ཆབ་མདོ་དང་གཞིས་རྩེ་གཉིས་གྲོང་ཁྱེར་ལ་བསྒྱུར་རྒྱུ་ཡིན་འདུག

ཆབ་མདོ

རྒྱ་ནག་གཞུང་གིས་བོད་ཀྱི་ཤར་ཁུལ་ཆབ་མདོ་ས་ཁུལ་དང་ནུབ་ངོས་གཞིས་ཀ་རྩེ་ས་ཁུལ་གཉིས་གྲོང་ཁྱེར་གྱི་གནས་བབ་ལ་བསྒྱུར་རྒྱུ་ཡིན་འདུག
དེ་ཡང་ཚེས༣ཉིན་རྒྱ་ནག་གིས་གནས་ཚུལ་སྤེལ་དོན། རྒྱ་ནག་རྒྱལ་སྲིད་སྤྱི་ཁྱབ་ཁང་གིས་སྔ་རྗེས་སུ་བོད་རང་སྐྱོང་ལྗོངས་ཀྱི་གཞིས་ཀ་རྩེ་དང་། ཆབ་མདོ་ས་ཁུལ་གཉིས་སོ་སོར་གཞིས་རྩེ་གྲོང་ཁྱེར་དང་ཆབ་མདོ་གྲོང་ཁྱེར་དུ་མིང་བསྒྱུར་བྱེད་རྒྱུའི་འབྲེལ་ཡོད་ཡིག་ཆར་ཆོག་མཆན་བཀོད་པ་དང་། ཟླ་༡༡་ཚེས་༢་ཉིན་བོད་རང་སྐྱོང་ལྗོངས་ཀྱི་གྲོང་ཁྱེར་བསྐྲུན་པའི་ལས་ཀའི་འགོ་ཁྲིད་ཚོ་ཆུང་གིས་ཚོགས་འདུ་བསྐོང་ཚོགས་བྱས་ཏེ་གཞིས་ཀ་རྩེ་དང་ཆབ་མདོ་ས་ཁུལ་གཉིས་གྲོང་ཁྱེར་གྱི་གནས་བབ་ལ་བསྒྱུར་རྒྱུའི་གནས་ཚུལ་ཁྱབ་བསྒྲགས་དང་འབྲེལ་ཡོད་ལས་ཀ་བཀོད་སྒྲིག་བྱས་ཡོད་འདུག  གནས་ཚུལ་ནང་མུ་མཐུད་བཀོད་ཡག་ལ། ད་རེས་བོད་ཀྱི་ས་ཁུལ་ཁག་གཉིས་ཀྱི་གནས་བབ་བསྒྱུར་བ་བཏང་བ་དེ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བོད་ཀྱི་ལས་དོན་ལ་མཐོང་ཆེན་བྱེད་ཀྱི་ཡོད་ལུགས་དང་། བོད་འཕེལ་རྒྱས་གཏོང་རྒྱུའི་གལ་ཆེའི་བྱ་ཐབས་བཟུང་བ་ཞིག་ཡིན་ལུགས་སོགས་འཁོད་འདུག
རྒྱ་ནག་གཞུང་གིས་བོད་རང་སྐྱོང་ལྗོངས་ཟེ་འབོད་པའི་ཁོངས་སུ་ད་ཡོད་གྲོང་ཁྱེར་གཅིག་དང་ས་ཁུལ་ཁག་དྲུག་ལ་དབྱེ་ཡོད་པ་དེ་ནི་ལྷ་ས་གྲོང་ཁྱེར་དང་། ཆབ་མདོ། ཉིང་ཁྲི།  ལྷོ་ཁ། གཞིས་ཀ་རྩེ། མངའ་རིས། ནག་ཆུ་ས་ཁུལ་བཅས་ཡིན་པ་རེད།

གསར་འགོད་པ་འཇམ་དཔལ་ཕུན་ཚོགས།