༧གོང་ས་མཆོག་གིས་རྒྱུད་སྨད་གྲ་ཚང་དུ་ཆོས་འབྲེལ་བཀའ་སློབ།

༄༅༎ཕྱི་ཟླ་བཅུ་གཉིས་པའི་ཚེས་༦ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་གི་གཙུག་ལག་ཁང་ནང་དད་ལྡན་ཆོས་ཞུ་ཆིག་ཁྲི་བརྒལ་བར་་མགོན་པོ་ཀླུ་སྒྲུབ་ཀྱི་རིམ་ལྔའི་འགྲེལ་པའི་ཆོས་འབྲེལ་མཇུག་བསྒྲིལ་གྲུབ་མཚམས་ མགོན་པོ་གང་ཉིད་ཀྱིས་རྗེ་རིན་པོ་ཆེའི་གསུང་ལུང་འདྲེན་མཛད་པ་དང་ འབྲེལ་བཀའ་སློབ་སྩལ་ཡོད་ཅིང་ ༧གོང་ས་སྐྱབས་མགོན་ཆེན་པོ་མཆོག་གིས་སྩལ་བའི་བཀའ་སློབ་ནང་ དཔལ་གསང་བའི་འདུས་པའི་རྫོགས་རིམ་ནི་རྣམ་མཁྱེན་རྒྱལ་བའི་གོ་འཕང་བསྒྲུབ་རྒྱུའི་ལམ་མཐར་ཐུག་དེ་ཡིན་པ་དང་ ཆོས་གྲལ་དུ་བཞུགས་པ་རྣམས་ནས་བག་ཆགས་ཀྱི་ནུས་པ་ཆེན་པོ་འཇོག་ཐུབ་   ད་ལྟ་ང་ཚོས་འཆད་ཉན་བྱེད་བཞིན་པ་འདི་ནི་ དཔལ་གསང་བའི་འདུས་པའི་རྫོགས་རིམ་གྱི་ལམ་བསྟན་པའི་གཞུང་ཞིག་ཡིན་སྟབས་  འཆད་ཉན་བྱེད་ཐུབ་པ་དེ་ཧ་ཅང་གི་སྐལ་པ་བཟང་པོ་རེད་ 
མི་མང་ཚང་མས་དོན་དག་ཡོངས་སུ་རྫོགས་པ་རྟོགས་ཐུབ་རྒྱུ་ཁག་པོ་ཡིན་ཀྱང་བག་ཆགས་ཤིག་འཇོག་རྒྱུ་ཡོང་གི་རེད་ཅེས་དང་ད་དུང་༧གོང་ས་མཆོག་ནས་ སངས་རྒྱས་ཀྱི་འགོ་འཕང་འཐོབ་རྒྱུར་གཙོ་བོ་བྱམས་སྙིང་རྗེ་བྱང་ཆུབ་སེམས་ལ་རྟེན་དགོས་ སྤྱི་ཡོངས་ནས་བོད་མི་རྣམས་ཀྱིས་སྨོན་ལམ་ཚུན་ཆད་འདོན་སྐབས་ཀྱང་མ་འགྱུར་སེམས་ཅན་ཐམས་ཅད་ཅེས་བརྗོད་ནས་ཐེག་པ་ཆེན་པོའི་ཆོས་ཀྱི་བག་ཆགས་ཡོད་ནའང་ ཉམས་ལེན་ཞན་པོ་རེད་ དཔེར་ན་ ཁ་ནས་སེམས་ཅན་ཐབས་ཅད་བརྗོད་བཞིན་དུ་དོན་དམ་སེམས་ཅན་ལ་དམིགས་ནས་གནག་སེམས་དང་ གནོད་སེམས་ ཁོང་ཁྲོ་ འགྲན་སེམས་ཡང་གི་ཡོད་ལ་འཁྲུག་པ་རྒྱག་རྒྱུ་དང་ རྐུ་མ་བརྐུ་རྒྱུ་ དེ་བཞིན་ཧམ་པ་ཤོད་རྒྱུ་སོགས་གཞན་ལ་གནོད་པ་བྱེད་ཀྱི་ཡོད་པ་དེ་དག་ནི་རང་ཉིད་ཉམས་ལེན་གྱི་མ་འདང་བའི་སྐྱོན་ཡིན་ མདོར་ན་ ང་ཚོས་ཐེག་པ་ཆེན་པོའི་ཆོས་ཀྱི་བསླབ་བྱ་དེ་དག་ཉམས་ལེན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་བཀའ་སློབ་སྩལ་གནང་མཛད་འདུག ཉིན་ཕྱེད་ཡོལ་ནས་ ༧གོང་ས་མཆོག་གིས་གནས་དེར་རྟེན་གཞི་བྱས་པའི་རྫོང་དཀར་ཆོས་སྡེ་དང་ ཨོ་རྒྱན་བསམ་གཏན་གླིང་དགོན་པར་གནས་གཟིགས་མཛད་ཡོད་་པའི་སྐོར་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་འཁོད་འདུག