ཕྱི་ཟླ་ ༢ ཚེས་ ༢༢ ཉིན་ཨ་མི་རི་ཀའི་ཕྱི་སྲིད་ལས་ཁུངས་ཀྱིས་བོད་ཀྱི་ལོ་གསར་གཞུང་འབྲེལ་གྱི་ཐོག་ནས་སྲུང་བརྩི་ཞུས་ཤིང་། ཨ་རིའི་ཕྱི་སྲིད་དྲུང་ཆེ་ Anthony Blinken མཆོག་གིས་སྲུང་འཕྲིན་གནང་པའི་ནང་། ཨ་རིའི་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པ་སྲུང་སྐྱོབ་ཆེད་རྒྱབ་སྐྱོར་གྱི་ཆོད་སེམས་བརྟན་པོ་ཡོད་པར་མ་ཟད། བོད་མིའི་ཆོས་ཕྱོགས་ཀྱི་དབུ་ཁྲིད་འདེམ་བསྐོ་དང་ཁོང་རྣམ་པར་དད་གུས་ཞུ་ཆོག་རྒྱུར་ཡང་རྒྱབ་སྐྱོར་བརྟན་པོ་ཡོད་པ་བསྐྱར་ནན་ཞུ་རྒྱུ་ཡིན་ཞེས་གསུངས་ཡོད་པ་རེད། ཐེངས་འདིའི་ཨ་རིའི་གཞུང་གི་བོད་ཀྱི་ལོ་གསར་གྱི་མཛད་སྒོའི་ཐོག་ཨ་རིའི་གཞུང་གི་བོད་དོན་ལས་དོན་ཐད་ཀྱི་དམིགས་བསལ་སྐུ་ཚབ་ལྕམ་ཨུཛ་ར་ཛི་ཡ་མཆོག་ཀྱང་ཆེད་ཕེབས་ཐོག་ཨ་རིའི་གཞུང་གིས་བོད་དོན་ཆབ་སྲིད་དང་དཔལ་འབྱོར་གྱི་རྒྱབ་སྐྱོར་གནང་ཕྱོགས་སྐོར་གསུངས་པ་དང་། གཞན་ཡང་དབུས་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་དང་ཨ་རིའི་གཞུང་དང་གཞུང་འབྲེལ་མ་ཡིན་པའི་སྐུ་ཚབ་མང་དག་ཅིག་མཛད་སྒོའི་ཐོག་མཉམ་ཞུགས་གནང་ཡོད་པ་རེད།།
གསར་འགོད་པ། བསྟན་འཛིན་བདེ་སྐྱིད།
རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། རྟ་མགྲིན་དབང་ཕྱུག