ཨ་རིའི་གྲོས་ཚོགས་འོག་མའི་ནང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་གི་ཁྲིམས་འཆར་གཏན་འབེབས་གནང་བ།

ཕྱི་ཟླ་ ༡༢ ཚེས་ ༣ ཉིན་ཨ་རིའི་གྲོས་ཚོགས་འོག་མའི་ནང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་གི་ཁྲིམས་འཆར་ལ་གྲོས་ཚོགས་འཐུས་མིའི་མང་མོས་ཐོག་ནས་གཏན་འབེབས་གནང་ཞིང་།  དེ་ཡང་ཨ་རིའི་གྲོས་ཚོགས་འོག་མའི་ནང་འཐུས་མི་ ༤༠༧ གྱིས་རྒྱབ་སྐྱོར་དང་འཐུས་མི་གཅིག་གིས་ངོ་རྒོལ་གྱི་འོས་ཤོག་འཕེན་པའི་ཐོག་ནས་ ༢༠༡༩ ལོའི་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་སྲིད་བྱུས་ཁྲིམས་འཆར་ཆེས་མང་མོས་ཀྱི་ཐོག་ནས་གཏན་འབེབས་བྱུང་ཡོད་ཅིང་།   ཁྲིམས་འཆར་དེའི་ནང་ཨ་རི་གཞུང་གིས་ཤིན་ཅང་ངམ། ཤར་ཏུར་ཀི་སི་ཐན་ནང་ཡུ་གུར་མི་རིགས་ཚོའི་ཐོག་རྡུང་རྡེག་དང་གནར་གཅོད་དང་འཇུ་བཟུང་བཀག་ཉར་བྱེད་བཞིན་པའི་སྲིད་བྱུས་ལ་སྐྱོན་བརྗོད་བྱས་ཡོད་པ་མ་ཟད།  སྲིད་བྱུས་དེ་རིགས་ཐག་གཅོད་བྱེད་མཁན་དཔོན་རིགས་ཚོར་ཉེས་ཆད་འགེལ་རྒྱུ་སོགས་ཀྱི་ནང་དོན་བཀོད་ཡོད་པ་རེད།  
ཁྲིམས་ཡིག་འདི་ནི་ཕྱི་ཟླ་ ༩ པའི་ནང་ཨ་རིའི་གྲོས་ཚོགས་གོང་འོག་གཉིས་ནས་གྲོས་མཐུན་གཏན་འབེབས་བྱུང་བའི་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་ཁྲིམས་འཆར་ཞེས་པ་དེའི་ཁ་སྣོན་ཁྲིམས་ཡིག་ཅིག་ཆགས་ཀྱི་ཡོད་ཅིང་།  དེའི་ནང་ཨ་རི་གཞུང་གིས་ཤིན་ཅང་ངམ། ཤར་ཏུར་ཀི་སི་ཐན་གྱི་གནད་དོན་ཐོག་དམིགས་བསལ་ལས་དོན་སྐུ་ཚབ་ཤིག་བསྐོ་བཞག་གནང་རྒྱུ་སོགས་བཀོད་ཡོད་འདུག