ཨ་རིས་རྒྱ་ནག་གི་ལག་རྩལ་སྤྱི་གཉེར་ཁང་དག་ལ་མ་རྩ་འཛུགས་འཇོག་མི་ཆོག་པའི་བཀག་སྡོམ་བྱས་འདུག

དེ་ཡང་ཨ་རིའི་ནོར་སྲིད་ལྷན་ཁང་གིས་སྤྱི་ཟླ་༨ཚེས་༩ཉིན་བཀག་སྡོམ་སྤྱི་བསྒྲགས་ཤིག་སྤེལ་ཡོད་པའི་ནང་དུ། ཨ་རིའི་མ་རྩ་འཛུགས་མཁན་སྤྱི་གཉེར་ཁང་དག་གིས་རྒྱ་ནག་གི་ཚོར་བ་སྐྱེན་པའི་ལག་རྩལ་སྤྱི་གཉེར་ཁང་དག་ལ་མ་རྩ་འཛུགས་རྒྱུར་ཚད་བཀག་བཟོས་ཡོད་པ་མ་ཟད། དེ་མིན་གྱི་མ་རྩ་འཛུགས་པའི་རིགས་གཞན་དག་ཀྱང་ཨ་རིའི་གཞུང་ལ་ཡར་ཞུ་བྱེད་དགོས་པའི་ཆ་རྐྱེན་བཏོན་ཡོད་པ་རེད།
གོང་ཞུས་ཨ་རིའི་ནོར་སྲིད་ལྷན་ཁང་གིས་བསྒྲགས་པའི་བཀག་སྡོམ་བཀའ་རྒྱ་དེའི་ནང་། གལ་ཏེ། གནད་དོན་ཡོད་པའི་རྒྱལ་ཁབ་དང་དེ་དང་འབྲེལ་ཡོད་ཁག། ལྷག་པར་རྒྱ་ནག་ལྟ་བུའི་ཕྱིའི་རྒྱལ་ཁབ་ཀྱི་མངོན་ཐོན་ལག་རྩལ་ཡོད་པའི་རིགས་ལ་ཨ་རིའི་མ་འཛུགས་སྤྱི་གཉེར་ཁང་དག་གིས་མ་རྩ་འཛུགས་མི་ཆོག་པའི་བཀག་སྡོམ་བྱས་ཡོད་པ་དང་། ཨ་རིའི་ནོར་སྲིད་ལྷན་ཁང་གི་ཐག་གཅོད་དེ་ནི་ཨ་རིའི་སྲིད་འཛིན་འཇཱོ་སྦཡེ་ཌེན་(Joe Biden)་མཆོག་གིས་སྲིད་འཛིན་གྱི་བཀོད་རྒྱ་ལྟར་གཏན་འཁེལ་བྱས་པ་ཞིག་ཡིན་ཞིང་། དེ་ནི་མི་རབས་རྗེས་མའི་དམག་གི་ལས་དོན་གསར་གཏོད་གྱི་འགག་རྩའི་ལས་དོན་དང་ནུས་རྩལ་ལ་སྲུང་སྐྱོབ་བྱེད་པ་བརྒྱུད་ཨ་རིའི་རྒྱལ་ཁབ་ཀྱི་བདེ་འཇགས་ལ་སྲུང་སྐྱོབ་དང་། གཞན་ཨ་རིའི་རྒྱལ་ཁབ་ཀྱིས་རྒྱལ་ཁོངས་ལས་བརྒལ་བའི་མ་འཛུགས་ལ་ཁས་ལེན་བྱས་པའི་དམ་བཅའ་རྒྱུན་འཁྱོངས་བྱ་ཆེད་ཡིན་པ་ཡང་བཀོད་འདུག
དེའི་ཐད་ཨ་རིའི་སྤྱི་འཐུས་ཚོགས་པའི་གྲོས་ཚོགས་གོང་མའི་འཐུས་མི་(Senator Rubio)་ལགས་ཀྱིས་སྤྱི་བསྒྲགས་ཞིག་སྤེལ་བའི་ནང་། བཀའ་ཁྱབ་དེ་རིགས་ཨ་རིའི་གཞུང་འཛིན་གྱིས་སྔ་ས་ནས་སྤེལ་དགོས་པ་ཞིག་དང་། སྲིད་འཛིན་འཇཱོ་སྦཡེ་ཌེན་གཞུང་འཛིན་གྱིས་གཞི་ནས་ཨ་རིས་རྒྱ་ནག་ནང་མ་འཛུགས་ཐད་ཚབས་ཆེན་གྱི་ནོར་འཁྲུལ་ཡོད་པ་ངོས་འཛིན་བྱས་ཀྱང་། ད་དུང་བྱེད་ཐབས་དེ་ལས་ལྷག་པ་ཕྱི་ཟླ་༩པའི་ནང་ཁོང་གིས་ཁྲིམས་འཆར་ཞིག་འདོན་རྒྱུ་ཡིན་པས་དེས་ཨ་རིའི་དཔལ་འབྱོར་དང་བདེ་དོན་ཐད་སྲུང་སྐྱོབ་ཐུབ་ངེས་རེད་ཅེས་བརྗོད་འདུག
ཡང་ཨ་རིའི་གྲོས་ཚོགས་ཀྱི་རྒྱ་ནག་ཐད་ཀྱི་ལས་དོན་ཚོགས་ཆུང་གི་ཚོགས་གཙོ་(Gallagher)་ལགས་ཀྱིས། ཨ་རིའི་སྲིད་འཛིན་གྱིས་རྒྱ་ནག་ནང་ཨ་རིས་མ་འཛུགས་ཐད་བཀག་སྡོམ་གྱི་བཀའ་ཁྱབ་དེ་གོམ་པ་ཆུང་ཡང་བཟང་ཕྱོགས་ཀྱི་ཁ་ཕྱོགས་སུ་ཕྱིན་པ་རེད། འོན་ཀྱང་། ད་དུང་དེས་འགྲིག་ཐབས་མེད་པ་ཞིག་རེད། གྲོས་ཚོགས་ཀྱིས་ངོས་ནས་རྒྱ་ནག་དམག་ཤོར་ཚོགས་པས་དམག་དོན་རྒྱ་སྐྱེད་དང་དམར་ཤོག་ཚོགས་པ་དང་འབྲེལ་བའི་ཁེ་གཉེར་ལས་ཁང་དང་ཤིན་ཅང་ཐེ་པའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་སོགས་འགོག་ཐབས་དགོས་པ་བརྗོད་འདུག
དེའི་ཐད་ཚེས་༡༠ཉིན་རྒྱ་ནག་གི་ཚོང་དོན་ལས་ཁུངས་ཀྱིས། ཨ་རིས་ཚོར་བ་སྐྱེན་པའི་ལག་རྩལ་རིག་ལ་མ་རྩ་འཛུགས་འཇོག་བྱེད་རྒྱུ་མིན་པའི་ཐག་གཅོད་དེར་བློ་ཚབས་ཆེན་པོ་ཡོད་ལུགས་བརྗོད་ནས། ཨ་རིས་ཚོང་རྭའི་དཔལ་འབྱོར་གྱི་ཆོས་ཉིད་དང་། འགྲན་རྩོད་དྲང་བཞག་བྱེད་པའི་རྩ་དོན་ལ་གུས་བརྩི་བྱེད་དགོས་ལུགས་བརྗོད་འདུག

གསར་འགོད་པ། བསོད་ནམས་ལྷ་མོ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།