༢༠༢༠ལོ་ནི་བོད་དོན་གཉན་འཕྲང་ཅན་གྱི་ལོ་དུས་ཡིན།

སྲིད་སྐྱོང་མཆོག་གིས་མ་འོངས་༢༠༢༠ལོ་ནི་བོད་ཀྱི་གནད་དོན་ཆ་ནས་གཉན་འཕྲང་ཅན་གྱི་ལོ་དུས་ཤིག་ཆགས་ཀྱི་ཡོད་པའི་དྲན་སྐུལ་གནང་འདུག
དེ་ཡང་སྲིད་སྐྱོང་བློ་བཟང་སེང་གེ་མཆོག་དེང་སྐབས་རྒྱ་གར་འབྲས་ལྗོངས་ཁུལ་དུ་གཞུང་འབྲེལ་ཕྱོགས་བསྐྱོད་གནང་བཞིན་པ་དང་། ཁ་ས་ཚེས་༤ཉིན་འབྲས་ལྗོངས་ས་གནས་ཀྱི་བོད་མི་མང་ཚོགས་ལ་བཀའ་སློབ་གསུངས་བཤད་གནང་སྐབས། མ་འོངས་༢༠༢༠ལོར་རྒྱ་ནག་གིས་བོད་ལ་བཙན་འཛུལ་བྱས་ནས་ལོ་ངོ་༧༠ཐམ་པ་ཧྲིལ་པོ་འཁོར་གྱི་ཡོད་པ་དང་། དུས་ཚོད་དེའི་སྐབས་རྒྱ་ནག་གིས་བོད་ནང་བཙན་འཛུལ་མ་བྱས་གོང་བོད་རང་བཙན་རྒྱལ་ཁབ་ནང་འཚར་ལོངས་བྱུང་བའི་མི་ཐོག་མང་ཆེ་བ་རྗོགས་འགྲོ་གིན་ཡོད་སྟབས་བཙན་བྱོལ་ནང་སྐྱེས་ནས་འཚར་བ་དང་། བོད་སྐོར་དྲན་བཤད་མེད་པའི་མི་ཐོག་དང་། དེ་བཞིན་བོད་ནང་། རྒྱ་ནག་གི་བཙན་གནོན་འོག་འཚར་ལོངས་བྱས་པའི་མི་ཐོག་གསར་པའི་བོད་མིའི་འགོ་འཁྲིད་རྣམས་ལ་དངོས་ཡོད་བོད་ཀྱི་གནད་དོན་ཐད། གདོང་ལེན་བྱ་དགོས་པའི་འགག་རྩའི་དུས་སྐབས་ཤིག་ཞིག་ཆགས་ཡོད་པས་བོད་དོན་འཐབ་རྩོད་ཀྱི་ལས་འགུལ་རྒྱུན་འཁྱོངས་ཆེད་བོད་མི་རྒན་རབས་རྣམས་མི་རབས་གསར་པའི་ན་གཞོན་བོད་རིགས་རྣམས་ལ་བོད་ཀྱི་ལོ་རྒྱུས་དང་རིག་གཞུང་སྐད་ཡིག་བཅས་པར་རྩིས་སྤྲོད་བྱ་གལ་ཆེ་བའི་སྐོར་ནན་སྐུལ་གནང་འདུག ད་དུང་༢༠༢༠བོད་ཀྱི་གནད་དོན་ཆ་ནས་དུས་ཚོད་དེ་བཞིན་གཉན་འཕྲང་ཅན་གྱི་ལོ་དུས་ཤིག་ཆགས་ཀྱི་ཡོད་པའི་སྐོར་དྲན་སྐུལ་གནང་འདུག སྲིད་སྐྱོང་བློ་བཟང་སེང་གེ་མཆོག་གིས་ད་རེས་འབྲས་ལྗོངས་ཁུལ་དུ་གཞུང་འབྲེལ་ཕྱོགས་ཕེབས་སྐབས་ཁ་ས་འབྲས་ལྗོངས་མངའ་སྡེའི་སྤྱི་ཁྱབ་དྲུང་ཆེ་རིན་ཆེན་དབང་མོ་ལགས་དང་ཆོས་རིག་དྲུང་ཆེ་བསྟན་འཛིན་དགེ་ལེགས་རིན་པོ་ཆེ་མཇལ་འཕྲད་གནང་ཐོག་ད་བར་རྒྱ་གར་གཞུང་མང་སྤྱི་དང་། ལྷག་པར་འབྲས་ལྗོངས་མངའ་སྡེའི་གཞུང་མང་གཉིས་ནས་དེ་ཁུལ་དུ་གནས་སྡོད་བོད་མི་སྐྱབས་བཅོལ་བ་ཚོར་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་ལེགས་སྲོལ་ཞུས་པ་དང་སྦྲགས་མ་འོངས་པར་མུ་མཐུད་རྒྱབ་སྐྱོར་དང་རོགས་རམ་རྒྱ་ཆེ་ཡོང་བའི་འབོད་སྐུལ་ཞུས་འདུག
ཕྱི་ཚེས་༤ཉིན་ཉེ་ཆར་འབྲས་ལྗོངས་ཀྱི་རྒྱལ་སྲས་འཇིགས་བྲལ་ཚེ་དབང་རྣམ་རྒྱལ་མཆོག་དགོངས་པ་རྫོགས་པ་དེར་བཀའ་ཤག་གི་མཚན་ཐོག་ནས་མྱ་ངན་དང་ཐུགས་གསོའི་འཚམས་འདྲི་ཡང་གནང་ཡོད་པ་རེད།
གསར་འགོད་པ་དོན་གྲུབ་རྣམ་རྒྱལ།