ལྷོ་གཞིས་བོད་མིའི་སྐུ་ཚབ་ཚོས་མངའ་སྡེའི་འགྲུལ་ལམ་ཡར་རྒྱས་ལས་དོན་ལྷན་ཁང་གི་བློན་ཆེན་དང་མཇལ་འཕྲད་གནང་འདུག

དེ་ཡང་ཟླ་བ་འདིའི་ཚེས་༡༩ཉིན་ལྷོ་གཞིས་སྤྱི་ཁྱབ་འཇིགས་མེད་ཚུལ་ཁྲིམས་ལགས་དང་། གཞིས་ཆགས་ཀྱི་འཁོར་ལམ་ཚོགས་ཆུང་གི་འབྲེལ་ཡོད་ལས་བྱེད་རྣམས། མངའ་སྡེའི་(PWD)་འམ་འགྲུལ་ལམ་ཡར་རྒྱས་ལས་དོན་ལྷན་ཁང་གི་བློན་ཆེན་སྐུ་ཞབས་(Satish L Jarkiholi)་ལགས་དང་མཇལ་འཕྲད་གནང་ནས། མོན་གྷོ་གཞིས་ཆགས་ནང་དགའ་ལྡན་ནས་འབྲས་སྤུངས་དགོན་པ་བར་གྱི་གཞུང་ལམ་དང་། དེ་བཞིན་ར་སྟོད་གྲྭ་ཚང་ནས་གཞིས་ཆགས་༦པ་བར་གྱི་གཞུང་ལམ་དང་ཆུ་འགྲོ་ཡུར་བུ་བཅས་ཉམས་གསོ་ཆེད་ཧིན་སྒོར་འབུམ་༥༣༠ཐམ་པའི་འཆར་གཞི་ཕུལ་ཏེ་མཐུན་འགྱུར་རོགས་རམ་ཡོང་བའི་འབོད་སྐུལ་ཞུས་པ་ལྟར། བློན་ཆེན་མཆོག་ནས་ཀྱང་འཆར་གཞི་ཕུལ་བ་ཁག་ལ་དགོངས་བཞེས་གནང་རྒྱུའི་ཞལ་བཞེས་ཐོབ་ཡོད་པ་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་འདུག

གོང་ཞུས་གནས་ཚུལ་ནང་། སྐུ་ཚབ་ཚོགས་ཆུང་རྣམས་ཀྱིས་ད་དུང་མངའ་སྡེའི་གྲོང་གསེབ་ཡར་རྒྱས་ལས་དོན་དང་། གྲོང་ཚོའི་ལས་དོན་ཚན་པའི་བློན་ཆེན་སྐུ་ཞབས་(Priyank Kharke)་ལགས་དང་ཡང་མཇལ་འཕྲད་ཞུས་ཏེ། གཞིས་ཆགས་ཁག་ཅིག་གི་གཞུང་ལམ་བཟོ་བཅོས་ཀྱི་འཆར་གཞི་ཕུལ་ཏེ་རིགས་རམ་དགོངས་བཞེས་ཡོང་བའི་འབོད་སྐུལ་ཞུས་ཡོད་པ་ལྟར། ཁོང་གིས་ཀྱང་མཐུན་འགྱུར་གནང་གི་ཡིན་ཞེས་གསུངས་ཡོད་འདུག
སྤྱིར་རྒྱ་གར་ལྷོ་ཕྱོགས་ཁུལ་གྱི་གཞིས་ཆགས་སྤྱི་དང་། ལྷག་པར་དུ་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཞིས་ཆགས་ཁག་དང་དགོན་སྡེ་ཁག་གི་བར་རྒྱང་ཐག་རིང་ཙམ་ཡོད་པ་དང་། གཞུང་ལམ་ཡང་སེ་བཟོ་བཅོས་རྒྱག་དགོས་ཀྱི་ཡོད་པའི་ཆ་ནས་མངའ་སྡེའི་གཞུང་ནས་དམིགས་བསལ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ས་གནས་སུ་ཆིབས་བསྒྱུར་མ་གནང་གོང་ཙམ་ལ་བཟོ་བཅོས་རྒྱག་རྒྱུའི་མཐུན་འགྱུར་གནང་གི་ཡོད་པ་ཞིག་ཡིན་པ་རེད།

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།