བོད་མི་ཞི་བའི་གོམ་བགྲོད་པ་རྣམས་ཝ་ར་ན་སི་ནང་འབྱོར་འདུག

༄༅༎བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གར་གྱི་རྒྱལ་ས་ལྡི་ལི་ནས་ ནང་པའི་གནས་མཆོག་རྡོ་རྗེ་གདན་གྱི་བར་ཞི་བའི་གོམ་བགྲོད་པ་རྣམས་ ཕྱི་ཚེས་༡༦ ཉིན་ཝ་ར་ན་སི་ནང་འབྱོར་ཡོད་སྐོར་ བོད་ཀྱི་གཞོན་ནུ་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་གནང་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཕྱི་འབྲེལ་འགན་འཛིན་སྤེན་པ་ཚེ་རིང་ལགས་ཀྱིས་ གོམ་བགྲོད་པ་རྣམས་ནས་ཝ་ར་ན་སི་ནང་ཉིན་གྲངས་གཉིས་བཞུགས་ཡུན་གྱི་ བོད་ནང་དྲག་གནོན་ཕོག་པའི་བོད་མི་རྣམས་ཀྱི་ཆེད་མཆོད་འབུལ་དང་ བོད་དོན་དྲིལ་བསྒྲགས་ཀྱི་ལས་འགུལ་རིམ་པ་ཞིག་སྤེལ་རྒྱུ་བྱུང་སྐོར་ངོ་སྤྲོད་གནང་གི་ཡོད་པ་རེད་

བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཁག་ཅིག་གི་འགོ་ཁྲིད་འོག བོད་མི་གོམ་བགྲོད་པ་༡༠༦ ཙམ་དང་གོམ་བགྲོད་པ་རྣམས་ལ་ཕྱག་རོགས་ཞུ་མཁན་ཞབས་ཞུ་བ་མི་གྲངས་༣༠ བཅས་ནས་ཕྱི་ཟླ་༤ པའི་ཚེས་༡༧ ནས་འགོ་བཙུགས་ རྒྱ་ནག་གཞུང་གིས་བོད་ནང་བོད་མིའི་ཞི་བའི་སྒེར་ལངས་ལ་དྲག་གནོན་བྱས་པའི་གནད་དོན་དྲིལ་བསྒྲགས་དང་ རྒྱ་ནག་ནང་ཚུགས་རྒྱུའི་ཨོ་ལིམ་ཕིག་གི་རྩེད་འགྲན་ལ་ངོ་རྒོལ་ཞུ་ཆེད་གོམ་བགྲོད་གནང་སྟེ་ཡོད་པ་དང་ གོམ་བགྲོད་པ་རྣམས་ནས་མཐར་གནས་མཆོག་རྡོ་རྗེ་གནད་དུ་འབྱོར་མཚམས་ ཉེ་ལམ་བོད་ནང་རང་དབང་སྒེར་ལངས་ཀྱི་ལས་འགུལ་ནང་སྐུ་སྲོག་ཤོར་བ་དང་རྨས་སྐྱོན་ཕོག་པའི་བོད་རིགས་དཔའ་བོ་དང་དཔའ་མོ་རྣམས་ཀྱི་ཆེད་མཆོད་འབུལ་རྒྱ་ཆེ་ཞིག་གནང་གི་ཡོད་སྐོར་གསུངས་ཀྱི་ཡོད་པ་རེད་ ཁོང་གོམ་བགྲོད་པ་རྣམས་ད་རང་སྔ་དྲོ་ཝ་ར་ན་སི་ནས་ཕེབས་ཐོན་གྱིས་དེ་རིང་དགོང་དྲོ་ཨ་ལམ་པུར་ཞེས་པའི་ས་ཁུལ་ཞིག་ལ་འབྱོར་ཡོད་འདུག་