ཐའེ་ལྦན་སྲིད་འཛིན་ཟུར་པའི་བུས་འོས་བསྡུར་གཞུག་འཆར།

༄༅༎ཐའེ་ལྦན་གྱི་ཀའོ་སུང་གྲོང་ཁྱེར་ས་གནས་ཁྲིམས་ཁང་གིས་ཉེ་སྔོན་སྲིད་འཛིན་ཟུར་པ་ཁྲེན་ཧྲུ་བེན་གྱི་སྲས་ཁྲེན་ཁྲི་ཁྲུང་ཀའོ་སུང་ས་གནས་གྲོས་ཚོགས་ཀྱི་འཐུས་མིའི་ཞབས་སྟེགས་ནས་ཕྱིར་འབུད་བྱས་ཡོད་ཀྱང་རིང་མིན་རྒྱལ་ཡོངས་གྲོས་ཚོགས་ཀྱི་འོས་བསྡུའི་ནང་ཁོང་འོས་བསྡུའི་འགྲན་རྩོད་གནང་རྒྱུ་ཡིན་སྐོར་གསལ་བསྒྲགས་གནང་བཞག་༎

སྲིད་འཛིན་ཟུར་པ་ཁྲེན་ཧྲུ་བེན་གྱི་སྲས་ཁྲེན་ཁྲི་ཁྲུང་སྔ་ལོ་ཕྱི་ཟླ་༡༡པའི་ནང་ཐའེ་ལྦན་གྱི་གྲོང་ཁྱེར་ཆེ་ཤོས་གཉིས་པ་ཀའོ་སུང་ས་གནས་གྲོས་ཚོགས་ཀྱི་འཐུས་མིའི་ཁོངས་སུ་འོས་འདེམས་བྱུང་ཡོད་པ་རེད་ སྐབས་དེར་ཁོང་གིས་ས་གནས་གྲོས་ཚོགས་ཀྱི་འཐུས་མིའི་འགན་ཁུར་བཞེས་པ་བརྒྱུད་ཁོང་གི་ཡབ་ཁྲེན་ཧྲུ་བེན་ལ་ལྐོག་བཟས་ཀྱི་ནག་ཉེས་ཕོག་པའི་མིང་ངན་གཙང་སེལ་བཟོ་རྒྱུའི་དམིགས་ཡུལ་གསལ་འདོན་བྱས་ཡོད་པ་རེད་ འོན་ཀྱང་ཟླ་བ་སྔོན་མ་ཀའོ་སུང་གྲོང་ཁྱེར་ས་གནས་ཁྲིམས་ཁང་ནས་སྲིད་འཛིན་ཟུར་པ་ཁྲེན་ཧྲུ་བེན་ལ་ལྐོག་བཟས་དང་འབྲེལ་བའི་ནག་ཉེས་ཁྲིམས་བཤེར་བྱེད་པའི་སྐབས་ཁྲེན་ཁྲིན་ཁྲུང་གིས་གནས་ཚུལ་རྗུན་བཤད་བྱས་པའི་ནག་ཉེས་འོག་ཟླ་བ་གསུམ་རིང་བཙོན་འཇུག་གི་ཁྲིམས་ཐག་བཅད་པ་དང་ཆབས་ཅིག་ས་གནས་གྲོས་ཚོགས་ནས་ཕྱིར་འབུད་བཏང་ཡོད་པ་རེད་ རེས་གཟའ་ཕུར་བུའི་ཉིན་ཁྲེན་ཁྲིན་ཁྲུང་གིས་ ༢༠༡༢ལོའི་ཕྱི་ཟླ་༡པའི་ཚེས་༡༤ཉིན་ ཐའེ་ལྦན་གྱི་རྒྱལ་ཡོངས་གྲོས་ཚོགས་ཀྱི་འོས་བསྡུའི་ནང་ ཁོང་མཉམ་ཞུགས་གནང་རྒྱུ་ཡིན་སྐོར་མ་ཟད་ཀའོ་སུང་གྲོང་ཁྱེར་ས་གནས་གྲོས་ཚོགས་ནས་ཁོང་ཕྱིར་འབུད་བྱས་པ་དེ་ ཆབ་སྲིད་ཀྱི་གནོན་བཙིར་དང་མིང་ངན་ཁ་གཡོག་བྱས་པ་ཡིན་ཚུལ་དང་ ཁོང་རྒྱལ་ཡོངས་གྲོས་ཚོགས་ཀྱི་འཐུས་མིའི་ཁོངས་སུ་འོས་བསྡུར་ཞུགས་རྒྱུ་དེ་བཞིན་ དྲང་བདེན་མ་ཡིན་པའི་ཁྲིམས་བཤེར་རིགས་ལ་གདོང་ལེན་གནང་རྩིས་ཡིན་སྐོར་གསལ་འདོན་གནང་བཞག་༎