དྲང་བདེན་ཐག་གཅོད་ཆེད་ཞུ་གཏུགས་གོམ་བགྲོད་གནང་འདུག

ཀླུ་ཆུ་རྫོང་གི་སློབ་ཆེན་མཐར་ཕྱིན་སློབ་མ་དང་ཕ་མ་ཚོས་ཞུ་གཏུགས་ངོ་རྒོལ་ལས་འགུལ་ལ་ཐག་གཅོད་གང་ཡང་མ་བྱུང་བར་བརྟེན་ཞི་བའི་གོམ་བགྲོད་གནང་སྐབས། ༢༠༡༥།༡།༨

ཀླུ་ཆུ་རྫོང་གི་སློབ་ཆེན་མཐར་ཕྱིན་སློབ་མ་དང་ཕ་མ་ཚོས་ཞུ་གཏུགས་ངོ་རྒོལ་ལས་འགུལ་ལ་ཐག་གཅོད་གང་ཡང་མ་བྱུང་བར་བརྟེན་ཞི་བའི་གོམ་བགྲོད་བྱས་འདུག
དེ་ཡང་བོད་ནས་འདི་ག་རླུང་འཕྲིན་ཁང་ལ་གནས་ཚུལ་འབྱོར་དོན། མདོ་ལྷོ་ཀླུ་ཆུ་རྫོང་ཁོངས་ཀྱི་སློབ་ཆེན་མཐར་ཕྱིན་སློབ་མ་དང་། ཁྱིམ་བདག་ཕ་མ་བརྒྱ་ཕྲག་བརྒལ་བས་རྫོང་སྲིད་གཞུང་ནང་ཞུ་འབོད་ངོ་རྒོལ་གནང་ནས་ད་བར་ཉིན་གྲངས་༡༣ཕྱིན་ཡོད་ཀྱང་། ད་དུང་ཡང་དྲང་བདེན་གྱི་ཐག་གཅོད་གང་ཡང་མ་བྱུང་བར་བརྟེན་ཚེས་༨ཉིན་ཁོང་ཚོ་མུ་མཐུད་རྫོང་སྲིད་གཞུང་གི་ལས་ཁུངས་ནང་འཛོམས་ནས་ཞུ་འབོད་ངོ་རྒོལ་བྱས་ཡོད་པ་དང་། ས་གནས་བོད་མིས་བརྗོད་དོན། གནད་དོན་ཇེ་ཆེ་ལ་འགྲོ་བར་དོགས་ནས་ཉིན་དེའི་དགོང་མོར་རྫོང་དམར་ཤོག་དྲུང་ཆེ་ལཱན་མེན་ཀང་དང་རྫོང་དཔོན་ཡཱང་ཡོན་ཧཱ་སོགས་ཡོང་ནས་ཁོང་ཚོའི་དགོས་འདུན་ལ་ཉན་ཁུལ་བྱས་ཡོད་ཀྱང་ཐག་གཅོད་གསལ་བོ་གང་ཡང་མ་བྱུང་བ་ངོ་སྤྲོད་བྱས་སོང་། དེ་ལྟར་སྤྱི་ཚེས་༨ཉིན་གྱི་དགོང་མོ་ཁོང་ཚོས་རང་ཁྱིམ་རང་སྐྱོང་། ཁྲིམས་འགལ་གྱིས་རྒྱུག་ཤོག་བཙོང་བར་དྲང་བདེན་ཐག་གཅོད་དགོས་ཞེས་འཁོད་པའི་འཕྲེད་དར་དང་མཉམ་ཀླུ་ཆུ་རྫོང་ནས་ཀན་ལྷོ་ཁུལ་བར་ཞུ་གཏུགས་གོམ་བགྲོད་བྱས་ནས་བསྐྱོད་ཡོད་པ་དང་། ལམ་ཐག་སྤྱི་ལེ་༡༥ཙམ་གྱི་སར་འབྱོར་སྐབས་རྫོང་གི་ཉེན་རྟོག་མི་སྣ་དང་། འབྲེལ་ཡོད་ཚན་པའི་ལས་བྱེད་མི་སྣ་ཡོང་ནས་རིམ་པས་ཞིབ་འཇུག་བྱེད་རྒྱུ་ཡིན་ཚུལ་སོགས་ཁ་ཏ་སློབ་གསོ་བྱེད་ཞོར་གོམ་བགྲོད་མཚམས་འཇོག་བྱེད་དུ་བཅུག་ཡོད་འདུག
གནས་ཚུལ་དེ་ནི་མདོ་ལྷོ་ཁུལ་ཀླུ་ཆུ་རྫོང་ཁོངས་ཀྱི་སློབ་ཆེན་པའི་སློབ་མ་ཚོའི་ལས་འཚོལ་གཅིག་གྱུར་ཡིག་རྒྱུགས་ཀྱི་རྒྱུགས་ཤོག་རྒྱ་ནག་གི་འབྲེལ་ཡོད་ཚན་པའི་མི་སྣས་བརྐུས་ནས་གསང་བའི་ཐོག་ཕྱི་ལ་བཙོང་པ་དང་། ས་གནས་གཞན་པའི་མི་ཚོ་ས་གནས་ཀྱི་ལས་བྱེད་ཚུད་རྒྱུགས་ཁོངས་སུ་བཅུག་ནས་ས་གནས་ཀྱི་སློབ་ཆེན་མཐར་ཕྱིན་སློབ་མ་ཚོའི་གོ་སྐབས་ཤོར་བཞིན་པའི་གནས་ཚུལ་སློབ་ཆེན་པ་དང་ཁྱིམ་བདག་ཕ་མ་ཚོས་ཤེས་རྟོགས་བྱུང་རྗེས་ཉེ་བའི་སྤྱི་ཟླ་༡༢བའི་ཚེས་༢༨ཉིན་ནས་ཞུ་འབོད་ལས་འགུལ་སྤེལ་བ་ཡིན་པ་དང་། ཉིན་དེ་དག་ནང་ཞུ་འབོད་ལས་འགུལ་ནང་མཉམ་ཞུགས་བྱེད་མཁན་ཇེ་མང་ལ་སོང་ཡོད་པ་རེད། དེ་ལྟར་གནད་དོན་དེར་དྲང་བདེན་གྱི་ཐག་གཅོད་མ་བྱུང་ཚེ་ཁོང་ཚོས་གོང་རིམ་ཞིང་ཆེན་དང་ཀྲུང་དབྱང་ལ་ཞུ་གཏུགས་བྱེད་རྒྱུ་ཡིན་ཚུལ་བརྙན་ཐུང་ནང་བརྗོད་བཞིན་པ་རེད།
ཉེ་བའི་ཀླུ་ཆུ་རྫོང་ཁོངས་སུ་རྫོང་གཞན་དང་གཅིག་གྱུར་གྱི་ལས་འཚོལ་ཡིག་རྒྱུགས་ལ་མཉམ་ཞུགས་གནང་མཁན་སློབ་ཆེན་མཐར་ཕྱིན་སློབ་མ་བསྡོམས་༣༢༠ལྷག་ཡོད་པའི་ཁོངས་སུ་ཀླུ་ཆུ་རྫོང་ཁོངས་ནས་མ་ཡིན་པའི་ཕྱི་མི་༦༨ཙམ་ཡོད་པ་དང་། དེའི་ཁོངས་ལས་འཚོལ་ཡིག་རྒྱུ་འཕྲོད་མཁན་ཀླུ་ཆུ་ས་གནས་གྱི་མི་༢༥དང་། ས་ཁུལ་གཞན་པའི་༢༦གིས་རྒྱུགས་འཕྲོད་ཡོད་འདུག
ས་གནས་བོད་མི་ཞིག་གིས་བརྗོད་དོན། ཀླུ་ཆུ་རྫོང་སྲིད་གཞུང་གིས་ས་གནས་ཡུལ་མི་མང་ཚོགས་ཀྱི་བདེ་སྡུག་ལ་བལྟ་རྟོགས་ཡག་པོ་མི་བྱེད་པའི་ཐོག་ལྟག་སྒོ་བརྒྱུད་པ་སོགས་ལས་དཀའ་ངལ་འདིའི་རིགས་ཡང་ཡང་ཡོང་གི་ཡོད་པ་དང་། ད་ཐེངས་འབྲེལ་ཡོད་ཚན་པའི་མི་སྣས་རྒྱུགས་ཤོག་མང་པོ་ལྐོག་ཚོང་རྒྱབ་སྟེ་རྒྱ་སྒོར་ཁྲི་༢༠༠ལྷག་ལྐོག་ཟ་བྱས་ཡོད་པ་ས་གནས་བོད་མིས་ཤེས་རྟོགས་བྱུང་ཚུལ་ངོ་སྤྲོད་བྱས་ཡོད།

གསར་འགོད་པ་ཀླུ་འབུམ།