བཀྲ་ཤིས་དབང་ཕྱུག་ལགས་གློད་བཀྲོལ་ཡོང་ཆེད་ལས་འགུལ།

བཀྲིས་དབང་ཕྱུག་ལགས་གློད་བཀྲོལ་ཡོང་རྒྱུར་རྒྱལ་སྤྱིའི་ཉེས་ཡང་ཚོགས་པས་ལས་འགུལ་སྤེལ་འགོ་ཚུགས་གནང་འདུག།
རྒྱ་ནག་གི་དཔོན་རིགས་ཚོས་འདི་ལོ་ཕྱི་ཟླ་༡པོའི་ཚེས་༢༧ཉིན། མཚོ་སྔོན་ཞིང་ཆེན་ཁུལ་ནས་བོད་པའི་སྐད་ཡིག་སློབ་སྤེལ་དོན་གཉེར་བ་བཀྲིས་དབང་ཕྱུག་ལགས་འཛིན་བཟུང་བྱས་རྗེས། ཁོང་གི་ནང་མི་ཚོས་ཉེ་ལམ་ཕྱི་ཟླ་༣ཚེས་༢༤བར་ཁོང་ག་བར་བཀག་ཉར་བྱས་ཡོད་མེད་སོགས་ཀྱི་སྐོར་ལ་གནས་ཚུལ་ཤེས་རྟོགས་མེད་པ་རེད།     
རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བའི་ནང་། བཀྲིས་དབང་ཕྱུགས་ལགས་ཀྱི་ནང་མིར་བཀྲིས་ལགས་ནས་ཁ་བྲལ་གྱི་བྱ་སྤྱོད་སྤེལ་བའི་བརྡ་ཁྱབ་སྤྲད་འདུག།
བཀྲིས་དབང་ཕྱུག་ལགས་ནི་བོད་མི་མང་བ་ཡོད་སའི་བོད་པའི་ས་ཁུལ་གྱི་སློབ་གྲྭ་ཁག་ནང་བོད་པའི་སྐད་ཡིག་གཙོ་བོ་སློབ་ཁྲིད་བྱེད་དགོས་ཞེས་དོན་གཉེར་ཆེན་པོ་གནང་མཁན་ཞིག་ཡིན་པ་དང་། ཁོང་གི་སྤྱི་ཚོགས་དྲ་ལམ་ཐོག་བོད་པའི་ཕྲུ་གུ་མང་པོ་ཞིག་སོ་སོའི་ཕ་སྐད་གཙང་མ་རྒྱབ་ཐུབ་ཀྱི་མེད་པར་བློ་འཚབ་གསལ་བཏོན་དང་སྦྲགས་བོད་པའི་རིག་གཞུང་རིམ་པས་རྩ་བརླགས་ཏུ་འགྲོ་རྒྱུའི་ཉེན་ཁ་ཡོད་པའི་གནས་ཚུལ་བྲིས་གནང་ཡོད་པ་དང་།
༢༠༡༥ལོར་ཨ་རིའི་ནིའུ་ཡོརཀ་དུས་བབ་གསར་ཤོག་གིས་ཁོང་གི་སྐོར་རྩོམ་ཡིག་ཅིག་སྤེལ་ཡོད་པ་དང་། ཁོང་གི་སྐོར་དངོས་འབྱུང་གློག་བརྙན་ཐུང་ཐུང་ཞིག་ཀྱང་བཟོས་ཡོད་པ་རེད།   བརྙན་ཐུང་དེའི་ནང་བཀྲིས་དབང་ཕྱུགས་ལགས་ཀྱིས་བོད་པའི་སློབ་གྲྭ་ཁག་ནང་བོད་ཡིག་སློབ་འཁྲིད་བྱེད་ཀྱི་མེད་པའི་དོན་ལ་ས་གནས་རྒྱ་མིའི་དཔོན་རིགས་ཚོར་ཁ་མཆུ་འཛུགས་རྒྱུའི་དོན་དུ་པེ་ཅིང་དུ་ཕེབས་ཡོད་ནའང་ཁོང་གི་གྱོད་གཏུགས་ལ་རོགས་པ་དང་། ཁ་ཡ་བྱེད་མཁན་ཁྲིམས་རྩོད་པ་ཅིག་ཀྱང་བྱུང་མེད་པའི་དཀའ་ངལ་གསལ་བཏོན་བྱས་འདུག།
ད་ཆ་བཀྲིས་དབང་ཕྱུག་ལགས་གློད་བཀྲོལ་ཡོང་རྒྱུར་འབྲེལ་ཡོད་རྒྱ་ནག་གི་དཔོན་རིགས་ཚོར་ཞུ་སྐུལ་གྱི་སྙན་ཞུ་གཏོང་རྒྱུའི་ལས་འགུལ་ཞིག་རྒྱལ་སྤྱིའི་ཉེས་ཡང་ཚོགས་པས་འགོ་ཚུགས་གནང་འདུག།

གསར་འགོད་པ་རིག་ལྡན་སྒྲོལ་མ།