བོད་མདོ་སྨད་ཁུལ་དུ་བོད་རིགས་སློབ་ཕྲུག་ཚོས་ངོ་རྒོལ།

༄༅༎རྒྱ་ནག་གི་རྒྱལ་ས་པེ་ཅིང་ནས་རོའུ་ཀྲར་དང་ཨེ་ཨེཕ་པི་གསར་སྤེལ་ཚན་པས་ཁེ་ས་སྤེལ་བའི་གནས་ཚུལ་ལྟར་ན་མདོ་སྨད་ཨ་མདོ་བླ་བྲང་བསང་ཆུ་རྫོང་གི་བོད་ཡིག་སློབ་གྲྭ་འབྲིང་བའི་སློབ་ཕྲུག་བརྒྱ་བསྐོར་ཞིག་གིས་རང་གི་ལག་ཏུ་འཕྲེད་དར་ཁྱེར་ཏེ་གཟའ་པ་སངས་ཉིན་གྱི་སྔ་དྲོ་སློབ་གྲྭ་དེ་ནས་ཐོན་པའི་སློབ་མ་རྣམས་མཐོ་སློབ་ནང་ཚུད་ཐབས་ཀྱི་ཡིག་རྒྱུགས་གཏོང་བར་འགྲོ་སྐབས་ས་གནས་ཀྱི་བོད་རིགས་ལས་རྒྱ་རིགས་སློབ་མ་མང་བ་བསྡུ་ལེན་བྱེད་ཀྱི་ཡོད་པ་སོགས་ཤེས་ཡོན་གྱི་གནད་དོན་ཐད་མི་རིགས་དབྱེ་འབྱེད་བྱེད་ཀྱི་འདུག་ཅེས་རྒྱ་ནག་གཞུང་ལ་ཞུམ་པ་མེད་པའམ་བློ་སྟོབས་ལྡན་པའི་ངང་སྐད་འབོད་རྒྱབ་པ་དང་ས་གནས་ཀྱི་དཔོན་ཚང་སྲང་ལམ་ནས་བླ་བྲག་བཀྲིས་འཁྱིལ་གྱི་དགོན་པའི་བར་གོམ་བགྲོད་རྒྱབ་སྟེ་ཞི་བའི་ངོ་རྒོལ་ཞིག་བརྩམས་ཡོད་པ་རེད། ཡིན་ནའས་གནས་ཀྱི་ཉེན་རྟོག་མི་སྣས་སློབ་ཕྲུག་གི་ངོ་རྒོལ་དེ་བཞིན་ལམ་སེང་བཀག་འགོག་བྱས་ཡོད་པ་རེད། ཀན་སུ་ཞིང་ཆེན་ནང་གི་མགྲོན་ཁང་བདག་པོ་ཞིག་གིས་ཨེ་ཨེཕ་པིའི་གསར་འགོད་པར་དཔང་པོའི་ཚུལ་དུ་བརྗོད་གསལ་ལྟར་ན་གཟའ་སྤེན་པའི་ཉིན་སློབ་ཕྲུག་ཚོས་ཞི་བའི་ངོ་རྒོལ་སྤེལ་སྐབས་ཉེན་རྟོག་མི་སྣས་སློབ་ཕྲུག་འཛིན་བཟུང་བྱས་པ་དང་ཉེན་རྟོག་མི་སྣ་དང་སློབ་ཕྲུག་དབར་འཁྲུག་ཟིང་སོགས་ཤོར་མེད་པ་རེད། སྐབས་དེར་སློབ་ཕྲུག་འགའ་ཞིག་གིས་ང་ཚོར་རང་དབང་དགོས་ཡོད་ལ་ཞི་བདེ་དགོས།༸གོང་ས་༸སྐྱབས་མགོན་ཆེན་པོ་མཆོག་བོད་དུ་ཕྱིར་ཕེབས་གནང་བཅུག་དགོས་སོགས་དགོས་འདུན་གྱི་ཚུལ་དུ་སྐད་འབོད་ཡང་རྒྱབ་ཡོད་པ་རེད༎