လက်ပံတောင်းတောင်စီမံကိန်း ဆန့်ကျင်ဆန္ဒပြသူတွေကို ဦးပိုင်ကုမ္ပဏီတရားစွဲ

• 
  2012-10-05

ပြီးခဲ့တဲ့ စက်တင်ဘာလ ၅ ရက်နေ့က မုံရွာ-ပုသိမ် လမ်းမကြီးနဲ့ ညောင်ပင်ကြီး- ပုလဲ လမ်းဆုံအနား မြန်မာဝမ်ပေါင်ကုမ္ပဏီ ရုံးခန်းနဲ့ မလှမ်းမကမ်းမှာ အခေါင်းပုံစံ ပြုလုပ်ပြီး မီးရှို့ ဆန္ဒပြတဲ့အပေါ် မြန်မာစစ်တပ်ပိုင် ဦးပိုင်ကုမ္ပဏီနဲ့ တရုတ် ဝမ်ပေါင်ကုမ္ပဏီတို့ကို နစ်နာစေရန် ကြံစည်မှုနဲ့ ဦးပိုင်ကုမ္ပဏီက အမှုဖွင့်တာလို့ သိရပါတယ်။

အမှုဖွင့်လိုက်ပေမယ့် သက်ဆိုင်ရာက တရားဝင် အကြောင်းမကြားသေးဘူးလို့ အမှုဖွင့်ခံရတဲ့ ၁၆ ဦးထဲမှာ ပါဝင်နေသူ နိုင်ငံရေးအကျဉ်းသားဟောင်း ကိုဟန်ဝင်းအောင်က RFA ကိုပြောပါတယ်။

သူတို့ကို ပုဒ်မ ၁၄၃၊ ၁၄၇၊ ၅ဝဝ တို့နဲ့ အမှုဖွင့်လိုက်တာလို့ ဆိုပါတယ်။ အမှု ဖွင့်ခံရတဲ့သူတွေထဲမှာ ကိုဟန်ဝင်းအောင်၊ ကိုအောင်စိုး၊ ဗကသများအဖွဲ့ချုပ် ဥက္ကဋ္ဌ ကိုကျော်ကိုကို၊ ကိုကောင်းဆက်၊ ကိုအာကာထက်မိုး၊ နိုင်ငံရေး အကျဉ်းသူဟောင်း မတင်မာဆွေ၊ ဒေသခံ မသွဲ့သွဲ့ဝင်း၊ ကိုအောင်ဇော်ဦးတို့ ပါဝင်တယ်လို့ သိရပါတယ်။