ཨ་རིའི་རྒྱལ་སྤྱིའི་ཆོས་དད་རང་དབང་གི་གཞུང་ཚབ་ཆེན་མོས་བོད་ནང་གི་ཆོས་དད་རང་དབང་ཐད་བློ་འཚབ་ཡོད་པ་བསྟན་འདུག

• 2023-06-08

ཕྱི་ཚེས་༦རེས་གཟའ་མིག་དམར་ཉིན། ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་གི་གཞུང་ཚབ་ཆེན་མོ་(Rashad Hussain)་ལགས་ཀྱིས་ཁོང་གི་(Twitter)་དྲྭ་ལམ་བརྒྱུད། རྒྱ་ནག་མི་དམངས་སྤྱི་མཐུན་ཁབ་ཀྱིས་རྒྱ་ནག་གི་ཡུན་ནན་ཞིང་ཆེན་ནང་ཡོད་པའི་ཁ་ཆེ་མི་རིགས་ཀྱི་ལོ་རྒྱུས་རང་བཞིན་ལྡན་པའི་ལྷ་ཁང་ཁག་གི་ཁ་ཆེའི་ཆོས་ལུགས་ཀྱི་རྣམ་པ་མེད་པར་བཟོས་པ་གཙོས་ཆོས་ལུགས་རྒྱ་བསྒྱུར་གྱི་བྱ་བ་མུ་མཐུད་སྤེལ་བཞིན་པའི་གནས་ཚུལ་ལ་ངོས་རང་བློ་འཚབ་ཆེན་པོ་ཡོད་ཅེས་གསུངས་གནང་འདུག
ཁོང་གིས་ད་དུང་མུ་མཐུད་དུ། ཡུན་ནན་ཞིང་ཆེན་གྱི་(Najiaying)་གྱི་ཁ་ཆེ་ལྷ་ཁང་དེ་ནི་ཁ་ཆེ་བ་ཚོའི་ཕྱག་མཆོད་ཀྱི་ལྟེ་གནས་གལ་ཆེ་ཞིག་ཡིན་པ་མ་ཟད། རྒྱ་ནག་ནང་ཁ་ཆེའི་ཆོས་ལུགས་ཀྱི་རྣམ་པ་ལྡན་པའི་ཁ་ཆེའི་ལྷ་ཁང་རེ་ཟུང་ལས་ལྷག་མེད་པའི་གྲས་ཡིན་ཞིང་། རྒྱ་ནག་གཞུང་གི་ཆོས་ལུགས་ཁག་རྒྱ་བསྒྱུར་གྱི་སྲིད་ཇུས་ལ་གདོང་ལེན་ཁ་གཏད་གཅོག་མཁན་རྣམས་ལ་ཨ་རིས་རྒྱབ་སྐྱོར་ཞུ་རྒྱུ་ཡིན་པ་ནན་བརྗོད་གནང་འདུག

Grateful for the opportunity to sit down with Mr. Tempa Tsering to discuss the many challenges facing Tibetan Buddhists and how we can collaborate to preserve Tibetans’ vibrant and distinct cultural, linguistic, and religious heritage. pic.twitter.com/jjB8xihLjE

— U.S. Ambassador at Large Rashad Hussain (@IRF_Ambassador) June 6, 2023

གཞན་ཡང་ཁོང་གིས། རྒྱ་ནག་གཞུང་གིས་ཆོས་ལུགས་རྒྱ་བསྒྱུར་གྱི་སྲིད་ཇུས་ལག་བསྟར་བྱེད་བཞིན་པ་དེ་ནི། རྒྱ་ནག་ནང་ཆོས་དད་རང་མོས་དང་སྨྲ་བརྗོད་རང་དབང་ལ་དྲག་གནོན་མུ་མཐུད་བྱེད་བཞིན་པའི་དཔེ་མཚོན་ཞིག་ཡིན་པ་དང་། རྒྱ་ནག་གཞུང་གིས་བོད་དང་ཤིང་ཅང་ཁུལ་དུའང་དགོན་སྡེ་དང་རྩ་ཆེའི་ཆོས་ཕྱོགས་ཀྱི་བསྟི་གནས་ཁག་གཏོར་བཤིག་བཏང་བ་སོགས་ཆོས་ཕྱོགས་ཀྱི་བྱེད་སྒོ་དང་མི་རིགས་ཀྱི་ཐུན་མོང་མ་ཡིན་པའི་ངོ་བོ་རྩ་མེད་བཟོ་ཐབས་བྱེད་པའི་གནས་ཚུལ་འབྱུང་བཞིན་པས། ང་ཚོས་རྒྱ་ནག་གཞུང་ལ་དེ་འདྲའི་ཆོས་དད་རང་མོས་ལ་རྩིས་མེད་རྡོག་རོལ་གཏོང་མཚམས་འཇོག་དགོས་པའི་གནོན་ཤུགས་མུ་མཐུད་སྤྲོད་རྒྱུ་ཡིན་ཞེས་གསུངས་གནང་འདུག
སྐུ་ཞབས་(Rashad Hussain)་ལགས་ནི། ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་ལྷན་ཁང་གི་གཞུང་ཚབ་པ་ཡིན་ཞིང་། ལས་དོན་གྱི་ཐད་ནས་ཁོང་གིས་ཆོས་དད་རང་དབང་སྲུང་སྐྱོབ་དང་འབྲེལ་བའི་སྲིད་ཇུས་ཐད་ཨ་རིའི་སྲིད་འཛིན་མཆོག་དང་། དེ་བཞིན་ཕྱི་སྲིད་དྲུང་ཆེ་རྣམ་གཉིས་ལ་སློབ་སྟོན་པའི་འགན་འཁུར་གཙོ་བོ་བཞེས་ཀྱི་ཡོད་པ་རེད།

གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།