མཚོ་སྔོན་པོའི་མཐའ་འཁོར་གད་སྙིགས་ཀྱིས་ཁེངས་བཞིན་པ།

མཚོ་སྔོན་ཞིང་ཆེན་ནང་ཡོད་པའི་བོད་ཀྱི་མཚོ་སྔོན་པོའི་མཐའ་འཁོར་དུ་གད་སྙིགས་ཕུང་གསོག་ཐེབས་ཡོད་འདུག
དེ་རིང་ཟླ་༡༠་ཚེས་༨ཉིན་རྒྱ་ནག་བོད་ཀྱི་དྲ་རྒྱ་ཞེས་པའི་ཐོག་ཤིན་ཅིང་ཚགས་པར་ཐོག་གི་་གནས་ཚུལ་ཞིག་བཀོད་སྤེལ་བྱས་འདུག་པ་དེའི་ནང་། མཚོ་སྔོན་པོའི་མཐའ་འཁོར་སྤྱི་ལེ་༣༦༠་ནང་འགྱིག་ཤོག་སོགས་གད་སྙིགས་ཀྱིས་ཁེངས་པ་དེ་དག་གྲོང་མིའི་སྡོད་ཁྱིམ་དང་བར་ཐག་མི་ཊལ་༢༠༠་ཙམ་ལས་མེད་པ་རེད།
ཉེ་ཆར་རྒྱ་ནག་གི་རྒྱལ་བཙུགས་དུས་ཆེན་མཇུག་བསྒྲིལ་ཙམ་ཡིན་པ་དང་གྲགས་ཅན་གྱི་མཚོ་སྔོན་པོའི་ཁུལ་དུ་ཡུལ་སྐོར་སྤྲོ་འཆམ་དུ་ཡོང་མཁན་ཐད་གཞུང་ཕྱོགས་ཀྱིས་བསྡོམས་རྩིས་བྱས་དོན་ལ། ཟླ་༡༠་ཚེས་༡་ཉིན་ཚོུད་དང་པོ་ནས་ཚོུད་༦་བར་མཚོ་སྔོན་པོའི་ཁུལ་དུ་ཡུལ་བསྐོར་བ་མི་ཐེངས་༥༣༤༣་ཙམ་ཟིན་པས་ན་ནིང་གི་དུས་མཚུངས་པ་ལས་བརྒྱ་ཆ་༢༠་བརྒལ་ཡོད་པ་རེད།   
ལོ་ན་༥༠་ཙམ་སོན་པའི་འབྲོག་པ་ཞིག་གིས་བཤད་ཡག་ལ། ཁོང་རང་ལོ་ན་གཞོན་པའི་སྐབས་མཚོའི་ཉེ་འགྲམ་དུ་སྤང་ལྗོངས་ཀྱིས་ཁྱབ་ཅིང་། དབྱར་དུས་སུ་མེ་ཏོག་སྣ་ཚོགས་ཀྱིས་རྣམ་པར་བཀྲ་བའི་ས་གདན་བཏིངས་བ་དང་གཉིས་སུ་མ་མཆིས་པ་ཡོད། ད་ཆ་དེ་འདྲ་བའི་ས་ཆ་ཧ་ལམ་མཐོང་རྒྱུ་མེད་པའི་སྐོར་བཤད་འདུག
གུང་ཧོ་རྫོང་གི་ཅང་ཤི་གྲོག་རོང་ཁུལ་དུ་གད་སྙིགས་ཕུང་གསོག་ཐེབས་ནས་བཞག་ཡོད་པ་དེ་གྲོང་མིའི་སྡོད་ཁྱིམ་དང་བར་ཐག་མི་ཊལ་ཉིས་བརྒྱ་ལས་མེད་ཅིང་། གལ་སྲིད་རླུང་བུ་འཚུབ་པའི་སྐབས་གད་སྙིགས་གང་སར་འཁྱེར་ནས་འབྲོག་པའི་སྡོད་ཁྱིམ་དང་། རྩྭ་ཐང་སོགས་ལ་ཁྱབ་ཏེ་སྒོ་ཕྱུག་སེམས་ཅན་གྱིས་བཟས་ཏེ་སེམས་ཅན་གྱི་ཁོག་པའི་ནང་གད་སྙིགས་ཀྱི་རོ་ཏོ་ཁེངས་ནས་བསྡད་པའི་སྐོར་གྲོང་མི་ཨ་བཀྲ་ཤིས་ཟེར་བས་གསར་འགོད་པར་འགྲེལ་བརྗོད་བྱས་ཡོད་འདུག གྲོང་ཚོ་དེའི་མི་རྒན་པ་བདུན་དང་ཕྲུ་གུ་གཅིག་བཅས་ཀྱིས་མུའུ་བཅུ་ཙམ་ཡོད་པའི་ས་ཆའི་ནང་གད་སྙིགས་རྒྱ་མ་༣༠༠་ཙམ་སྒྲུག་ཡོད་པ་དེའི་ནང་བཟའ་སྣོད་ལྕགས་ཀྲིང་དང་། སྟབས་བདེ་ཐུག་པའི་སྣོད།  འགྱིག་ཤོག་སོགས་ཡིན་པ་བཤད་འགྲེལ་བྱས་ཡོད་འདུག
མཚོ་སྔོན་པོ་ཡུལ་ལྗོངས་དོ་དམ་ཚན་པས་ལོ་ལྟར་ས་གནས་དང་། རྫོང་། ཤང་སོགས་ལ་གཙང་བཟོའི་མཐུན་སྦྱོར་བྱས་པ་ཡིན་རུང་མཐའ་མ་གྲོང་ཚོ་གཅིག་པུའི་ཐོག་འབབ་ནས་གཙང་བཟོའི་ལས་ཀ་བྱ་ཐབས་བྲལ་བ་ཡིན་པ་སོགས་བཀོད་སྤེལ་བྱས་འདུག

གསར་འགོད་པ་འཇམ་དཔལ་ཕུན་ཚོགས།