ཐའི་ལེནྜ་ནང་རྒྱལ་སྤྱིའི་གནམ་ཐང་སྒོ་རྒྱབ་དགོས་བྱུང་བ།

༄༅༎ཐའི་ལེནྜའི་རྒྱལ་ས་རྦེང་ཀོག་ནང་འདས་པའི་ཉི་མ་འགའ་ཤས་གོང་ནས་བཟུང་མི་མང་མང་གཙོ་ཚོགས་པའི་ཚོགས་མི་ཚོས་སྲིད་བློན་མཆོག་ལས་གནས་ནས་དགོངས་ཞུ་བྱ་དགོས་པའི་དགོས་འདུན་བཏོན་ནས་ངོ་རྒོལ་གྱི་ལས་འགུལ་མུ་མཐུད་སྤེལ་བཞིན་ཡོད་པ་དང་ཁ་ས་རེས་གཟའ་མིག་དམར་ཉིན་ངོ་རྒོལ་བ་མི་གྲངས་སྟོང་ཕྲག་འགའ་ཤས་ནས་རྒྱལ་ས་ནང་གི་རྒྱལ་སྤྱིའི་གནམ་ཐང་ཆེ་ཤོས་དེའི་ནང་ཉེན་རྟོག་པའི་སྲུང་སྐྱོབ་ཡོད་སའི་ས་ཁུལ་གང་སར་ངོ་རྒོལ་བྱས་པར་བརྟེན་ཁ་ས་གནས་སྐབས་རིང་གནམ་ཐང་སྒོ་རྒྱབ་དགོས་བྱུང་ཡོད་ལུགས་གནམ་ཐང་དེའི་འགན་འཛིན་གྱིས་འགྲེལ་བརྗོད་གནང་འདུག

དེའི་གོང་ངོ་རྒོལ་བྱེད་མཁན་ཚོ་དང་ཉེན་རྟོག་མི་སྣའི་བར་འཁོན་འཁྲུགས་འོག་མི་འགའ་ཤས་རྨས་སྐྱོན་ཕོག་ནས་སྨན་ཁང་དུ་སྐྱེལ་དགོས་བྱུང་ཡོད་པ་དང་མི་མང་མང་གཙོ་ཚོགས་པས་ད་ལྟའི་སྲིད་བློན་སོམ་ཅའེ་ནི་དེ་སྔ་ལྐོག་ས་རུལ་སུངས་ཀྱི་རྙོག་ཁྲའི་དབང་གིས་སྐྱབས་བཅོལ་དུ་འགྲོ་དགོས་བྱུང་བའི་སྲིད་བློན་ཟུར་པ་ཐག་སིན་ཤི་ན་བ་ཏའི་མག་པ་ཡིན་པར་བརྟེན་ཁོ་པའི་གཞུང་འཛིན་ཡང་སྲིད་བློན་ཟུར་པ་ཐག་སིན་གྱི་ཤུགས་རྐྱེན་འོག་འགྲོ་གི་ཡོད་ལུགས་སྐྱོན་བརྗོད་བྱེད་ནས་ངོ་རྒོལ་གྱི་ལས་འགུལ་སྤེལ་ཡོད་ན་ཡང་སྲིད་བློན་སོམ་ཅའེའི་ངོས་ནས་དགོངས་ཞུ་བྱ་རྩིས་མེད་ཅེས་གསུངས་ཀྱི་ཡོད་པ་རེད༎