ལོ་བཅུའི་ཁྲིམས་བཅད།

༄༅། །བོད་མིའི་སྒྲིག་འཛུགས་ཀྱི་དྲ་གནས་ཐོག་སྤེལ་བའི་གནས་ཚུལ་ལྟར་ན། ཟླ་བ་སྔོན་མའི་ཚེས་ ༢༠ ཉིན་རྒྱ་གཞུང་ཉེན་རྟོག་པས་མགོ་ལོག་ཁུལ་པད་མ་རྫོང་ནས་ཡིན་པའི་བོད་མི་ཝ་ཤུལ་རྡོར་ཕྲུག་ལགས་སུ་ཟི་ཁྲོན་ཞིང་ཆེན་གྱི་ཁྲིན་ཏུའུ་ཡི་ཁྲིམས་ཁང་ཞིག་ནས་མི་ལོ་ ༡༠ ཡི་དུས་བཀག་བཙོན་འཇུག་ཁྲིམས་བཅད་བཏང་འདུག དེ་ཡང་ཕྱི་ལོ་ ༢༠༡༢ ཟླ་ ༡༢ ཚེས་ ༣ ཉིན་རྡོར་ཕྲུག་ལགས་སུ་པདྨ་རྫོང་སེ་ལེ་ཐང་ཡུལ་ཚོའི་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་སྲེག་བཏང་བའི་ཉིན་ཁོང་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་དང་། དེ་ནས་བཟུང་ཁོང་གར་ཡོད་ཅི་བྱུང་གི་གནས་ཚུལ་ཤེས་རྟོགས་མེད་པར་ཡུན་རིང་ལྷག་ཡོད་ཀྱང་། ཕྱི་ཟླ་ ༥ ཚེས་ ༢༠ ཉིན་ཟི་ཁྲོན་ཞིང་ཆེན་གྱི་ཁྲིན་ཏུའུ་ཡི་ཁྲིམས་ཁང་ཞིག་ནས་མགོ་ལོག་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་སྲེག་གི་ལས་འགུལ་སྐབས་ཁོང་གིས་ཉེན་རྟོག་པས་སྐུ་ཕུང་བཙན་འཁྱེར་བྱེད་པར་བཀག་འགོག་དང་། ཕྱི་ལོ་ ༢༠༠༨ དང་ ༢༠༠༩ ལོའི་བོད་མིའི་ཞི་རྒོལ་ནང་མཉམ་ཞུགས་བྱས་པ་བཅས་ཀྱི་ཉེས་མིང་འོག་རྡོ་ཕྲུག་ལགས་སུ་ལོ་ ༡༠ ཡི་ཁྲིམས་བཅད་བཏང་འདུག །