གྲྭ་བ་གཉིས་གསང་བའི་ཐོག་གློད་བཀྲོལ།

༄༅༎བོད་ཁམས་དཀར་མཛེས་སུ་བོད་མི་ཚོས་ཆབ་སྲིད་བཙོན་པ་རྣམས་དུས་བཀག་བཙོན་འཇུག་གི་ལོ་ཚད་ཚང་སྟེ་གློད་བཀྲོལ་བཏང་སྐབས་ཕེབས་བསུ་ཞུ་སྲོལ་ཡོད་པར་བརྟེན། རྒྱ་གཞུང་གིས་ཟླ་འདིའི་ཕྱི་ཚེས་༡༢ཉིན། དཀར་མཛེས་དགོན་པའི་གྲྭ་བློ་བཟང་བསྟན་པ་དང་བློ་བཟང་ཆོས་ལྡན་གཉིས་ལོ་ལྔའི་དུས་བཀག་བཙོན་འཇུག་ཚང་སྟེ་གློད་བཀྲོལ་བཏང་སྐབས། ས་གནས་བོད་མིའི་ངོས་ནས་སླར་ཡང་ཕེབས་བསུ་ཞུ་སྲིད་པའི་དོགས་གཞིའི་འོག་གསང་བའི་ཐོག་ནས་གློད་བཀྲོལ་བཏང་ཡོད་པའི་སྐོར་བོད་ནས་གནས་ཚུལ་མཁོ་སྤྲོད་པས་འགྲེལ་བརྗོད་གནང་འདུག།
རྒྱ་གཞུང་གིས་གོང་གི་དགེ་འདུན་པ་གཉིས་འཛིན་བཟུང་བཙོན་འཇུག་བྱེད་དགོས་པའི་རྒྱུ་མཚན་ནི། ༢༠༠༨ལོའི་ཕྱི་ཟླ ༥ པའི་ནང་ཁོང་གཉིས་ཀྱིས་བོད་ཁམས་དཀར་མཛེས་ཁྲོམ་གཞུང་དུ་བོད་རང་བཙན་སྐད་འབོད་བྱེད་སྐབས་རྒྱ་གཞུང་ཉེན་རྟོག་པས་ཉེས་རྡུང་ཚད་མེད་བཏང་སྟེ་འཛིན་བཟུང་བྱས་པ་ནས་བཟུང་ཟླ་བ་མང་པོའི་རིང་ཉེས་རྡུང་དང་འདྲི་རྩད་ནན་པོ་བྱས་ཏེ་མཐར་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་མི་མང་ཁྲིམས་ཁང་ནས་དུས་བཀག་བཙོན་འཇུག་ལོ་ལྔའི་ཁྲིམས་ཐག་བཅད་ཡོད་པ་གནས་ཚུལ་མཁོ་སྤྲོད་པས་འདི་ག་རླུང་འཕྲིན་ཁང་གི་གསར་འགོད་པ་དཀར་མཛེས་ནོར་བུ་དགྲ་འདུལ་ལགས་སུ་གནས་ཚུལ་ངོ་སྤྲོད་གནང་འདུག།