༄༅༎དེ་རིང་ཕྱི་ཟླ་ ༥ ཚེས་ ༢༦ རེས་གཟའ་སྤེན་པའི་ཉིན་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། ཨའོསི་ཊི་རི་ཡའི་སྲིད་བློན་ལྦར་ནར་ཕེ་མེན་རྣམ་གཉིས་མཇལ་འཕྲད་གནང་ཡོད་པ་རེད།
རྒྱ་ནག་གཞུང་གིས་ཨའོསི་ཊི་རི་ཡའི་གཞུང་ལ་ཡུལ་དེའི་སྲིད་བློན་ནས་༧གོང་ས་༧སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཚེ་ཡུལ་གྲུ་གཉིས་དབར་གྱི་འབྲེལ་བར་དོ་ཕོགས་འགྲོ་སྲིད་པའི་ཉེན་བརྡ་བཏང་ཡོད་ཀྱང༌། ཨའོསི་ཊི་རི་ཡའི་སྲིད་བློན་ཕེ་མེན་མཆོག་གིས་ ངས་སུ་ཞིག་དང་མཇལ་འཕྲད་ཞུ་མིན་ང་རང་རང་ཉིད་ཀྱིས་ཐག་གཅོད་བྱེད་ཀྱི་ཡོད། ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་དེ་ཡང་ཐག་གཅོད་དེ་ལྟར་བྱས་པ་ཡིན་ཞེས་གསུངས་ཏེ་རྒྱ་ནག་གི་ཉེན་བརྡར་རྩིས་དགོས་དོན་མེད་པ་གསུངས་འདུག།
ད་དུང་ཁོང་གིས་ཨའོསི་ཊི་རི་ཡའི་རྒྱལ་ཁབ་འདིས་དུས་རྟག་ཏུ་འགྲོ་བ་མིའི་ཐོབ་ཐང་དོན་གཉེར་གྱི་ཕྱོགས་སུ་ལངས་མཁན་ཞིག་ཡིན་པ་བསྟན་ཡོད་ལ། ངས་ལས་དོན་གང་ཞིག་གཉེར་ཡང་དེའི་འགན་འཁུར་ཡོངས་རྫོགས་ང་རང་གཅིག་པུས་འཁུར་གྱི་ཡོད་ཅེས་གསལ་བཤད་གནང་འདུག།
ཡང་ཨའོསི་ཊི་རི་ཡའི་སྲིད་བློན་ཕེ་མེན་མཆོག་གིས་ ཁོང་སྐུ་སྒེར་གྱི་ཐོག་ནས་ཏཱ་ལའི་བླ་མ་མཆོག་ལྟ་བུ་ཁྱད་དུ་འཕགས་པའི་མཚོན་དོན་གྱི་མི་སྣ་མཇལ་འདོད་ཧ་ལས་པའི་ཆེན་པོ་ཡོད་པ་གསུངས་པ་དང་སྦྲགས། དབུ་འཁྲིད་རྣམ་གཉིས་ཀྱི་མཇལ་འཕྲད་འདིས་འགྲོ་བ་མིའི་ཐོབ་ཐང་དང་འཚེ་མེད་ཞི་བ། གྲོས་མོལ་ལ་རྒྱབ་སྐྱོར་དང་དྲག་གནོན་སྡུག་རྩུབ་ལ་ངོ་རྒོལ་མཚོན་པ་ཞིག་ཡིན་པ་འགྲེལ་བརྗོད་གནང་འདུག།
ཡང་གཟའ་པ་སངས་ཉིན་༧གོང་ས་༧སྐྱབས་མགོན་ཆེན་པོ་མཆོག་ནས་ཨའོསི་ཊི་རི་ཡའི་སྲིད་བློན་གཞོན་པ་དང་ཕྱི་སྲིད་བློན་ཆེན་གཅིག་ཅོག་མའེ་ཀལ་སིཔིན་ཌེ་ལེ་གར་དང་ཡང་མཇལ་འཕྲད་གནང་ཞིང༌། ༧གོང་ས་༧སྐྱབས་མགོན་ཆེན་པོ་མཆོག་ནས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་ངོས་ནས་མུ་འཐུད་བོད་ཀྱི་དཀའ་རྙོག་དེ་བོད་རྒྱ་གཉིས་ཕན་གྱི་ཐབས་ལམ་ཞིག་གི་ཐོག་ནས་སེལ་རྒྱུའི་སྲིད་བྱུས་རྒྱུན་ཁྱོངས་གནང་བཞིན་ཡོད་པ་གསར་འགོད་པ་ཚོར་བཀའ་གནང་ཡོད་པ་རེད༎