དཀར་མཛེས་སུ་བསྔོ་སྨོན་ཚོགས་པ།

༄༅༎བོད་ཁམས་དཀར་མཛེས་ཁུལ་དུ་བོད་མི་ཚོས་ས་ག་ཟླ་བའི་དུས་དང་བསྟུན་ནས་ད་བར་བོད་དོན་ཆེད་རང་ལུས་མེ་སྲེག་བཏང་གནང་མཁན་འདས་གསོན་ཡོངས་དང་། དེ་བཞིན་ཉེ་ཆར་གཡག་རྔ་ཁུལ་དུ་ས་འགུལ་གྱི་གནོད་འཚེ་ཕོག་ནས་རྐྱེན་འདས་སུ་ཕྱིན་པ་རྣམས་ཀྱི་ཆེད་དུ་བསྔོ་སྨོན་རྒྱ་ཆེ་ཞིག་ཚོགས་བཞིན་ཡོད་པ་རེད།
འདི་གའི་གསར་འགོད་པ་ནོར་བུ་དགྲ་འདུལ་ལགས་སུ་ས་གནས་ནས་གནས་ཚུལ་ངོ་སྤྲོད་གནང་བའི་ནང་། ས་ག་ཟླ་བའི་དུས་ཚིགས་ཁྱད་པར་ཅན་དེའི་རིང་ཁམས་དཀར་མཛེས་ཁུལ་གྱི་ས་ཁུལ་མང་པོ་ཞིག་ཏུ་ས་གནས་མི་མང་ཚོ་མཉམ་འཛོམས་ཀྱིས་ཆོས་ལུགས་ཀྱི་བྱེད་སྒོ་ཁག་སྤེལ་བཞིན་ཡོད་པ་མ་ཟད། ལྷག་པར་དུ་བོད་དོན་ཆེད་རང་ལུས་མེ་སྲེག་གཏོང་མཁན་ཚོས་གཙོས་ཉེ་ཆར་གཡག་རྔ་ཁུལ་དུ་ས་འགུལ་གྱི་གནོད་འཚེའི་འོག་རྐྱེན་འདས་སུ་ཕྱིན་པ་རྣམས་ཀྱི་ཆེད་བསྔོ་སྨོན་རྒྱ་ཆེ་ཞིག་སྤེལ་བཞིན་ཡོད་པ་དང་། དེའི་ཐོག་ས་གནས་མང་ཚོགས་ཧ་ཅང་མང་པོ་མཉམ་འཛོམས་བྱས་ཡོད་ཅིང་། དེ་མིན་ཆོས་ལུགས་རིས་མེད་ཀྱི་དགེ་འདུན་པ་དང་བཙུན་མ་ཡང་ཧ་ཅང་མང་པོ་ཕེབས་ཡོད་པའི་སྐོར་ངོ་སྤྲོད་གནང་འདུག།