ཐེ་ཝན་གྱི་མཁའ་དབྱིངས་སུ་རྒྱ་ནག་གི་མཁའ་དམག་གནམ་གྲུ་བཅུ་དགུ་འཕུར་བསྐྱོད་བྱས་འདུག

འདི་ཚེས་༡གཟའ་ལྷག་པའི་ཉིན་ཐེ་ཝན་ལྷོ་ནུབ་གྱི་སྲུང་སྐྱོབ་མངའ་ཁུལ་མཁའ་དབྱིངས་སུ་འདས་པའི་ཆུ་ཚོད་ཉེར་བཞིའི་རིང་། རྒྱ་ནག་གི་མཁའ་དམག་གནམ་གྲུ་(J-10)རྟགས་ཅན་༡༩ཙམ་འཕུར་བསྐྱོད་བྱས་པ་ཐེ་ཝན་གྱིས་ཤེས་རྟོག་བྱུང་ཡོད་པ་དང་། ཐེ་ཝན་གྱི་ངོས་ནས་དེར་རྟོག་ཞིབ་བྱེད་བཞིན་ཡོད་ལུགས་ཐེ་ཝན་གྱི་བདེ་སྲུང་ལས་ཁུངས་ནས་སྤྱི་བསྒྲགས་སྤེལ་བ་རོཡེ་ཊར་གསར་ལས་ཁང་གིས་གནས་ཚུལ་སྤེལ་འདུག
ཡང་གོང་ཞུས་གནས་ཚུལ་ནང་། འདས་པའི་ལོ་ངོ་གསུམ་ཙམ་རིང་རྒྱ་ནག་གཞུང་གིས་ས་མཚོ་གནམ་གསུམ་ནས་ཐེ་ཝན་ལ་དམག་གིས་སྡིག་ར་ཡང་སེ་སྐུལ་གྱི་ཡོད་ཀྱང་། དེ་དག་རྒྱ་ནག་རང་ཉིད་ཀྱི་ས་སྲུང་ཆེད་ཡིན་ཚུལ་འགྲེལ་བཤད་རྒྱབ་པ་དང་ཆབས་ཅིག ཨ་རིས་གཙོས་རྒྱལ་ཁབ་གཞན་གྱིས་ཐེ་ཝན་གྱི་གནད་དོན་ཐད་ལ་ཐེ་བྱུས་བྱས་པ་ཡིན་ན་དེར་གཞིགས་པས་རྒྱ་ནག་གིས་གྲ་སྒྲིག་ཨང་སར་ཡོད་ཅེས་ཉེན་བརྡ་གཏོང་གི་ཡོད་པ་དང་མཉམ། ཉེ་བའི་དུས་སུ་རྒྱ་ནག་གིས་གནམ་མཚོ་གཉིས་ནས་ཐེ་ཝན་གྱི་མངའ་ཁོངས་སུ་སིམ་འཛུལ་བྱ་རྒྱུ་ཇེ་མང་དུ་སོང་ཡོད། རྒྱ་ནག་གིས་ཐེ་ཝན་མཚོ་འགག་ལ་འཐབ་འཛིང་གནམ་གྲུ་གཏོང་བའི་དམག་སྦྱོང་དེ་ཚོ་རྒྱུན་ལྡན་ལྟར་བརྩི་བཞིན་ཡོད། ལྷག་པར་དུ་ཨ་མི་རི་ཀའི་ངོས་ནས་རྒྱ་ནག་གཅིག་ཅེས་པའི་ལངས་ཕྱོགས་འཛིན་གྱི་ཡོད་ལུགས་གསུངས་པ་དང་ཆབས་ཅིག རྒྱ་ནག་གིས་ཐེ་ཝན་གྱི་བདེ་འཇགས་ཐད་ཉེན་ཁ་བཟོས་པ་ཡིན་ན་ཨ་རིས་དེར་གཞིགས་པས་ཐེ་ཝན་ལ་རྒྱབ་སྐྱོར་བྱེད་རྒྱུའི་ཆོད་སེམས་བརྟན་པོ་ཡོད་ལུགས་ཀྱང་གསུངས་ཀྱི་ཡོད་པ་རེད།
ལྷག་པར་ཐེ་ཝན་གྱི་གནད་དོན་ཐད་རྒྱ་ནག་གཞུང་གིས་ཉེན་བརྡ་བཏང་མིན་ལ་མ་བལྟོས་བར། འདས་པའི་ལོའི་ནང་ཨ་རིའི་གཞུང་འབྲེལ་མི་སྣ་དང་། གྲོས་ཚོགས་འོག་མའི་སྐབས་དེའི་ཚོགས་གཙོ་ལྕམ་ནེན་སི་པེ་ལོ་སི་(Nancy Pelosi)་མཆོག་གིས་སྣེ་ཁྲིད་པའི་སྐུ་ཚབ་ཚོགས་ཆུང་ཞིག་ཐེ་ཝན་ནང་འཚམས་གཟིགས་ཕེབས་པ་དེས་རྒྱ་ནག་ཁོང་ཁྲོ་ཤུགས་ཆེར་ལངས་ནས་ཐེ་ཝན་ཐོག་ཉེན་ཁ་བཟོ་བཞིན་ཡོད་པ་རེད།

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།