༸གོང་ས་མཆོག་གི་ཐའེ་ལྦན་མཛད་འཆར་ལེགས་གྲུབ་བྱུང་སྐོར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ཐའེ་ལྦན་ནང་རྒྱ་མཚོའི་རླུང་འཚུབ་ཀྱི་གོད་ཆགས་བྱུང་བའི་མི་སེར་རྣམས་ལ་ཐུགས་གསོ་དང་གསོལ་འདེབས་སྨོན་ལམ་གནང་རྒྱུའི་དགོངས་པའི་དམིགས་ཡུལ་ཆ་ཚང་གྲུབ་པའི་སྐོར་བཀའ་གནང་འདུག ༸གོང་ས་༸སྐྱབས་མགོན་ཆེན་པོ་མཆོག་གི་ཐའེ་ལྦན་ལྷོ་ཕྱོགས་ཀའོ་ཤུང་རྫོང་ཁུལ་དུ་ཆོས་ཕྱོགས་ཀྱི་མཛད་རིམ་ཁག་རིམ་པ་གྲུབ་ནས་རྒྱལ་ས་ཐའེ་པེ་ཕྱོགས་སུ་རེས་གཟའ་ལྷག་པའི་ཉིན་མེ་འཁོར་ནང་ཞབས་སོར་འཁོད་གནང་ཡོད་ཅིང་སྐབས་དེ་དུས་ཨེ་པི་གསར་སྤེལ་ལས་ཁང་གི་གསར་འགོད་པས་ཟུར་དུ་བཀའ་འདྲི་ཞུས་པའི་བཀའ་ལན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་གོད་ཆགས་བྱུང་ཡུལ་ཤའོ་ལིང་གྲོང་གསེབ་ཁུལ་དུ་ཕེབས་ནས་གོད་ཆགས་འོག་ནས་གསོན་པོར་ཐར་བའི་མི་སེར་རྣམས་དང་མཇལ་འཕྲད་གནང་བའི་སྐབས་དང་ལྷག་དོན་དུ་གོད་ཆགས་བྱུང་བའི་མི་སེར་མང་པོས་མིག་ཆུ་བཏང་བའི་སྐབས་༸གོང་ས་མཆོག་ཀྱང་ཐུགས་སྐྱོ་པོ་བྱུང་བའི་སྐོར་བཀའ་གནང་འདུག ཡིན་ནའི་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་མཚོའི་རླུང་འཚུབ་ཀྱི་གོད་ཆགས་བྱུང་ཚར་བ་དེ་དངོས་ཡོད་གནས་ཚུལ་ཡིན་པ་དང་ཁོང་གི་ཐུགས་དགོངས་ཀྱི་དམིགས་ཡུལ་གཙོ་བོ་ད་ལྟ་གསོན་པོར་འཚོ་བཞིན་པའི་ནང་མི་རྣམས་དང་ས་ཁུལ་གྱི་མི་སེར་རྣམས་སྡུག་བསྔལ་གྱི་མནར་བཞིན་པར་ཐུགས་གསོ་དང་གསོལ་འདེབས་སྨོན་ལམ་སྐྱོན་རྒྱུའི་དགོངས་པའི་དམིགས་ཡུལ་གྲུབ་པའི་སྐོར་བཀའ་གནང་འདུག ཐའེ་ལྦན་ལྷོ་ཕྱོགས་ཀྱི་གྲོང་ཁྱེར་ཀའོ་ཤུང་ནས་ཕེབས་ཐོན་མ་གནང་གོང་༸གོང་ས་མཆོག་གིས་ཁོང་ཐའེ་ལྦན་དུ་ཕེབས་པའི་རྒྱུན་རིམ་ནང་ཆབ་སྲིད་ཀྱི་གནད་དོན་ཐོག་དགོངས་བཞེས་གནང་མེད་པའི་སྐོར་བསྐྱར་དུ་རེས་གཟའ་ལྷག་པའི་ཉིན་ནན་པོ་བཀའ་གནང་བ་བཅས་ཀྱི་གནས་ཚུལ་ཐོན་འདུག།