སྲིད་སྐྱོང་མཆོག་ཁེ་ནཱ་ཊ་དང་ཨ་རིར་ཕེབས་འཆར་འདུག

སྲིད་སྐྱོང་བློ་བཟང་སེང་གེ་མཆོག་རྡ་རམ་ས་ལ་ནས་ཕེབས་ཐོན་གྱིས་ཨ་མེ་རི་ཀ་དང་ཁེ་ན་ཌའི་ནང་འཚམས་གཟིགས་ལ་ཕེབས་འཆར་འདུག
དེ་ཡང་དབུས་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་དོན་ལྟར་ན། དེ་རིང་ཕྱི་ཚེས་༡༩་ཉིན་སྲིད་སྐྱོང་བློ་བཟང་སེང་གེ་མཆོག་རྒྱ་གར་བྱང་ཕྱོགས་བཞུགས་སྒར་རྡ་རམ་ས་ལ་ནས་རྒྱལ་ས་ལྡི་ལིའི་ཕྱོགས་སུ་ཕེབས་ཐོན་གནང་ཡོད་པ་དང་། སང་ཉིན་ཕྱི་ཚེས་༢༠་ཉིན་ལྡི་ལིར་གནད་ཡོད་མི་སྣ་ཁག་དང་མཇལ་འཕྲད་གནང་རྒྱུ་དང་། དེ་ནས་ཚེས་༢༡་ཉིན་ཨ་མི་རི་ཀའི་ཤར་ཕྱོགས་མངའ་སྡེ་ནེའུ་ཇར་སིའི་གྲོང་ཁྱེར་Newarkནང་ཕེབས་འབྱོར་གནང་གི་ཡོད་པ་དང་། ཉིན་དེ་རང་ལ་ཁེ་ན་ཌའི་གྲོང་ཁྱེར་Halifaxནང་ཕེབས་འབྱོར་གནང་ནས་ཕྱི་ཚེས་༢༡་ནས་༢༦་བར་གྲོང་ཁྱེར་དེའི་ནང་Halifax International Security Forumཞེས་རྒྱལ་སྤྱིའི་བདེ་འཇགས་ཀྱི་གླེང་སྟེགས་ཞེས་པའི་ལྷན་ཚོགས་ནང་ལྷན་བཞུགས་གནང་རྒྱུ་དང་། ཁེ་ན་ཌའི་གྲོང་ཁྱེར་Montrealདང་། Ottawaབཅས་སུ་ཕེབས་ནས་བོད་མི་རྣམས་ལ་གསུང་བཤད་གནང་རྒྱུ་དང་གནད་ཡོད་མི་སྣ་ཁག་དང་མཇལ་འཕྲད་གནང་འཆར་འདུག དེ་རྗེས་སྲིད་སྐྱོང་མཆོག་ཨ་མེ་རི་ཀའི་བྱང་ཕྱོགས་མངའ་སྡེ་Vermont ལ་ཕེབས་ནས་ཁུལ་དེར་གནས་ཞུགས་བོད་མི་རྣམས་ལ་གསུང་བཤད་གནང་རྒྱུ་དང་། མངའ་སྡེའི་སྤྱི་ཁྱབ་Peter Shumlinམཆོག་དང་མཇལ་འཕྲད་གནང་འཆར་འདུག དེ་བཞིན་ཕྱི་ཟླ་༡༡་པའི་ཚེས་༣༠་ནས་ཕྱི་ཟླ་༡༢་པའི་ཚེས་༥་བར་ཨ་རིའི་མངའ་སྡེ་Wisconsinདང་། གྲོང་ཁྱེར་ཅི་གྷ་གོ མངའ་སྡེ་New Mexicoའི་རྒྱལ་ས་Santa Feདེ་ནས་གྲོང་ཁྱེར་བྷོསུ་ཀྲོན་བཅས་ནང་གི་བོད་མི་རྣམས་ལ་གསུང་བཤད་གནང་རྒྱུ་མ་ཟད། གྲོས་ཚོགས་འཐུས་མི་གཙོས་པའི་གནད་ཡོད་མི་སྣ་ཁག་དང་མཇལ་འཕྲད་གནང་འཆར་འདུག དེ་ནས་ཕྱི་ཟླ་༡༢་པའི་ཚེས་༦།༧་ཉིན་བྷོ་སི་ཀྲོན་ནས་སུས་སིའི་གྲོང་ཁྱེར་Zurich བརྒྱུད་རྒྱ་གར་གྱི་ཕྱོགས་སུ་ཕེབས་ཐོན་གནང་རྒྱུ་རེད་འདུག

གསར་འགོད་པ་བསོད་ནམས་ལྷ་མོ།