༸གོང་ས་མཆོག་ལ་གྷན་རྡིའི་ཞི་བདེའི་གཟེངས་རྟགས་འབུལ་འཆར།

༄༅༎དེ་རིང་ཕྱི་ཟླ་བཅུ་པའི་ཚེས་གཉིས་ཉིན་མོ་འདི་ནི་རྒྱ་གར་གྱི་སྐྱེས་བུ་དམ་པ་གྷན་རྡིའི་སྐུའི་འཁྲུངས་སྐར་གྱི་ཉིན་མོ་ཡིན་པ་དང་། ལྷོ་ཨཕ་རི་ཀའི་ནང་རྟེན་གཞི་བྱེད་པའི་གྷན་རྡིའི་ཐེབས་རྩ་ཁང་གི་འགན་འཛིན་གྣ་རྡིའི་ཚ་མོ་ལྕམ་ཨི་ལ་ གྣ་རྡི་མཆོག་གི་གསུངས་པར་ལྟར་ན། ལོ་འདིའི་སྐྱེས་བུ་དམ་པ་གྷན་རྡིའི་རྒྱལ་སྤྱིའི་ཞི་བདེའི་གཟེངས་རྟག་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བདུན་ཕྲག་རྗེས་མའི་རེས་གཟའ་པ་སངས་ཉིན་འབུལ་བཞེས་གནང་རྒྱུ་ཡིན་འདུག ༸གོང་ས་མཆོག་ལྷོ་ཨཕ་རི་ཀའི་ཡེ་ཤུའི་ཆོས་དཔོན་ཌིཟ་མོནྚ་ཊུ་ཊུ་མཆོག་གི་དགུང་གྲངས་བརྒྱ་བཅུ་ཐམ་པར་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོ་གདན་འདྲེན་ཞུས་ཡོད་ཀྱང་། ད་བར་ལྷོ་ཨཕ་རི་ཀའི་གཞུང་ནས་མཐོང་མཆན་ཕུལ་མེད་པར་བརྟེན་༸གོང་ས་མཆོག་སྐུ་དངོས་སུ་ཆིབས་བསྒྱུར་གནང་ཐུབ་ཀྱི་ཡོད་མེད་ད་ལྟ་གསལ་པོ་མེད་པ་རེད། སྐྱེས་བུ་དམ་པ་གྷན་རྡིའི་ཚ་མོ་དང་འབྲེལ་ཡོད་ཐེབས་རྩ་ཁང་གི་འགན་འཛིན་ལྕམ་ཨི་ལ་ གྷན་རྡི་མཆོག་གིས། ༸གོང་ས་ཏཱ་ལའི་བླ་མ་མཆོག་ད་ཆ་ཆོས་ཕྱོགས་ཀྱི་དབུ་འཁྲིད་ཤིག་ཡིན་པ་ལས་ཆབ་སྲིད་ཀྱི་དབུ་འཁྲིད་ཀྱི་ཐུགས་འགན་བཞེས་ཀྱི་མེད་པར་བརྟེན་ཁོང་ལ་མཐོང་ཆན་འབུལ་རྒྱུར་དཀའ་ངལ་འཕྲད་ཀྱི་མ་རེད་བསམ་གྱི་འདུག་ལ་ལྷོ་ཨཕ་རི་ཀའི་གཞུང་ནས་དགོངས་བཞེས་གནང་བའི་རེ་བ་ཞུ་གི་ཡོད། ཡིན་ནའང་གལ་སྲིད་ཆིབས་བསྒྱུར་གནང་མ་ཐུབ་པ་ཡིན་ན། ཁོང་གི་སྐུ་ཚབ་དོན་གཅོད་མཆོག་བརྒྱུད་ནས་མཛད་སྒོའི་ཐོག་འབུལ་རྒྱུའི་འཆར་གཞི་ཡོད་ཅེས་གསུངས་འདུག