ཐའེ་ཝན་དུ་ཉམས་ཞིབ་པ་དང་མཁས་པ་སོགས་མི་གྲངས་ ༡༠༠ ལྷག་ལྷན་འཛོམས་ཀྱིས་གངས་ལྗོངས་གླེང་སྟེགས་འཚོགས་གཏན་འཁེལ་འདུག

ཐའེ་ཝན་བོད་ཀྱི་༸སྐུ་ཚབ་དོན་གཅོད་ལས་ཁུངས་དང་། ཐའེ་ཝན་བོད་རིགས་སྤྱི་མཐུན་ཚོགས་པ། དེ་བཞིན་ཐའེ་ཝན་གྱི་གཞུང་ཁོངས་མིན་པའི་ཚོགས་པ་ཁག་བཅས་ཐུན་མོང་གིས་གོ་སྒྲིག་འོག རིང་མིན་ཕྱི་ཟླ་ ༡ པོའི་ཚེས་ ༡༤ ནས་ ༡༥ བར་ཐའེ་ཝན་རྒྱལ་ས་ཐའེ་པེ་རུ་ཉིན་གྲངས་གཉིས་ཀྱི་རིང ༼གངས་ལྗོངས་གླེང་སྟེགས། ༢༠༢༤༽ཞེས་པའི་བརྗོད་གཞིའི་འོག་ཐའེ་ཝན་དང་ཧོང་ཀོང་། བོད་མི། སོག་པོ། མིན་ཇུ། ཕྱིར་སྡོད་རྒྱ་རིགས་སོགས་ཉམས་ཞིབ་པ་དང་མཁས་པ། བོད་དོན་རྒྱབ་སྐྱོར་བ་བཅས་མི་གྲངས་ ༡༠༠ ལྷག་ལྷན་འཛོམས་ཐོག་ཐའེ་ཝན་མང་གཙོའི་ཆབ་སྲིད་ཀྱིས་རྒྱ་ནག་གི་ཆབ་སྲིད་འགྱུར་ལྡོག་ལ་ལམ་འཁྲིད་ཇི་ལྟར་བྱེད་དགོས་ཚུལ་སྐོར་རྒྱལ་སྤྱིའི་རང་བཞིན་གྱི་བགྲོ་གླེང་འཚོགས་གཏན་འཁེལ་འདུག

དེའི་ཐད་ཐའེ་ཝན་བོད་ཀྱི་༸སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། ཐའེ་ཝན་ནས་ཁ་པར་བརྒྱུད་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། ད་རེས་ཚོགས་འདུ་དེའི་དམིགས་ཡུལ་གཙོ་བོ་ནི། ཐའེ་ཝན་གྱི་མང་གཙོའི་ཆབ་སྲིད་དང་། བོད་མིའི་སྒྲིག་འཛུགས་ཀྱི་དམངས་གཙོའི་ལམ་ལུགས་སོགས་ཀྱིས་མ་འོངས་རྒྱ་ནག་མང་གཙོའི་རྒྱལ་ཁབ་ཅིག་ལ་འགྲོ་ཐུབ་པའི་ཐུན་མོང་གི་གཞི་རྟེན་འཚོལ་རྒྱུ་ཙམ་མ་ཟད། དུས་རབས་གསར་པའི་འགྱུར་ལྡོག་ལ་མཉམ་རུབ་ཀྱིས་གདོང་ལེན་བྱ་ཕྱོགས་སོགས་ཀྱི་ཐད་གོ་བསྡུར་སྦྱང་བཤེར་གནང་རྒྱུ་ཡིན་པ་འགྲེལ་བརྗོད་གནང་བྱུང་།

ད་རེས་རྒྱལ་སྤྱིའིརང་བཞིན་གྱི་བགྲོ་གླེང་ལྷན་ཚོགས་དེའི་ཐོག་བོད་མིའི་སྒྲིག་འཛུགས་བཀའ་ཤག་སྐབས་ ༡༦ པའི་ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་ཉམས་ཞིབ་པ། དེ་བཞིན་ཨ་རི་དང་ཡུ་རོབ་སོགས་ནས་ཉམས་ཞིབ་པ་དང་དམངས་གཙོ་དོན་གཉེར་བ། མཁས་པ་སོགས་མཉམ་ཞུགས་གནང་གི་ཡོད་འདུག

ཡང་རིང་མིན་ཕྱི་ཟླ་ ༡ པོའི་ཚེས་ ༡༣ ཉིན་ཐའེ་ཝན་རྒྱལ་ཡོངས་སྲིད་འཛིན་གྱི་འོས་བསྡུ་དངོས་གཞི་དེ་འགོ་ཚུགས་གནང་གི་ཡོད་པ་དང་། འོས་བསྡུ་དེས་བོད་མིར་ཤུགས་རྐྱེན་ཇི་ལྟར་ཐེབས་མིན་སྐོར་ཐའེ་ཝན་སྐུ་ཚབ་དོན་གཅོད་ལ་བཀའ་འདྲི་ཞུས་པར། ད་ལྟའི་གཞུང་འཛིན་ཆབ་སྲིད་ཚོགས་པ་སྟེ། དམངས་གཙོ་ཡར་ཐོན་ཚོགས་པ་ནི་འདས་པའི་ལོ་ ༨ རིང་༸སྐུ་ཚབ་དོན་གཅོད་ཚུད་པའི་བོད་མི་དང་འབྲེལ་བ་བཟང་པོ་བྱུང་ཡོད་པས། གཞུང་འཛིན་ཆབ་སྲིད་ཚོགས་པ་དེ་ཉིད་ལ་སླར་ཡང་རྒྱལ་ཁབ་ཐོབ་པ་ཡིན་ན། བོད་མིར་བཟང་ཕྱོགས་ཀྱི་ཤུགས་རྐྱེན་ཡོང་བའི་རེ་བ་ཡོད་ཅེས་གསུངས་བྱུང་། 

གཞན་ཡང་ཁ་སྔོན་ཕྱི་ལོ་ ༢༠༢༣ ལོའི་ལོ་མཇུག་ཏུ་ཐའེ་ཝན་དམངས་གཙོ་ཡར་ཐོན་ཆབ་སྲིད་ཚོགས་པའི་སྲིད་འཛིན་གྱི་འོས་མི་ལེ་ཆིན་ཏི་(Lai Ching-Te)ལགས་ཀྱིས། འཛམ་གླིང་མི་མང་གི་ཐའེ་ཝན་གྱི་འོས་བསྡུར་དོ་སྣང་གནང་བཞིན་ཡོད་པས། ཐའེ་ཝན་མི་མང་ནི་དམངས་གཙོའི་ལམ་བུའི་ཕྱོགས་སུ་མུ་མཐུད་བསྐྱོད་པའམ། ཡང་ན་རྒྱ་ནག་གཅིག་གི་སྲིད་ཇུས་འོག་གནས་རྒྱུ་ཡིན་མིན་ཐད་འདེམས་གསེས་བྱ་དགོས་ཞེས་བརྗོད་ཡོད་པ་མ་ཟད་། དམངས་གཙོ་ཡར་ཐོན་ཆབ་སྲིད་ཚོགས་པས།  འདི་ཚེས་ ༩ ཉིན་གསར་འགོད་གསལ་བསྒྲགས་ཤིག་གི་ཐོག་ཐའེ་ཝན་ནི་རང་བཙན་རྒྱལ་ཁབ་ཅིག་ཡིན་པ་སླར་ཡང་གསལ་བསྒྲགས་སྤེལ་འདུག འོན་ཀྱང་། རྒྱ་ནག་གཞུང་གིས་ལངས་ཕྱོགས་དེར་ངོས་ལེན་བྱེད་ཀྱི་མེད་པ་རེད།

གསར་འགོད་པ། བློ་བཟང་དགེ་ལེགས།         
རྩོམ་སྒྲིག་པ།  ཡེ་ཤེས་ཟླ་བ། 
དྲྭ་ཐོག་སྤེལ་མཁན། ཡེ་ཤེས་ཟླ་བ།