ཐེ་ཝན་དང་ཧོང་ཀོང་ལ་བོད་མིའི་རང་དབང་སྒེར་ལངས་སྲུང་བརྩི།

ཐེ་ཝན་དང་། ཧོང་ཀོང་ནང་གི་བོད་མིའི་རང་དབང་སྒེར་ལངས་དུས་དྲན་སྐབས། ༢༠༡༥།༣།༡༠

ཨུ་རུ་སུའི་མངའ་ཁོངས་ཁལ་མུག་གི་རྒྱལ་ས་ཨེ་ལེ་སུ་ད་Elistaལ་བོད་མིའི་རང་དབང་སྒེར་ལངས། ༢༠༡༥།༣།༡༠

ཨུ་རུ་སུའི་མངའ་ཁོངས་ཁལ་མུག་གི་རྒྱལ་ས་ཨེ་ལེ་སུ་ད་Elistaལ་བོད་མིའི་རང་དབང་སྒེར་ལངས། ༢༠༡༥།༣།༡༠

ཐེ་ཝན་དང་། ཧོང་ཀོང་། ཨུ་རུ་སུ་སོགས་སུ་བོད་མིའི་རང་དབང་སྒེར་ལངས་དུས་དྲན་ཐེངས་༥༦པ་སྲུང་བརྩི་ཟབ་རྒྱས་ཞུས་འདུག
དེ་ཡང་ཁ་ས་ཕྱི་ཟླ་༣ཚེས་༡༠ཉིན། ཐེ་ཝན་གྱི་རྒྱལ་ས་ཐེ་པེ་དང་། ཐེ་ཝན་གྱི་གྲོང་ཁྱེར་ཆེ་ཤོས་གཉིས་པ་Kaosiung དེ་བཞིན་ཧོང་ཀོང་བཅས་སུ་བོད་མི་གནས་ཡུལ་གཞན་དང་གཅིག་མཚུངས་བོད་རིགས་དང་ཐེ་ཝན་མི་མང་བཅས་ཁྱོན་མི་གྲངས་བརྒྱ་ཕྲག་བརྒལ་བ་འདུ་འཛོམས་ཀྱིས་བོད་མིའི་རང་དབང་སྒེང་ལངས་གསུམ་བཅུའི་དུས་དྲན་ཐེངས་༥༦པ་སྲུང་བརྩི་ཞུས་པ་དང་། སྲུང་བརྩིའི་མཛད་སྒོ་དེ་དག་དྲ་རྒྱའི་ཐོག་ཐད་ཀར་རྒྱང་སྲིང་ཞུས་ཡོད་པ་རེད། ཐེ་ཝན་གྱི་རྒྱལ་ས་ཐེ་པེ་ཡི་Liberty Squareའམ་རང་དབང་ཐང་ཆེན་ཞེས་པའི་སར་དུས་དྲན་སྲུང་བརྩིའི་མཛད་སྒོའི་ཐོག་གཞུང་འབྲེལ་མིན་པའི་ཚོགས་པ་ཁག་༡༥ཙམ་གྱི་སྐུ་ཚབ་འཐུས་མི་ཕེབས་བཅར་གྱིས་གཏམ་བཤད་གནང་འདུག་ལ་མཛད་སྒོའི་སྐབས་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས། ཐེ་ཝན་དང་ཧོང་ཀོང་མི་མང་གིས་བོད་དོན་ཐོག་རྒྱབ་སྐྱོར་གནང་བ་དེ་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་བ་ཙམ་མིན་པར་ཐེ་ཝན་དང་ཧོང་ཀོང་གི་མ་འོངས་མདུན་ལམ་གྱི་གནས་སྟངས་དང་འབྲེལ་བ་ཆགས་ཡོད་ལུགས་གསུང་བཤད་གནང་འདུག ཐེངས་འདིར་ཐེ་ཝན་དང་ཧོང་ཀོང་མི་མང་ཚོས་དུས་གཅིག་ཏུ་བོད་མིའི་གསུམ་བཅུའི་དུས་དྲན་སྲུང་བརྩི་ཞུས་པ་དེ་ནི་ཐོག་མ་ཆགས་ཡོད།
གཞན་ཡང་ཉེ་སྔོན་ཕྱི་ཚེས་༨ཉིན་ཐེ་ཝན་གྱི་རྒྱལ་ས་ཐེ་པེ་ཁྲོམ་གཞུང་ཐོག་བོད་མི་དང་བོད་དོན་རྒྱབ་སྐྱོར་བ་ཁྱོན་མི་གྲངས་སྟོང་ཕྲག་ལྷག་ཙམ་གྱིས་བོད་མིའི་གསུམ་བཅུའི་དུས་དྲན་ལ་དྲན་གསོ་དང་སྦྲགས་བོད་དོན་ལ་རྒྱབ་སྐྱོར་མཚོན་པའི་རྔམ་སྟོན་ཁྲོམ་སྐོར་གྱི་ལས་འགུལ་རྒྱ་ཆེ་གནང་ཡོད་པ་རེད།
དེ་བཞིན་ཨུ་རུ་སར་གནས་སྡོད་སྤྱིན་པ་ལགས་གྱིས་འདི་གར་གནས་ཚུལ་བཏང་བ་ལྟར་བ། ཚེས༡༠ཉིན་ཨུ་རུ་སུའི་མངའ་ཁོངས་ཁལ་མུག་གི་རྒྱལ་ས་ཨེ་ལེ་སུ་ད་Elistaནས་བོད་མི་རྣམས་དང་། བོད་དོན་རྒྱབ་སྐྱོར་ཚོགས་པ་ཐུན་མོང་གིས་གསུམ་བཅུའི་དུས་དྲན་ཐེངས་༥༦ སྲུང་བརྩི་བྱས་བ་དང་། རྒྱལ་སའི་དགོན་པའི་ནང་མཛད་རིམ་ཁག་སྤེལ་རྗེས་ཉིན་གུང་རྒྱལ་སའི་གྲོང་ཁྱེར་དཀྱིལ་གྱི་གཞུང་ལས་ཁང་ཁག་གི་ཉེ་འགྲམ་དུ་བོད་པ་དང་བོད་དོན་རྒྱབ་སྐྱོར་བ་ཚོ་མཉམ་དུ་འཛོམས་ཏེ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་ཀ་ཀོ་ཡུ་བ་ལགས་ཀྱིས་བཀའ་ཤག་གི་གསུངས་འཕྲིན་སྒྲོག་སྦྱངས་དང་། གཞན་འགའ་ཤས་ཀྱིས་གཏམ་བཤད་གནང་། དེ་ནས་བྱང་ཆུབ་སེམས་མཆོག་མ་འདོན་བཞིན་དུ་ཁྲོམ་སྐོར་བྱས་འདུག

གསར་འགོད་པ་དོན་གྲུབ་རྣམ་རྒྱལ།