གཞུང་འབྲེལ་གདུང་སེམས་མཉམ་བསྐྱེད་ལས་འགུལ་ཉིན་བཞི་པ།

༄༅༎རྒྱ་གར་རྒྱལ་ས་ལྡི་ལིའི་ནང་སྤེལ་བཞིན་པའི་གཞུང་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་ཀྱི་ཉིན་བཞི་པ་སྟེ། འདི་ཚེས་ ༢༡ གི་སྔ་དྲོ་ཆུ་ཚོད་༡༠ ཐོག་རམ་ལི་ལཱ་ཐང་ཆེན་ནས་འགོ་འཛུགས་ཀྱིས་ཇན་ཏར་མན་ཏར་བར། གཞོན་སྐྱེས་རྣམས་ཀྱིས་སྣེ་ཁྲིད་འོག་ཞི་བའི་རྔམ་སྟོན་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་པ་དང་། ཁྲོམ་སྐོར་སྐབས་མང་ཚོགས་ཀྱིས་འཚོར་བ་ཤུགས་ཆེན་པོས་སྐད་འབོད་འདྲ་མིན་བྱས་ནས་ཉིན་གུང་ཆུ་ཚོད་༡༡ དང་སྐར་མ་༢༠ ཙམ་དུ་ཇན་ཏར་མན་ཏར་ས་གནས་སུ་འབྱོར་ཡོད་པ་རེད།
གནས་ཚུལ་བཀོད་གསལ་ལ་གཞིགས་ན། ཉིན་དེར་བོད་མི་གཞོན་སྐྱེས་ཚོས་ སྟོད་ཐུང་དང་གོས་ཐུང་ནག་པོ་གྱོན་ནས་རྔམ་སྟོན་ཁྲོམ་སྐོར་བྱས་པའི་སྐབས།  ༧གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག  བོད་ནང་མནར་གཅོད་མཚམས་འཇོག་དགོས་ཞེས་སྐད་འབོད་ཤུགས་ཆེ་བྱས་ཡོད་པ་དང་ཆབས་ཅིག ཡང་གཞོན་སྐྱེས་ཕོ་མོ་བཅུས་བོད་ནང་རང་ལུས་མེར་བསྲེགས་བཏང་ནས་རྩ་དོན་ཆེད་འཐབ་རྩོད་གནང་མཁན་དེ་དག་གི་ཚབ་ཞུས་ནས། གཟུགས་པོ་ལ་ཆུ་རས་ཙམ་ལས་གང་ཡང་མ་གྱོན་པར་ཚོན་དམར་བྱུགས་པ་དང་། གཟུགས་པོའི་མདུན་ངོས་སུ་སྐུ་གཟུགས་མེར་བསྲེགས་གཏོང་བཞིན་པའི་མཚོན་དོན་གྱི་རི་མོ་དང་། རྒྱབ་ངོས་སུ་བོད་ནང་རང་དབང་དགོས་པའི་བརྗོད་ཚིགས་འདྲ་མིན།  གདོང་ལ་ཚང་མས་བོད་ཀྱི་རྒྱལ་དར་བྲིས་ནས་ཁྲོམ་སྐོར་བའི་མདུན་དུ་ཐོན་ནས་སྐད་འབོད་ཤུགས་ཆེ་བརྒྱབ་ཡོད་སྐོར་དང༌། ཡང་འདས་པའི་ཉིན་གསུམ་གྱི་ལས་འགུལ་འདིའི་ནང་དུ་བོད་མི་སེར་སྐྱ་མང་པོས་མཉམ་ཞུགས་གནང་ཡོད་པ་མ་ཟད། དེ་དག་གི་ཁོངས་སུ་རྐང་པ་མེད་པར་འཁར་རྒྱུག་ཁུར་བའི་ནད་པ་ཡང་མཉམ་ཞུགས་བྱས་ཡོད་པའི་གནས་ཚུལ་བཀོད་འདུག།