༧གོང་ས་མཆོག་ནས་གསར་འགོད་པ་དང་དད་ལྡན་མི་མང་ལ་བཀའ་སློབ།

༧གོང་ས་མཆོག་ནས་ཁེལ་ལི་ཕོར་ནི་ཡ་གཙུག་ལག་སློབ་གྲའི་ནང་ཕྱི་ཚེས་༡༦ཉིན་ གསར་འགོད་ལྷན་ཚོགས་དང་མི་མང་ལ་བཀའ་སློབ་བསྩལ་གནང་མཛད་ཡོད་པ།

༄༅། །བོད་མིའི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ཟླ་ ༦ ཚེས་ ༡༦  ཉིན་གྱི་སྔ་དྲོ་སན་དྷི་ཡ་གྷོའི་ཁེལ་ལི་ཕོར་ནི་ཡ་གཙུག་ལག་སློབ་གྲྭ་ཆེན་མོས་(University of California San Diego)ཇི་ལྟར་གསོལ་བ་བཏབ་པ་ལྟར་འཛམ་གླིང་འདིར་སྣ་ཚོགས་པའི་མཛེས་སྡུག་དང་ལེན་ (Embracing the Beauty of Diversity in our World) ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་སྩལ་གནང་འདུག རྒྱ་ནག་དང་ཉི་ཧོང་། སྦར་ཛིལ། ཕ་རན་སི་སོགས་ནས་ཁྱོན་གསར་འགོད་པ་ ༡༡༠ ལ་མཇལ་འཕྲད་ཀྱིས་བྱམས་བརྩེའི་རིན་ཐང་གཞི་རྩར་བཟུང་སྟེ་འགྲོ་བ་མིའི་རིགས་གཅིག་གྱུར་གྱི་འདུ་ཤེས་གོང་མཐོར་བཏང་བ་བརྒྱུད་འཛམ་གླིང་ལ་ཞི་བདེ་བསྐྲུན་རྒྱུ་དང་། དེ་བཞིན་རྒྱ་གར་སྲོལ་རྒྱུན་ནས་དར་བའི་ཆོས་ལུགས་འདྲ་མིན་འཆམ་མཐུན་ངང་འཚོ་བའི་གོམས་སྲོལ་ལྟར་འཛམ་གླིང་ཆོས་ལུགས་ཚང་མ་མཐུན་སྒྲིལ་གོང་མཐོར་གཏོང་གནང་མཛད་རྒྱུ་སོགས་གཙིགས་ཆེར་འཛིན་པའི་༧གོང་ས་མཆོག་གི་འགན་ཁུར་ཆེན་པོ་གསུམ་གྱི་སྐོར་ལ་བཀའ་སློབ་སྩལ་འདུག        ལྷག་པར་དུ་དེ་སྔ་ལོ་རབས་ ༦༠།༧༠ ནང་རྒྱ་ནག་ཏུ་རིག་གནས་གསར་བརྗེ་ཟེར་བ་ཞིག་བྱུང་བ་རེད། འོན་ཀྱང་དེང་སྐབས་རྒྱ་ནག་དམར་ཤོག་ཚོགས་པའི་འགོ་ཁྲིད་སྤྱི་དང་ལྷག་པར་སྲིད་འཛིན་ཞི་ཅིན་པིང་ (Xi Jinping) གི་འགོ་ཁྲིད་འོག་དེ་སྔའི་འཐབ་རྩོད་ཀྱི་རང་བཞིན་ལྡན་པའི་རིག་གནས་གསར་བརྗེ་ལྟ་བུ་མིན་པར།     བྱམས་བརྩེའི་རང་བཞིན་ཅན་གྱི་རིག་གནས་གསར་བརྗེ་ཞིག་ཡོང་སླད་ངེས་པར་དུ་འབད་བརྩོན་གནང་དགོས་ཀྱི་འདུག  དེ་ལྟར་བྱུང་བ་ཡིན་ན་འཛམ་གླིང་གི་མི་འབོར་མང་ཤོས་དང་དཔལ་འབྱོར་ཐོག་ནས་ཡར་རྒྱས་ཆེ་ཤོས་ཨང་གཉིས་པར་གྲགས་པ་རྒྱ་ནག་རང་ཉིད་ལ་མཚོན་ནའང་ཧ་ཅང་ཕན་ཐོགས་ཡོང་ཐུབ་པ་སོགས་བཀའ་གནང་འདུག    དེ་རྗེས་སན་དྷི་ཡ་གྷོའི་ཁེལ་ལི་ཕོར་ནི་ཡ་གཙུག་ལག་སློབ་གྲྭ་ཆེན་མོར་མི་མང་ལ་གསུང་བཤད་ཀྱི་མཛད་སྒོའི་ཐོག་ཆིབས་བསྒྱུར་བསྐྱངས་པ་དང་། ཐོག་མར་མཐོ་སློབ་ཀྱི་རིགས་བདག་ (Chancellor of the University of California San Diego) སྐུ་ཞབས་པྲཱ་ཌིབ་ཁོ་སི་ལ་ (Pradeep Khosla) མཆོག་གིས་ཕེབས་བསུའི་གསུང་བཤད་དང་། དེ་རྗེས་སན་དྷི་ཡ་གྷོ་གྲོང་ཁྱེར་གྱི་སྤྱི་ཁྱབ་པ་མཆོག་གིས་ཕེབས་བསུའི་གསུང་བཤད་དང་གྲོང་ཁྱེར་གྱི་ཕྱག་རྟགས་ཕུལ་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མི་མང་ཁྱོན་བསྡོམས་ ༢༥༠༠༠ བརྒལ་བར་ཐོག་མར་འཚམས་འདྲི་དང་འབྲེལ་འཛམ་གླིང་འདིར་སྣ་ཚོགས་པའི་མཛེས་སྡུག་དང་ལེན་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་འདུག    དེ་ཡང་༧གོང་ས་མཆོག་གིས་བཀའ་སློབ་སྩལ་དོན།  འགྲོ་བ་མི་དུང་ཕྱུར་བདུན་ཅུ་ཡོད་པ་ཚང་མ་བདེ་སྐྱིད་ཀྱི་མི་ཚེ་འདོད་མཁན་ཡིན་ལ།     བདེ་བ་འདོད་པའི་མི་ཞིག་བྱེད་པའི་ཐོབ་ཐང་ཀྱང་ཡོད།     འོན་ཀྱང་རང་བྱུང་གི་གོད་ཆག་ལས་གཞན་གྱི་དཀའ་ངལ་གཞན་མང་དག་ཅིག་ཡོང་གི་ཡོད་པ་དང་།     དཀའ་ངལ་མང་པོ་ཞིག་ང་ཚོ་རང་ཉིད་ཀྱིས་བཟོས་པ་ཤ་སྟག་ཡིན། ཞེས་དང་།     ང་ཚོ་ཚང་མ་དུས་རབས་ ༢༡ པའི་ནང་དུ་ཡོད་པ་དང།     འཛམ་གླིང་དཔལ་འབྱོར་ལ་ས་མཚམས་དང་ཚད་གཞི།     རྒྱལ་ཁབ་དང་གླིང་ཕྲན་གྱི་དབྱེ་བ་མེད་པར་ཚང་མ་གཅིག་ལ་གཅིག་བརྟེན་ཆགས་ཡོད།     དེ་བཞིན་གོ་ལའི་ཚ་དྲོད་ཀྱང་གླིང་ཕྲན་འདི་དང་དེ་ཞེས་དབྱེ་བ་མེད་པར་ཆ་ཚང་ལ་ཁྱབ་ཡོད།     ཕན་ཚུན་ཀྱི་དཀའ་ངལ་བརྗོད་རེས་དང་འགྲོ་བ་མི་ཁྱིམ་ཚང་གཅིག་ལྟར་ལས་ཀ་བྱེད་དགོས་པའི་དུས་ལ་སླེབས་འདུག་ཅེས་དང་།    ཆོས་ལ་དད་མོས་བྱེད་དང་མི་བྱེད་ལ་མ་ལྟོས་པར་འགྲོ་བ་མིའི་ཆེས་ཟབ་སའི་རིན་ཐང་སྟེ་བྱམས་བརྩེའི་ཐོག་ལ་དོ་སྣང་སྤྲོད་དགོས་ཀྱི་འདུག ང་ཚོའི་འགྲོ་བ་མིའི་གཞི་རྩའི་རང་བཞིན་ནི་བྱམས་བརྩེ་ལྡན་པ་ཞིག་ཡིན། ཞེས་སོགས་བཀའ་སློབ་སྩལ་བ་དང་།     དེ་ནས་ཡང་། དེང་རབས་ཤེས་ཡོན་གྱི་སྒྲོམ་གཞིར་ནང་སེམས་ཀྱི་རིན་ཐང་ངམ་སྤྱོད་བཟང་གིས་ལྡང་གི་མེད་པས་ང་ཚོས་རང་ཉིད་ཀྱི་རིག་པ་བེད་སྤྱོད་བཏང་ནས་དེང་དུས་ཀྱི་ཤེས་ཡོན་ནང་དུ་སྤྱོད་བཟང་འཇུག་དགོས་པ་དང་། ཆོས་ལུགས་ལ་མ་བརྟེན་པར་གོ་ལ་འདིའི་ཐོག་ཏུ་བདེ་སྐྱིད་ལྡན་པའི་འགྲོ་བ་མི་ཞིག་ཇི་ལྟར་བསྐྱེད་བསྲིང་བྱེད་རྒྱུ་དེ་དེ་རིང་གི་གཏམ་བཤད་འདིའི་དམིགས་ཡུལ་གཙོ་བ་ཡིན། ཞེས་སོགས་བཀའ་སློབ་སྩལ་ཡོད་པ་འདི་གའི་གསར་འགོད་པས་བཏང་གནས་དང་༧གོང་ས་མཆོག་གི་དྲ་རྒྱ་ནས་བཏུས་པ་ཡིན།།

ཞུ་དག་པ་རྩོམ་སྒྲིག་འགན་འཛིན་ཚེ་བརྟན་རྣམ་རྒྱལ།
གསར་འགོད་པ་ཚེ་བཀྲིས་དབང་ཕྱུག།