བྱང་ཀོ་རི་ཡས་རྡུལ་ཕྲན་གོ་མཚོན་ཚོད་ལྟ་བྱས་པའི་དམིགས་ཡུལ།

༄༅༎བྱང་ཀོ་རི་ཡས་ཉེ་དུས་རྡུལ་ཕྲན་གོ་མཚོན་དང་གཞན་ཡང་མེ་ཤུགས་འཕུར་མདེལ་ཁག་ཅིག་ཚོད་ལྟ་བྱས་པ་དེ་གཙོ་བོ་ཡུལ་གྱི་མི་གཅིག་དབང་འཛིན་པ་ཀིམ་ཇོང་ཨིལ་གྱིས་རྒྱལ་སྲིད་ཀྱི་དབང་ཆ་རང་གི་བུ་ལ་སྤྲོད་ཐབས་སུ་དབང་ཆའི་འཐབ་རྩོད་དང་འབྲེལ་བའི་ངན་བྱུས་ཤིག་ཡིན་པ་ལྷོ་ཀོ་རི་ཡའི་བདེ་སྲུང་བློན་ཆེན་ལི་སང་ཧི་ཡིས་ཁ་ས་གསར་འགོད་པ་ཚོར་འགྲེལ་བརྗོད་གནང་ཡོད་པ་རེད།

དེ་ཡང་བདེ་སྲུང་བློན་ཆེན་ལི་ཡིས་ཀིམ་ཇོང་ཨིལ་གྱིས་རྒྱལ་སྲིད་ཀྱི་དབང་ཆ་རང་གི་བུ་ལ་རྩིས་སྤྲོད་བྱ་རྒྱུའི་དམིགས་ཡུལ་དེ་སྒྲུབ་ཐབས་སུ་དུས་ཡུན་དེའི་རིང་ཁོ་པས་རྡུལ་ཕྲན་གོ་མཚོན་དང་མེ་ཤུགས་འཕུར་མདེལ་ཚོད་ལྟ་བྱས་ཏེ་མངའ་ཁུལ་བརྟན་ལྷིངས་མེད་པ་བཟོ་གཞིའི་ཐ་ཞན་གྱི་སྤྱོད་ཚུལ་དེར་ཞུགས་ཡོད་ཅེས་སྐྱོན་བརྗོད་གནང་ཡོད་པ་རེད་ཡང་ལྷོ་ཀོ་རི་ཡས་ཆོ་སུན་ལི་སྦོ་ཞེས་པའི་གསར་ཤོག་གིས་ལྷོ་ཀོ་རི་ཡའི་གཞུང་གིས་ཨ་རིའི་སྲིད་གཞུང་ལ་བྱང་ཀོ་རི་ཡའི་གཞུང་གི་ཕྱི་རྒྱལ་དངུལ་ཁང་ཁག་ནང་དངུལ་བཅོལ་ཡོད་པའི་དངུལ་ཁང་གི་ཨང་གྲངས་ཁག་ཨ་མི་རི་ཀའི་གཞུང་ལ་ཕུལ་ཡོད་པ་དང་བྱང་ཀོ་རི་ཡས་རྒྱལ་སྤྱིའི་ཁྲིམས་སྲོལ་དང་རྒྱབ་འགལ་གྱིས་རྡུལ་ཕྲན་གོ་མཚོན་ཚོད་ལྟ་བྱས་པའི་གནད་དོན་ལ་ཨ་རིའི་སྲིད་གཞུང་གིས་དཔལ་འབྱོར་གྱི་ཉེས་ཆད་བསྐྱེལ་རྒྱུའི་དགོངས་པ་བཞེས་ཀྱི་ཡོད་སྐོར་དང་ཡིན་ནའི་བྱང་ཀོ་རི་ཡས་ཨ་རིའི་མི་སེར་ཡིན་པའི་གསར་འགོད་པ་གཉིས་འཛིན་བཟུང་བཙོན་བཅུག་བྱས་ཏེ་ཡོད་པའི་གནད་དོན་དེས་ཨ་རིའི་གཞུང་ལ་བྱང་ཀོ་རི་ཡར་ད་ལྟ་ལམ་སང་དཔལ་འབྱོར་གྱི་ཉེས་ཆད་གཏོང་རྒྱུའི་ཐད་བསྐྱར་དུ་རྣོ་བསམ་གཏོང་དགོས་པ་གྱུར་ཡོད་སྐོར་ཡང་གསུངས་ཀྱི་ཡོད་པ་རེད།