ཡུལ་སྐོར་བ་མང་པོ་གནམ་བདེ་སྒོ་མོ་ཆེ་ཐང་ཆེན་དུ་ཡོང་བཞིན་པ།

༄༅༎དེ་རིང་རེས་གཟའ་ཉི་མའི་ཉིན་རྒྱ་ནག་གཞུང་འབྲེལ་ཤིང་ཧཱ་གསར་ཤོག་ཐོག་ལ་ཕྱི་ཟླ་བཅུ་པའི་ཚེས་གཅིག་ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ཏེ་མི་ལོ་དྲུག་བཅུ་དུས་དྲན་གྱི་མཛད་སྒོ་ཚོགས་པའི་རྗེས་སུ་པེ་ཅིང་གནམ་བདེ་སྒོ་མོ་ཆེ་ཐང་ཆེན་དུ་རྒྱ་ནག་གི་ས་ཁུལ་ཕྱོགས་ཡོངས་ནས་ཡུལ་སྐོར་སྤྲོ་འཆམ་པ་བལྟ་སྐོར་དུ་ཡོང་མཁན་མང་པོ་ཡོད་པའི་གནས་ཚུལ་སྤེལ་ཡོད་པ་རེད།

དེ་ཡང་རྒྱ་ནག་གཞུང་གིས་ཕྱི་ཟླ་བཅུ་པའི་ཚེས་གཅིག་ཉིན་རྒྱལ་སྟོན་དུས་ཆེན་མཛད་སྒོའི་ལས་དོན་གྲ་སྒྲིག་ལྡན་པ་དང་ལམ་ལྷོང་ཡོང་རྒྱུར་དམིགས་ཏེ་དུས་ཆེན་གྱི་སྔ་རོལ་ནས་མཛད་སྒོ་ཚོགས་ཡུལ་གྱི་པེ་ཅིང་གནམ་བདེ་སྒོ་མོ་ཆེའི་ཐང་ཆེན་གྱི་ཁུལ་དུ་དམ་བསྒྲགས་ཆེན་པོ་བྱས་ཡོད་པ་མ་ཟད་རེས་གཟའ་ཕུར་བུའི་ཉིན་མཛད་སྒོ་དངོས་སུ་ཚོགས་པའི་རྗེས་རེས་གཟའ་པ་སངས་ཉིན་པེ་ཅིང་གི་ཐང་ཆེན་ཐོག་མི་གྲངས་འགྲོ་བསྐྱོད་ཀྱི་སྒོ་མོ་བསྐྱར་ཏུ་ཕྱེ་ཡོད་ཅིང་དེ་རིང་པེ་ཅིང་ས་གནས་ཀྱི་ཡུལ་སྐོར་སྤྲོ་འཆམ་དཔོན་རིགས་ནས་བཤད་པར་གཞིགས་ན་རེས་གཟའ་པ་སངས་དང་སྤེན་པ་ཉིན་གཉིས་ལ་ཐང་ཆེན་དེའི་ཐོག་ལ་མཛད་སྒོ་མཇུག་སྒྲིལ་བའི་ཤུལ་དུ་བལྟ་བར་ཡོང་མཁན་ཉིན་རེར་ཡུལ་སྐོར་སྤྲོ་འཆམ་པ་ས་ཡ་གཅིག་དང་ཕྱེད་ཀ་ལྷག་བྱུང་ཡོད་པ་དང་རྒྱ་ཁྱོན་མི་ཊར་གྲུ་བཞི་མ་བཞི་འབུམ་ལྔ་ཁྲི་བྱས་པའི་ཐང་ཆེན་དེའི་ཐོག་ལ་རྒྱལ་སྟོན་དུས་ཆེན་གྱི་མཛད་སྒོའི་རུ་སྒྲིག་ནང་གྲུ་འཛིངས་དྲུག་བཅུ་འགྲེམས་སྟོན་བྱས་པ་དེ་རྣམས་ཐང་ཆེན་ཐོག་མུ་མཐུད་འགྲེམས་འཇོག་བྱས་ཡོད་པ་དེ་དག་བལྟ་བར་ཡོང་མཁན་མང་པོ་ཡོད་པའི་སྐོར་བཤད་ཡོད་པ་རེད། རྒྱ་ནག་གི་ཧྲང་ཧེ་གྲོང་ཁྱེར་ནས་བལྟ་སྐོར་བ་ཞིག་གིས་ཤིང་ཧཱ་གསར་འགོད་པར་ཁོང་དེ་སྔོན་པེ་ཅིང་གནམ་བདེ་སྒོ་མོ་ཆེའི་ཐང་ཆེན་ཐོག་བལྟ་སྐོར་དུ་ཐེངས་མང་པོ་ཡོང་མྱོང་མཁན་ཞིག་ཡིན་ནའང་ད་རེས་ཡོང་དགོས་དོན་ནི་གཙོ་བོ་གྲུ་འཛིངས་དེ་དག་ལ་བལྟ་བར་ཡོང་ཡོད་པ་འགྲེལ་བརྗོད་བྱས་ཡོད་ཅིང་པེ་ཅིང་གྲོང་ཁྱེར་གྱི་ཡུལ་སྐོར་སྤྲོ་འཆམ་དཔོན་རིགས་ནས་རེས་གཟའ་པ་སངས་ཀྱི་ཕྱི་དྲོའི་ཚོུད་གཉིས་པ་ནས་རེས་གཟའ་སྤེན་པའི་ཕྱི་དྲོའི་ཚོུད་གཉིས་བ་བར་ལ་པེ་ཅིང་གི་ཐང་ཆེན་ཐོག་ཡུལ་སྐོར་སྤྲོ་འཆམ་པ་ས་ཡ་གཅིག་དང་གྲངས་ཉུང་ཉི་ཤུ་རྩ་ལྔ་བལྟ་སྐོར་དུ་སླེབས་ཡོད་པའི་སྡོམས་རྩིས་བཏོན་ཡོད་པ་རེད།