ལྕམ་ཨང་སན་སུའུ་ཀིས་གྲོང་གསེབ་ཁུལ་དུ་འཚམས་འདྲིར་ཕེབས།

༄༅༎འབར་མའི་དམངས་གཙོའི་དབུ་ཁྲིད་ལྕམ་ཨོང་སན་སུའུ་ཀི་ཐེངས་དང་པོ་གྲོང་གསེབ་ཁུལ་དུ་འཚམས་འདྲིར་ཕེབས་པའི་རིང་ས་གནས་མི་དམངས་ཀྱི་རྒྱབ་སྐྱོར་དང་དགའ་མོས་ཞུ་མཁན་གྱི་འདུ་འཛོམས་ཆེན་པོ་བྱུང་སྟེ་ཁོང་ལ་རང་དབང་གི་རྣམ་པ་བྱུང་ཡོད་ཀྱང་གནས་ཚུལ་དབྱེ་ཞིབ་པས་འབར་མའི་གཞུང་གིས་ད་དུང་ཁོང་གི་འགྲོ་སྡོད་དང་ལས་དོན་སྤེལ་བར་རང་དབང་ཆ་ཚང་བ་མེད་པའི་ངོས་འཛིན་བྱེད་ཀྱི་ཡོད་པ་རེད།

ནོ་བེལ་ཞི་བདེའི་བྱ་དགའ་བཞེས་མྱོང་མཁན་དང་འབར་མའི་དམངས་གཙོ་ཚོགས་པའི་དབུ་ཁྲིད་ལྕམ་ཨོང་སན་སུའུ་ཀི་འབར་མའི་གྲོང་གསེབ་ས་ཁུལ་དུ་འཚམས་འདྲིར་ཕེབས་པའི་སྐབས་དྲག་ཆས་མ་སྤྲད་པའི་ཉེན་རྟོག་པ་རྗེས་སུ་སྙེགས་ནས་ཡོད་པ་དང༌། ཁོང་གིས་མི་དམངས་ལ་གཏམ་བཤད་གནང་དུ་མ་བཅུག་པ་སོགས་ཀྱིས་ད་ལྟའི་འབར་མའི་གཞུང་གིས་ཁོང་ཆབ་སྲིད་ཀྱི་ལས་དོན་ནང་ཐེ་ཇུས་བྱེད་དུ་བཅུག་རྒྱུ་མིན་པའི་ཉེན་བརྡ་ཞིག་ཡིན་པ་གསུང་གི་ཡོད་པ་རེད། དེ་ཡང་དབྱིན་ཇིའི་ལོན་ཊོན་དཔལ་འབྱོར་སློབ་གྲའི་ཞིབ་འཇུག་པ་ཞིག་གིས་གསུང་པར། འབར་མའི་གཞུང་དེ་ཡིས་ད་ལྟ་ལྕམ་ཨོང་སན་སུ་ཀི་ལ་ལྟ་སྟངས་ལེགས་པོ་འཛིན་གྱི་ཡོད་པའི་རྣམ་པ་དེར་མི་དམངས་ཀྱི་ངོས་ནས། ཁོང་ལ་རང་དབང་ཐོབ་ཡོད་པ་དང༌། ཁོང་གི་འབར་མའི་ས་ཁུལ་ཁག་ཏུ་འཚམས་འདྲིར་ཕེབས་ཏེ་ཁོང་གི་ཆབ་སྲིད་ལས་དོན་བསྐྱར་གསོ་ཐུབ་ཡོང་བསམ་པའི་རེ་བ་བྱས་ཏེ་མགོ་རྩ་བ་ནས་འཁོར་རྒྱུ་མེད་པའི་སྐོར་གསུང་ཡོད་ཅིང༌། དེ་ནི་ཁོང་ལ་ཆབ་སྲིད་ཀྱི་ལས་དོན་སྤེལ་རྒྱུར་ཚད་གཞི་ཡོད་པར་བརྟེན་ནས། དེ་རིང་ཁོང་རྒྱལ་ས་ཡང་གོན་དུ་ཕྱིར་ལོག་མ་གནང་གོང༌། གསར་འགོད་པའི་འདུ་འཛོམས་ཐོག་ལ་ད་རེས་འབར་མའི་གྲོང་གསེབ་ས་ཁུལ་ནང་འཚམས་འདྲིར་ཕེབས་པའི་སྐོར་གྱི་གནས་ཚུལ་གང་ཡང་འགྲེལ་བརྗོད་གནང་མེད་པ་རེད། ལྕམ་ཨོང་སན་སུའུ་ཀི་ནི་འདས་པའི་མི་ལོ་ཉི་ཤུའི་ནང་ནས་མང་ཆེ་བ་ནི་ཡོང་གོན་དུ་ཁོང་གི་་ཁྱིམ་ཚང་དུ་འགྲོ་བསྐྱོད་ཀྱི་རང་དབང་མེད་པར་དམ་བསྒྲཌ་འོག་བཞུགས་པ་དང། ཁོང་འབར་མའི་དྲག་པོའི་གཞུང་གིས་ན་ནིང་ཕྱི་ཟླ་བཅུ་གཅིག་པའི་ནང་ཁྱིམ་ཚང་གི་དོ་དམ་འོག་ནས་གློད་བགྲོལ་བཏང་བའི་རྗེས་ཐེངས་དང་པོ་རྒྱལ་ས་ཡང་གོན་གྱི་ཕྱི་ཕྱོགས་སུ་འཚམས་འདྲི་ཕེབས་པ་ཡིན་ཡང་འཚམས་འདྲི་དེའི་རིང་ལ་ཆབ་སྲིད་ཀྱི་ལས་དོན་སྤེལ་རྒྱུར་ཆ་ཚང་བའི་རང་དབང་མེད་པའི་རྣམ་པ་བྱུང་ཡོད་པ་རེད།