တစ်လအတွင်း အရပ်သား ၈၀ ကျော် သေဆုံးခဲ့ကြောင်း AAPP ထုတ်ပြန်

• RFA Burmese
  2024-07-31

စစ်ကောင်စီတပ်ရဲ့ တိုက်ခိုက်မှုကြောင့် ၂၀၂၄ ခုနှစ် ဇူလိုင်လ ၁ ရက်နေ့ကနေ ၃၁ ရက်နေ့အထိ တစ်လအတွင်း အရပ်သား ၈၄ ဦး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ဇူလိုင်လ ၃၁ ရက်နေ့မှာ ထုတ်ပြန်ပါတယ်။

နိုင်ငံတစ်ဝန်း အမျိုးသမီး ၂၄ ဦးနဲ့ အမျိုးသား ၆၀ ဦး စုစုးပေါင်း ၈၄ ဦးကို နာမည်နဲ့တကွ အတည်ပြုနိုင်ခဲ့ပြီး အသက် ၁၈ နှစ်အောက် ငါးဦးနဲ့ အသက် ၆၀ အထက် သတ်ဖြတ်ခံရသူ ရှစ်ဦးပါဝင်တယ်လို့ AAPP က ဆိုပါတယ်။

မန္တလေးတိုင်းနဲ့ စစ်ကိုင်းတိုင်းက သေဆုံးသူ ၁၅ ဦးစီနဲ့ အများဆုံးဖြစ်ပြီး မကွေးတိုင်းက ၁၂ ဦးနဲ့ ဒုတိယအများဆုံးဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။ စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် သေဆုံးတာ အများဆုံးဖြစ်ပြီး လေကြောင်းတိုက်ခိုက်မှုကြောင့် သေဆုံးတာ ဒုတိယအများဆုံးဖြစ်ပါတယ်။

ဒီထုတ်ပြန်ချက်နဲ့ ပတ်သက်လို့ စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကို RFA က ဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိပါဘူး။

စစ်တပ်အာဏာသိမ်းပြီးချိန်ကနေ ၂၀၂၄ ဇူလိုင်လ ၃၁ ရက်နေ့အထိ သုံးနှစ်ကျော်အတွင်း AAPP စာရင်းတွေအရ စစ်ကောင်စီကြောင့် အရပ်သား ငါးထောင်ကျော် (၅,၄၆၇) ဦးသေဆုံးခဲ့ရပြီး ဖမ်းဆီးခံရသူ ၂၇,၁၂၅ ကျော် ရှိပါတယ်။