ཐའེ་ལྦན་ས་གནས་འོས་བསྡུར་གོ་མིང་ཏང་ལ་ཕམ་ཉེས།

༄༅༎རེས་གཟའ་ཉི་མའི་ཉིན་ཐའེ་ལྦན་གྱི་ས་གནས་ཁག་གཅིག་ནང་འོས་བསྡུ་བྱས་པའི་འབྲས་བུར་གཞུང་འཛིན་ཚོགས་པར་ཕམ་ཉེས་གང་འཚམས་བྱུང་སྟབས་ནོར་འཁྲུལ་ག་པར་ཕྱིན་ཡོད་མེད་ཞིབ་འཇུག་བྱེད་དགོས་སྐོར་སྲིད་འཛིན་མཱ་ཡིང་ཇུས་བཀའ་བཏང་འདུག ད་རེས་ས་གནས་འོས་བསྡུ་བྱས་པའི་ནང་གོ་མིང་ཏང་ལ་མང་མོས་འོས་ཤོག་ཐོབ་ན་ཡང་ཕྱོགས་འགལ་སྲིད་དོན་ཚོགས་པ་ཆེ་ཤོས་མང་གཙོ་ཡར་ཐོན་ཚོགས་པར་རྒྱལ་ཁ་ཆེན་པོ་ཐོབ་སྟེ་ཚོགས་པ་གཉིས་དབར་གྲངས་ཁའི་བར་ཁྱད་དེ་ཉུང་དུ་བཏང་ཡོད་ཅིང་ འོས་བསྡུའི་གྲུབ་འབྲས་དེས་སྲིད་འཛིན་མཱ་ཡིང་ཇུས་དབུ་འཁྲིད་པའི་ཐའེ་ལྦན་གྱི་གཞུང་འཛིན་གོ་མིང་ཏང་གིས་རྒྱ་ནག་དང་འབྲེལ་ཐག་ཉེ་བའི་རྐྱེན་གྱིས་ཐའེ་ལྦན་ཡུལ་མི་ཚོས་ཐའེ་ལྦན་གྱི་རང་བཙན་ལ་རྒྱབ་སྐྱོར་བྱེད་མཁན་མང་གཙོ་ཡར་ཐོན་ཚོགས་པར་དགའ་མོས་ཆེ་བ་དང་གོ་མིང་ཏང་ཚོགས་པར་རྒྱབ་སྐྱོར་བྱེད་མཁན་ཉུང་དུ་འགྲོ་ཡི་ཡོད་པའི་མཚོན་རྟགས་ཤིག་ཀྱང་ཡིན་པ་རེད་ལ་ ཡང་འདི་ལོའི་ཕྱི་ཟླ་བརྒྱད་པའི་ནང་ཐའེ་ལྦན་ནང་མཚོ་རླུང་གི་དྲག་ཆར་ཤུགས་ཆེ་རྒྱབ་ཏེ་མི་རྒྱུ་གཉིས་ལ་གནོད་སྐྱོད་ཚབས་ཆེ་བྱུང་བ་མ་ཟད་ འཛམ་གླིང་ཁྱོན་ཡོངས་ནང་དཔལ་འབྱོར་ཉམ་རྒུད་ཕྱིན་པས་ཀྱང་གོ་མིང་ཏང་ལ་གནོད་སྐྱོན་བཏང་འདུག གནད་དོན་དབྱེ་ཞིབ་པ་ཚོས་གལ་ཏེ་མི་མང་གིས་འོས་ཤོག་འཕེན་ཕྱོགས་དེ་མུ་མཐུད་ནས་གནས་ཚེ་ཕྱི་ལོ་༢༠༡༢་ལོར་སྲིད་འཛིན་མཱ་ཡིང་ཇུ་ཡང་བསྐྱར་སྲིད་འཛིན་ལ་འོས་འདེམས་རྒྱལ་ཁ་ཐོབ་རྒྱུར་ཉེན་ཁ་ཡོད་སྐོར་གསུངས་འདུག།