བོད་དོན་ཐོག་རྒྱབ་སྐྱོར་ཡོང་བའི་འབོད་སྐུལ་ལས་འགུལ།

༄༅༎ཉི་ཧོང་ནང་གི་བོད་མི་དང་བོད་དོན་རྒྱབ་སྐྱོར་ཚོགས་པ་ཁག་གིས་མཉམ་རུབ་ཐོག་ནས་ ཉི་ཧོང་གི་གྲོས་ཚོགས་འཐུས་མི་རྣམ་པར་བོད་དོན་ཐོག་རྒྱབ་སྐྱོར་ཡོང་བའི་འབོད་སྐུལ་གྱི་ལས་འགུལ་ཞིག་དབུ་འཛུགས་གནང་ཡོད་པའི་གསར་འགོད་གསལ་བསྒྲགས་ཤིག་སྤེལ་གནང་འདུག།
ཉེ་དུས་བོད་ནང་རྒྱ་ནག་གཞུང་གིས་བོད་མི་ཚོའི་ཐོག་དྲག་གནོན་བྱེད་ཤུགས་ཆེ་རུ་བཏང་བའི་དུས་ཚོད་དང་སྟབས་བསྟུན། ཉི་ཧོང་ནང་གི་བོད་མི་དང་བོད་དོན་རྒྱབ་སྐྱོར་བ་ཚོས་ ཉི་ཧོང་གི་གཞུང་འབྲེལ་དཔོན་རིགས་དང་གྲོས་ཚོགས་འཐུས་མི་རྣམ་པ་ཚོར། ཉི་ཧོང་གཞུང་ནས་རྒྱ་ནག་ཐོག་ཕྱི་འབྲེལ་གཞུང་ཚབ་བརྒྱུད་གནོན་ཤུགས་སྤྲོད་དགོས་རྒྱུའི་སྐུལ་ལྕག་གནང་རོགས་ཞེས་འབོད་སྐུ་ཞུས་གནང་བཞག།
ཁ་ས་ཕྱི་ཚེས་༦ཉིན་ཉི་ཧོང་བོད་རིགས་ཚོགས་པ་དང་ཉི་ཧོང་ཁུལ་གྱི་བོད་རང་བཙན་སློབ་ཕྲུག་ཚོགས་པའི་འཐུས་མི་ལྔས་ ཉི་ཧོང་གྲོས་ཚོགས་འཐུས་མི་རྣམ་པའི་ལས་ཁུངས་ཁག་༡༣ལ་ཞུ་སྐུལ་གནང་བར་བཅར་ཡོད་པ་དང༌། གྲོས་ཚོགས་འཐུས་མི་དྲུག་དང་དངོས་སུ་མཇལ་འཕྲད་ཞུ་ཐུབ་པ་བྱུང་བཞག། ལས་འགུལ་སྤེལ་གནང་མཁན་ཚོས་གྲོས་ཚོགས་འཐུས་མི་ཚོར་ བོད་ནང་གི་ད་ལྟའི་ཛ་དྲག་གི་གནས་སྟངས་འགྲེལ་བཤད་དང་འབྲེལ། ད་ལོ་ཕྱི་ཟླ་༣པ་ནས་བཟུང་བོད་ཤར་ཕྱོགས་མདོ་སྟོད་སྨད་གཉིས་ནང་ད་བར་བོད་མི་ན་གཞོན་༡༢ཙམ་གྱིས་རང་ལུས་མེར་བསྲེག་བཏང་ནས་རྒྱ་ནག་གཞུང་ལ་ངོ་རྒོལ་གནངབའི་གནས་ཚུལ་ངོ་སྤྲོད་དང་འབྲེལ། རྒྱལ་སྤྱིའི་སྤྱི་ཚོགས་ནས་བོད་ནང་གི་གནས་སྟངས་གསལ་པོ་མཁྱེན་རྟོགས་ཡོང་སླད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་གནང་འདུག།