ཡོ་རོབ་བྱང་མའི་སྐུ་ཚབ་དོན་གཅོད་པོ་ལན་ཌིའི་ནང་གཞུང་དོན་ཕྱོགས་ཕེབས་གནང་འདུག

དབུས་བོད་མིའི་སྒྲིག་འཛུགས་ཀྱི་ཡོ་རོབ་བྱང་མའི་སྐུ་ཚབ་དོན་གཅོད་བསོད་ནམས་ཚེ་རིང་ཕིརའིསི་ལགས་ཉེ་འཆར་པོ་ལན་ཌིའི་ནང་གཞུང་དོན་ཕྱོགས་ཕེབས་གནང་འདུག དབུས་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་བཀོད་པར་གཞིགས་ན། སྐུ་ཚབ་དོན་གཅོད་བསོད་ནམས་ཕིརའི་སི་ལགས་ཀྱིས་པོ་ལན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་ Monika Wieli Chowska དང་མཇལ་འཕྲད་གནང་སྐབས་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་གསུམ་གྱི་སྐོར་དང་། བོད་ནང་ད་ལྟའི་དུས་སྐབས་འདིར་འགྲོ་སྡོད་སྤྱོད་གསུམ་གྱི་རང་དབང་དང་། ཆོས་དད་དང་སྨྲ་བརྗོད་ཀྱི་རང་དབང་མེད་པའི་སྐོར། ལྷག་པར་དུ་རྒྱ་ནག་གཞུང་གིས་ཉེ་བའི་དུས་སྐབས་སུ་དེང་དུས་ཀྱི་འཕྲུལ་ཆས་བེད་སྤྱོད་བྱས་ནས་མིག་དང་ངོ་གདོང་བརྒྱུད་གསང་བའི་ལས་དོན་སྤེལ་གྱི་ཡོད་པའི་སྐོར་སྙན་སེང་ཞུས་ཡོད་འདུག དེ་བཞིན་སྐུ་ཚབ་དོན་གཅོད་བསོད་ནམས་ཕིརའི་སི་ལགས་ཀྱིས་ལོ་འདིའི་བོད་མིའི་སྒེར་ལངས་གསུམ་བཅུའི་དུས་དྲན་དེ་ཐེངས་དྲུག་ཅུ་པ་དེ་ཆགས་ཀྱི་ཡོད་པའི་གནད་འགག་སྐོར་གྲོས་ཚོགས་ཀྱི་འཐུས་མི་ལྕམ་ Wieli Chowska ལགས་ལ་སྙན་སེང་ཞུས་ཡོད་འདུག གཞན་ཡང་སྐུ་ཚབ་དོན་གཅོད་ཀྱིས་པོ་ལན་ཌིའི་གཙུག་ལག་སློབ་གཉེར་ཁང་ཞིག་ནང་འཁོར་ཡུག་སྲུང་སྐྱོབ་གནང་མཁན་སྐུ་ཞབས་ Tomasz Szczy Gielki དང་ཁོར་ཡུག་སྲུང་སྐྱོབ་སྐོར་བཀའ་མོལ་གནང་སྐབས་ཁོང་ལ་དབུས་བོད་མིའི་སྒྲིག་འཛུགས་ཀྱིས་བཏོན་པའི་བོད་ཀྱི་ཁོར་ཡུག་སྐོར་གྱི་ཡིག་ཆ་དཀར་པོ་ཞེས་པ་དེ་ཕུལ་ཡོད་འདུག དེ་བཞིན་སྐུ་ཚབ་དོན་གཅོད་ཀྱིས་པོ་ལན་ཌིའི་ནང་རྟེན་གཞི་བྱས་པའི་སྨན་པ་དམ་པ་བསྟན་འཛིན་བྱང་ཆུབ་ལགས་ཀྱི་མཚན་ཐོག་ཏུ་ཡོད་པའི་བོད་ཀྱི་སྨན་གྱི་སློབ་གཉེར་ཁང་དེར་ཆེད་ཕེབས་ཀྱིས་དེར་ཡོད་འགོ་ལས་རྣམ་པའི་ལྷན་དུ་ལས་དོན་གནང་ཕྱོགས་སྐོར་གྲོས་བསྡུར་ཞིབ་ཕྲ་གནང་ཡོད་པའི་གནས་ཚུལ་བྱུང་ཡོད་འདུག

གསར་འགོད་པ་ལྷུན་གྲུབ་ཚེ་རིང༌།