རྒྱལ་ཚོགས་ཀྱི་དྲུང་ཆེས་རྒྱ་ནག་ལ་སྐྱོན་བརྗོད་མི་བྱེད་པའི་དོན།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཡིས་དེང་སྐབས་ཨ་རབ་ཡུལ་ནང་གི་གནས་སྟངས་སོགས་ཀྱི་སྐོར་ལ་བཀའ་མོལ་མང་པོ་གནང་ཡོད་ཀྱང་ ཉེ་བའི་ཆར་རྒྱ་ནག་ནང་དམངས་གཙོ་དོན་གཉེར་བ་དང་ ཤེས་ལྡན་མི་སྣ་མང་པོ་འཛིན་བཟུང་བྱེད་བཞིན་པའི་གནས་སྟངས་ཐོག་སྐྱོན་བརྗོད་ཀྱི་བཀའ་མོལ་གང་ཡང་གནང་གི་མེད་པ་ཕ་རན་སི་གསར་འགྱུར་བརྒྱུད་ལམ་གྱིས་སྤེལ་བའི་གནས་ཚུལ་ནང་འཁོད་འདུག གནས་ཚུལ་དེའི་ནང་མུ་མཐུད་བཀོད་པར་ འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་གྱིས་རྒྱ་ནག་གཞུང་དུ་དམངས་གཙོ་དོན་གཉེར་བ་དང་ ཤེས་ལྡན་མི་སྣ་མང་པོ་ཞིག་ཉེ་དུས་འཛིན་བཟུང་བཀག་སྡོམ་བྱེད་བཞིན་པའི་གནད་དོན་ཐོག་སྐྱོན་བརྗོད་གནང་གི་མེད་པའི་རྒྱུ་མཚན་ནི་ ཁོང་གིས་མུ་མཐུད་མ་འོངས་ལོ་ལྔའི་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་ཐུགས་འགན་བཞེས་འདོད་ཡོད་པའི་རྣམ་འགྱུར་བཏོན་ཡོད་པ་དང་ དེ་ལྟར་གནང་ཐུབ་རྒྱུར་འཛམ་གླིང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ཚོགས་བཞུགས་ཡུལ་གྲུ་ལྔ་པོས་མོས་མཐུན་དགོས་ཀྱི་ཡོད་པར་བརྟེན་ ཚོགས་བཞུགས་ཡུལ་གྲུ་ལྔ་པོའི་ནང་དབྱིན་ཇི་དང་ ཕ་རན་སི་ ར་ཤི་ཡ་ ཨ་རི་ རྒྱ་ནག་བཅས་ཡིན་ཞིང་ དེར་བརྟེན་རྒྱ་ནག་གི་རྒྱབ་སྐྱོར་ཐོབ་རྒྱུ་དེ་གལ་འགངས་ཆེན་པོ་ཡིན་སྟབས་ རྒྱ་ནག་ནང་དེང་སྐབས་གཞུང་ཕྱོགས་ཀྱི་བྱ་སྤྱོད་ལ་སྐྱོན་བརྗོད་གནང་གི་མེད་པ་འཁོད་འདུག རྒྱ་ནག་གཞུང་གིས་སྒྱུ་རྩལ་བ་ཨེ་ལྦེ་ལྦེ་འཛིན་བཟུང་དང་ དེ་མིན་དམངས་གཙོ་དོན་གཉེར་བ་དང་ཤེས་ལྡན་མི་སྣ་མང་པོ་འཛིན་བཟུང་དོ་དམ་བྱེད་བཞིན་པའི་གནད་དོན་ཐོག་ཨ་རི་དང་ཡོ་རོབ་མཐུན་ཕྱོགས་ཡུལ་གྲུ་སོགས་འཛམ་གླིང་ཡུལ་གྲུ་མང་པོས་སེམས་འཚབ་ཡོད་པའི་རྣམ་འགྱུར་དང་འབྲེལ་རྒྱ་ནག་གཞུང་གིས་ཁོང་ཚོ་གློད་བཀྲོལ་དགོས་པའི་སྐུལ་མ་ཡང་གནང་ཡོད་པར་བརྟེན་ འགྲོ་བ་མིའི་ཐོབ་ཐང་ཚོགས་པ་ཁག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་ནས་གནོན་ཤུགས་ལ་མ་ལྟོས་པར་གནད་དོན་དེའི་ཐོག་རང་ཕྱོགས་ཀྱི་རྣམ་འགྱུར་བཏོན་དགོས་རྒྱུ་དེ་གལ་འགངས་ཆེན་པོ་ཡིན་པའི་འབོད་སྐུལ་གནང་གི་ཡོད་པ་རེད་