆိုပြီးတော့ အမိန့်ချခဲ့တာပေါ့နော်၊ ဒါပေမယ့် ယစ်မျိုး ၃၃ နဲ့ ကျမကိုချတယ်၊ အဲဒီကိစ္စကိုတော့ မကျေနပ်ဘူးပေါ့”
ပုဒ်မ ၃၀၄ (က) လူသေမှုကို တရားလိုဘက်က အမှုရုတ်သိမ်းခဲ့တဲ့အတွက် ပြီးခဲ့တဲ့ ဇန်နဝါရီ ၁၆ ရက်နေ့မှာ ဖားကန့်မြို့နယ်တရားရုံးက အပြစ်မရှိကြောင်း အမိန့်ချခဲ့ပါတယ်။
ဒါ့အပြင် တရားစွဲဆိုအမှုရင်ဆိုင်နေချိန် တလျှောက်လုံးမှာလည်း ဖားကန့်ရဲစခန်း အချုပ်ထဲမှာ ၆ လကျော် အချုပ်ခံနေရတာဟာ အမျိုးသမီးအခွင့်အရေးနဲ့ လူ့အခွင့်အရေးတွေ ချိုးဖောက်ခံရတာလို့လည်း ဒေါ်ဘောက်ဂျာက ပြောပါတယ်။
ဒေါ်ဘောက်ဂျာဟာ ကချင်ပြည်နယ်မှာ လယ်ယာမြေ ပဋိပက္ခတွေနဲ့ ပတ်သက်ပြီး နစ်နာသူတွေဖက်က လိုက်လံကူညီပေးနေသူလို့လည်း သိရပါတယ်။
ပြန်လည်လွတ်မြောက်လာတဲ့ ဒေါ်ဘောက်ဂျာကို RFA သတင်းထောက် ကိုကျော်သူ ဆက်သွယ်မေးမြန်းထားတာ နားဆင်နိုင်ပါတယ်။