ཨོསུ་ཀྲེར་ལི་ཡའི་ཝའ་གྷའ་གྲོང་ཁྱེར་གྱིས་རྒྱ་ནག་དང་སྤུན་སྲིང་གི་འབྲེལ་བ་གཅོད་རྒྱུ་ཡིན་ཟེར།

ཏོག་དབྱིབས་ནད་ཡམས་གསར་བ་དང་འབྲེལ་བའི་ཟུར་ཟའི་རི་མོ།

ད་རེས་ཏོག་དབྱིབས་ནད་ཡམས་གྱི་གོད་ཆགས་བྱུང་བ་ཚང་མ་རྒྱ་ནག་དམར་ཤོག་ཚོགས་པར་འགན་ཡོད་པ་ཨོསུ་ཀྲེར་ལི་ཡའི་(WaggaWagga)་གྲོང་སྡེ་ལས་ཁུངས་ཀྱིས་སྐྱོན་བརྗོད་བྱས་འདུག
ཨོསུ་ཀྲེར་ལི་ཡའི་(WaggaWagga)་གྲོང་སྡེ་ལས་ཁུངས་ཀྱིས་རྒྱ་ནག་གི་ཁོན་མེན་(Kuming)་གྲོང་ཁྱེར་དང་སྤུན་སྲིང་གི་འབྲེལ་བ་བཅད་པ་མ་ཟད། ད་རེས་ཏོག་དབྱིབས་ནད་ཡམས་ཁྱབ་གདལ་ལ་བརྟེན་ནས་མི་མང་པོ་འདས་གྲོངས་སུ་ཕྱིན་པ་དང་དཔལ་འབྱོར་གྱི་གྱོང་གུན་ཆེན་པོ་ཕོག་པའི་འགན་རྒྱ་ནག་དམར་ཤོག་ཚོགས་པར་ཡོད་པ་བརྗོད་འདུག
དེ་ཡང་གནས་ཚུལ་ལྟར་ན། ཨོསུ་ཀྲེར་ལི་ཡའི་(Australia)་གྲོང་ཁྱེར་ཆེ་གྲས་(Wagga Wagga)་ཡི་གྲོང་སྡེ་ལས་ཁུངས་ཀྱི་དཔོན་རིགས་རྣམས་ཀྱིས། འདི་ཚེས་༡༤་གཟའ་མིག་དམར་ཉིན། གྲོང་ཁྱེར་དེས་ཕྱི་ལོ་༡༩༨༨་ལོར་རྒྱ་ནག་གི་གྲོང་ཁྱེར་ཁོན་མེན་དང་སྤུན་གྲོགས་ཀྱི་འབྲེལ་བ་བཙུགས་པ་དེ་གཅོད་རྒྱུར་མང་མོས་འོས་ཤོག་འཕངས་འདུག གྲོང་སྡེ་ལྷན་ཚོགས་ཀྱི་འཐུས་མི་(Paul Funnell)་ལགས་ཀྱིས་རྫུན་བཤད་རྒྱུ་དང་གཡོ་སྒྱུ་འཁྲབ་རྒྱུ། སྦས་གསང་ལ་དགའ་བའི་རྒྱ་ནག་དམར་པོའི་གཞུང་འཛིན་གྱིས་ད་རེས་ཏོག་དབྱིབས་ནད་འབུ་གསར་བའི་ནད་ཡམས་ཁྱབ་གདལ་དུ་བཏང་བར་བརྟེན་ནས། འཛམ་གླིང་ཁྱོན་ཡོངས་སུ་མི་མང་པོ་འདས་གྲོངས་སུ་ཕྱིན་པ་དང་། དཔལ་འབྱོར་ལ་གྱོང་གུད་ཚབས་ཆེན་པོ་བཏང་ཡོད་སྐོར་གསུངས་པ་དང་། ཁོང་ཚོའི་གྲོང་སྡེ་ལྷན་ཁང་གིས་རྒྱ་ནག་དམར་པོའི་གཞུང་འཛིན་དེ་དང་འབྲེལ་བ་བྱ་རྒྱུ་མེད་སྐོར་ཡང་གསུངས་འདུག
དེའི་ཐད་ས་གནས་དེར་གནས་སྡོད་པ་(Wes Fang)་ཡིས། ཐག་གཅོད་དེ་ནི་ཞེད་སྣང་དང་དངངས་ཚབས་ཆེ་བའི་ཐག་གཅོད་གཅིག་ཡིན་ལུགས་དང་། དེ་ནི་མི་རིགས་དབྱེ་འབྱེད་བྱས་པ་ཞིག་ཡིན་ལུགས་སྐྱོན་བརྗོད་བྱས་བར། གྲོང་སྡེ་ལྷན་ཚོགས་ཀྱི་འཐུས་མི་(Paul Funnell)་ལགས་ཀྱིས་དེ་ནི་མི་རིགས་ཀྱི་སྐོར་མ་རེད་ལ་རྒྱ་མི་རིགས་ཀྱི་སྐོར་ལ་ཡང་མ་རེད། ང་ཚོས་རྒྱ་ནག་གཞུང་འཛིན་དམར་ཤོག་ཚོགས་པའི་བྱ་སྤྱོད་སྐོར་ལ་བཤད་བཞིན་ཡོད་ཅེས་ལན་འདེབས་གནང་མ་ཟད། ད་དུང་ད་རེས་ཀྱི་ཐག་གཅོད་དེས་ཨོསུ་ཀྲེར་ལི་ཡའི་ནང་གི་རྒྱ་མི་རིགས་ཚོར་ལྟ་ཚུལ་ཡག་ཏུ་འགྲོ་རྒྱུ་ཡིན་ལུགས་དང་། ང་ཚོས་རྒྱ་ནག་གི་ཁོན་མེན་གྲོང་ཁྱེར་དང་རྒྱ་ནག་དམར་པོའི་གཞུང་འཛིན་གཉིས་ཁག་སོ་སོར་དབྱེ་བ་ཕྱེ་དགོས་པ་དེ་གལ་ཆེན་པོ་ཡིན་ལུགས་ཀྱང་གསུངས་འདུག