ཐའེ་ལྦན་གྱི་དངོས་ཟོག་རྒྱ་ཆེའི་ཕྱིའི་ཁྲོམ་རར་ཚོང་འགྱུར།

༄༅༎ཐའེ་ལྦན་གྱི་དངོས་ཟོག་རྣམས་རྒྱ་ནག་དང་ཧོང་ཀོང་གི་ཁྲོམ་ར་ཁོ་ནའི་ནང་ཕྱིར་ཚོང་བྱེད་པ་དེ་ཁོ་ན་མ་ཡིན་པར་དེ་ལས་རྒྱ་ཆེ་བའི་ཁྲོམ་རའི་ནང་ཚོང་འགྱུར་བྱེད་རྒྱུའི་འཆར་གཞི་ཡོད་པ་རེད།

དེ་རིང་རེས་གཟའ་མིག་དམར་ཉིན་ཐའེ་ལྦན་གྱི་སྲིད་བློན་ལྦུའུ་ཏེན་ཡི་གྱིས་ད་བར་ཐའེ་ལྦན་གྱི་དངོས་ཟོག་རྣམས་རྒྱ་ནག་དང་ཧོང་ཀོང་གི་ཁྲོམ་རའི་ནང་ཕྱིར་ཚོང་བྱེད་པ་དེ་ཁོ་ན་མ་ཡིན་པར་མ་འོངས་པར་ཐའེ་ལྦན་གྱི་དངོས་ཟོག་རྣམས་འཛམ་གླིང་གི་རྒྱལ་ཁབ་གཞན་དག་གི་ཁྲོམ་རའི་ནང་ཚོང་འགྱུར་དང་ཕྱིར་ཚོང་བྱ་གཞག་གི་གཞི་ཡུལ་རྒྱ་ཆེ་རུ་གཏོང་རྒྱུའི་འཆར་གཞི་ཡོད་པའི་སྐོར་དང། ད་ལྟ་བར་རྒྱ་ནག་དང་ཧོང་ཀོང་གི་ཁྲོམ་རའི་ནང་ཐའེ་ལྦན་གྱི་དངོས་ཟོག་བརྒྱ་ཆ་བཞི་ཅུ་ཕྱིར་ཚོང་བྱེད་ཀྱི་ཡོད་པ་དང། ཕྱིར་ཚོང་གི་བརྒྱ་ཆ་དེ་ནི་ཧ་ཅང་གི་མཐོ་པོ་ཡིན་པར་བརྟེན། ང་ཚོའི་དངོས་ཟོིག་རྣམས་ཁྲོམ་ར་གཅིག་གི་ནང་དུ་ཕྱིར་ཚོང་བྱེད་རྒྱུ་ཁོ་ནར་བསམ་བློ་དང་ཁ་ཕྱོགས་མ་གཏད་པར་འཛམ་གླིང་གི་རྒྱལ་ཁབ་དཔེར་ན། ཉི་ཧོང་དང། ལྷོ་ཀོ་རི་ཡ། ལྷོ་ཤར་ཨེ་ཤི་ཡ། ཨ་མི་རི་ཀ། ཁེ་ན་ཌ། ཨོ་སི་ཀྲོ་ལི་ཡ་སོགས་ཡོ་རོབ་ཁུལ་གྱི་རྒྱལ་ཁབ་དང་ཨེ་ཤེ་ཡའི་རྒྱལ་ཁབ་གཞན་དག་ནང་དངོས་ཟོག་ཕྱིར་ཚོང་གི་ཁྲོམ་རའི་གཞི་ཡུལ་རྒྱ་ཆེ་རུ་བཏང་བ་བརྒྱུད་ཐའེ་ལྦན་གྱི་ཚོང་འབྲེལ་ཡར་རྒྱས་དང་དཔལ་འབྱོར་འཕེལ་རྒྱས་ཡོང་རྒྱུའི་ཐུགས་རེ་གནང་གི་ཡོད་ཅེས་གསུང་ཡོད་པ་རེད།