བོད་མདོ་སྨད་གཙོད་གྲོང་ཁྱེར་དུ་རང་ལུས་མེ་སྲེག

༄༅༎བོད་མདོ་སྨད་གཙོད་གྲོང་ཁྱེར་ནང་བོད་མི་སངས་རྒྱས་རྒྱ་མཚོ་ཞུ་བ་ཞིག་གིས་རྒྱ་ནག་གཞུང་ལ་ངོ་རྒོལ་མཚོན་ཆེད་རང་ལུས་མེ་སྲེག་བཏང་འདུག
ས་གནས་དེ་གའི་མིས་ངོ་སྤྲོད་གནང་བ་ལྟར་ན། སྤྱི་ཟླ་༡༠་ཚེས་༦་གི་སྔ་དྲོའི་བོད་ནང་གི་ཆུ་ཚོད་༡༢ ཙམ་ལ་བོད་མདོ་སྨད་གཙོད་གྲོང་ཁྱེར་གྱི་རྡོ་དཀར་དགོན་པའི་མཆོད་རྟེན་གྱི་ཉེ་འགྲམ་དུ། རྫེ་རོ་སྡེ་བའི་སྐྱེས་པ་རང་ལོ་༢༧ ཡིན་པའི་སངས་རྒྱས་རྒྱ་མཚོ་ཞུ་བ་ཞིག་གིས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་པ་དང་། བོད་རང་དབང་ཡིན་པ་སོགས་ཀྱི་སྐད་འབོད་རྒྱག་བཞིན་རྒྱ་ནག་ལ་གཞུང་ལ་ངོ་རྒོལ་ཆེད་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང༌། དེ་མ་ཐག་དགོན་པའི་དགེ་འདུན་པ་རྣམས་ཀྱིས་སྐུ་ཕུང་དགོན་པར་ཁུར་ནས་གྲྭ་མང་འདུ་འཛོམས་ཀྱིས་སྨོན་ལམ་གསུང་བཞིན་ཡོད་འདུག
སངས་རྒྱས་རྒྱ་མཚོ་ལགས་ནི་ཕ་མགོན་པོ་དོན་གྲུབ་དང་། མ་མགོན་པོ་མཚོ་གཉིས་ཀྱི་བུ་ཡིན་པ་དང༌། ཁོང་དང་ཁོང་གི་བཟའ་ཟླ་རྡོ་རྗེ་སྐྱིད་གཉིས་ལ་བུ་རྡོ་རྗེ་དོན་གྲུབ་ལོ་༧ དང་། བུ་མོ་ཏིང་འཛིན་མཚོ་ལོ་༦་བྱས་པ་བཅས་གཉིས་ཡོད་འདུག །ཁོང་ནི་བོད་ནང་ནས་རྒྱ་ནག་གཞུང་ལ་ངོ་རྒོལ་ཆེད་རང་ལུས་མེ་སྲེག་གཏོང་མཁན་༥༤་པ་དེ་ཡིན་པ་རེད།།