དབྱངས་མཚོ་ལགས་ཀྱིས་ཕྱི་ཕྱོགས་སུ་འབྲེལ་བ་བྱས་ཚུལ་གྱིས་རྒྱ་ནག་གི་ཉེན་རྟོག་པས་འཛིན་བཟུང་བྱས་འདུག

ཕྱི་ཟླ་༣ཚེས་༢ཉིན་གཞིས་ཀ་རྩེ་ནས་ཡིན་པའི་དབྱངས་མཚོ་ལགས་རྒྱ་ནག་གཞུང་གི་ས་གནས་ཉེན་རྟོག་པས། ཁོ་མོའི་ཁ་པར་བརྒྱུད་ཕྱི་ཕྱོགས་སུ་འབྲེལ་བ་བྱས་ཡོད་པའི་ཉེས་མིང་འོག་འཛིན་བཟུང་བཙན་ཁྲིད་ཀྱིས། རྣམ་གླིང་རྫོང་རྒྱ་མཚོ་ཡུལ་ཚོའི་ས་གནས་ཉེན་རྟོག་ཁང་དུ་བཀག་ཉར་བྱས་ཡོད་པ། བཙན་བྱོལ་ནང་ཡོད་པའི་འབྲེལ་ཡོད་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གནས་ཚུལ་འགྲེལ་བརྗོད་གནང་བྱུང་།
ཁོང་གིས་གསུང་ན། ད་ལྟའི་ཆར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་བསླེབ་ལ་ཉེ་བ་དང་བསྟུན། རྒྱ་ནག་གཞུང་གིས་ལྷ་ས་དང་གཞིས་ཀ་རྩེ་གྲོང་ཁྱེར་སོགས་ཀྱི་ས་གནས་གང་སར་ཐོབ་ཐང་དཔང་ཡིག་དང་མི་མང་གི་ཁ་པར་ལ་ཞིབ་བཤེར་བྱེད་བཞིན་ཡོད་པ་དང་། བུད་མེད་དབྱངས་མཚོ་ལགས་འཛིན་བཟུང་བྱེད་དགོས་དོན་ཁ་པར་སྔོག་བཤེར་སྐབས། ཕྱི་ཕྱོགས་སུ་འབྲེལ་བ་བྱས་པ་ཤེས་རྟོགས་བྱུང་ཚུལ་གྱི་ཉེས་མིང་འོག་འཛིན་བཟུང་བྱས་ཡོད་པ་ལས། ད་ལྟའི་ཆར་ནང་མི་ཚོར་ཁོ་མོ་དང་འབྲེལ་བ་བྱེད་འཇུག་གི་མེད་པ་འགྲེལ་བརྗོད་གནང་བྱུང་།
དེ་འབྲེལ་བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་བའི་ནང་། དབྱངས་མཚོ་ལགས་ཀྱིས་ཕྱི་ཕྱོགས་སུ་པར་རིས་སོགས་བརྒྱུད་བསྐུར་བྱས་པའི་ཉེས་མིང་འོག་འཛིན་བཟུང་བྱས་ཡོད་སྐོར་བཀོད་འདུག་པ་མ་ཟད། དབྱངས་མཚོ་ལགས་ནི་ད་ལོ་རང་ལོ་༢༣་དང་། ནམ་རྒྱུན་གཞིས་ཀ་རྩེ་གྲོང་ཁྱེར་གྱི་གངས་རི་ཟ་ཁང་ཞེས་པའི་ནང་ལས་ཀ་བྱེད་བཞིན་ཡོད་པ་བཀོད་འདུག
སྤྱིར་ལོ་ལྟར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་བསླེབ་ལ་ཉེ་བ་དང་བསྟུན། རྒྱ་ནག་གཞུང་གིས་བོད་མི་ཚོར་དམ་དྲག་དང་སྔོག་བཤེར་རིགས་བྱེད་བཞིན་ཡོད་པ་དང་། འདི་ལོའི་ལོ་གསར་སྐབས་ལྷ་ས་ཁུལ་དུ་དྲག་ཆས་དམག་མི་འགྲེམས་འཇོག་དང་། ས་གནས་ཁག་ཏུ་མཇལ་བ་ཚོར་ཞིབ་བཤེར་དམ་དྲག་བྱས་ཡོད་པ་རེད།

གསར་འགོད་པ། སངས་རྒྱས་དཀོན་མཆོག
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།